Mikrobyo sa mga hayop
SA pagdating sa bansa ng unang bugso ng anti-COVID vaccine sa kagandahang-loob ng China, natitiyak ko na nabuhay ang pag-asa ng ating mga kababayan na masyado nang nagdurusa at naiinip dahil sa patinding banta ng nakamamatay na coronavirus; kaakibat ito ng paniniyak na parating na rin ang karagdagang bakuna na bibilhin natin mula sa malalaking pharmaceutical firms sa iba’t ibang bansa.
Bagamat katiting pa lamang, wika nga, ang dumating na bakuna, makapagpapahupa na ito kahit paano sa ating takot at pangamba sa naturang mikrobyo. Lalo na nga kung iisipin na hindi iilan ang mga bansa na mistulang nag-aagawan at naguunahan sa pagbili ng bakuna; lalo na ngayon na pinangangambahan pa rin natin ang kinatatakutang UK variant ng COVID-19. Sa kabila nito, nakikita natin ang kahandaan ng kinauukulang mga ahensiya at gobyerno laban sa paglaganap ng nabanggit na coronavirus.
At dahil nga sa pagtangkilik ng maliliit at mayayamang bansa sa bakuna, natitiyak ko na walang hindi naniniwala na ang COVID vaccine ay produkto ng mga pagsisikap at katalinuhan ng mga siyentipiko at medical expert sa iba’t ibang panig ng daigdig. Ang ating mga dalubhasa sa gayong larangan ay magkakaagapay ring tumuklas ng mga lunas sa nasabing nakakikilabot na mikrobyo.
Sa pagtutulungan ng Department of Health (DOH) at Department of Science and Technology (DOST), tinangka nilang suriin ang virgin coconut oil (VCO), halimbawa, upang alamin kung ito ay makasusugpo sa coronavirus. Ang maingat at puspusang pagsusuri ay isinagawa sa isang laboratoryo sa Sta. Rosa City sa Laguna.
Ang ganitong pagsisikap ay maaring ipinagpapatuloy upang labanan naman ang pamiminsala ng iba’t ibang mikrobyo na hindi lamang pumipinsala sa sangkatauhan kundi maging sa ating mga alagang hayop. Sa pagkakataong ito, napag-alaman ko na magkatuwang naman sa gayong pananaliksik ang Department of Agriculture ( DA) at maaring ang DOST at ang iba’t ibang mga beterinaryo. Sa pagkakataong ito, sisikapin nilang makatuklas ng epektibong bakuna laban naman sa African Swine Fever (ASF) na pumipinsala sa ating mga alagang baboy; at avian flu na nanalasa sa ating mga manukan.
Hindi kaila sa atin na tulad ng COVID-19, ang ASF ay pumatay na rin ng libu-libong baboy na nagiging dahilan ng pagkalumpo ng ating 250 bilyong piso ng hog industry. At nagiging dahilan ng pagbagsak ng maliliit at malalaking babuyan sa bansa.
Tulad ng mga magkakatuwang na pagsisikap sa pagtuklas ng bakuna laban sa coronavirus, marapat ngayon ang walang humpay na pagtutulungan ng gobyerno at mga vaccine expert upang mailigtas sa ganap na paglugmok ng ating hog industry at mapuksa ang mga mirobyo sa hayop; at upang hindi naman masyadong mahirapan ang ating konsyumer at ang buong sambayanan.