Babawiin ni DU30 ang pagkansela sa VFA
ITONG huling pulong ni Pangulong Duterte, sa pagharap niya sa mamamayan upang mag-ulat hinggil sa COVID-19 at ang ginagawa nila sa paglaban dito, naisingit niya ang tungkol sa Visiting Forces Agreement (VFA). Aniya, kung kanyang itutuloy ito o kakanselahin, nais niyang malaman ang pulso ng sambayanan at ang kasundaluhan. Kaya, ibabato niya ang magiging kapalaran ng VFA sa taumbayan at sa Armed Forces of the Philippines. Noong una, kinansela na ng Pangulo ang VFA at ipinagbigay alam na ito ng Department o Foreign Affairs sa embahada ng Amerikano.
Ang napakababaw na dahilan ng Pangulo ay ang pagkansela ng Kano sa pasaporte ni Sen. Ronald dela Rosa. Pinagbawalan na ang Senador na pumasok sa Amerika. Dahil sa pandemya, sinuspinde ng Pangulo ang pagkansela niya ng VFA. Hindi nagtagal sinabi ng Pangulo sa Amerika na ipagpatuloy niya ang VFA kung bibigyan ang Pilipinas ng bakunang gawa ng Pfizer. Para bang ang alam ng Pangulo ay pag-aari ng gobyerno ng Amerika ang Pfizer gayong pribadong kompanya ito. Itong huli, sinisingil niya ang Amerika ng $16 billion bilang military aid na kung hindi ito magbabayad ay wawakasan na niya ang VFA.
“Mistulang extortion ito,” wika ni VP Leni Robredo at Sen. Ping Lacson. Naging dahilan ito upang sa nakaraang publikong pulong niya hinggil sa COVID-19, ay batisukin niya si VP Robredo. Wala, aniyang, nalalaman ito at hindi karapatdapat na maging pinuno ng bansa. Ang mga suliraning panlabas ng Pilipinas tulad ng pakikipagsundo sa mga ibang bansa ay kanya lang kapangyarihan na siyang isinasaad ng Saligang Batas. Ang problema, mali ang Pangulo at ipinagdiinan pa ito ni Sen. Lacson. Sa ilalim ng Konstitusyon, aniya, anumang kasunduan, tulad ng VFA, ay kailangan ang pagkatig ng 2/3 votes ng buong kasapian ng Senado para magkabisa ito sa bansa.
Ngayon naman, ang Pangulo ay humihingi ng gabay sa taumbayan at kasundaluhan sa kanyang gagawin sa VFA. Hinahanap na siya ng dahilan kung paano niya lulusutan ang nangyaring kaguluhan. Naging magulo ang kanyang posisyon dahil sa kanyang pagnanais na mapalapit sa China. Sa simula pa lang ng kanyang termino ipinakita na niya ang pagkiling sa bansang ito at panay ang banat niya sa Amerika. Maaaring ang China ay may malaking bahagi sa pagtakbo niya at pagkapanalo sa panguluhan. Kahit ipinangako niyang ipagtatanggol ang teritoryo ng bansa na kinumpirma ng Arbitration Court, The Hague, sa desisyong iginawad nito sa kasong isinampa ng bansa laban sa China, isinantabi niya ang desisyong ito at inihayag na inutil siyang ipursige ito.
Ang pagbabago ng posisyon ng Pangulo ay may kinalaman sa pagbabago na administrasyon sa Amerika. Naging dahilan din upang lumakas ang kilusan ng mga bansa na ipaglaban ang freedom of navigation sa karagatang pinakikipot ng China dahil, ayon sa kanya, sakop ito ng kanyang teritoryo. Sa kilusang ito, umaayon ang Armed Forces of the Philippines kaya gumawa na ito ng mga hakbang upang ipagtanggol ang teritoryo ng bansa sa West Philippine Sea. Hindi makahihiwalay dito ang Pangulo. Babawiin na niya ang ginawa niyang pagkansela sa VFA.