Intay Man Agpallailang Idiay Dahilayan
NO nadagaang ti panawen maisurot no kua datao a mapan agpallailang idiay Dahilayan Forest Park iti sakaanan ti Mt. Kitanglad idiay Barangay Dahilayan, Manolo Fortich, Bukidnon. Nasurok bassit a maysa nga oras a tarayen ti lugan manipud iti pagtaenganmi iti Cagayan de Oro City.
Daytoy a lugar ti nagnaganenmi iti Little Baguio gapu iti kinalamiis ti klimana iti kangatona a 4,700 kadapan manipud iti sea level ken gapu iti kaadu dagiti dadakkel, nangangato ken nalilinteg ti pinuonda a saleng. Iti linong dagitoy a saleng ti nairanta a picnic grounds. Adu dagiti kayo a lamisaan ken tugaw ket ditoy ti panganan dagiti agitugot iti balonda, ken dagiti awan panggepda nga umian. Ditoy nga aginana ken mangan ti kaaduan kadagiti tattao nga umay agpasiar.
Agduduma met dagiti life-size nga ayup a kunam no sibibiagda nga agin-inana laeng iti sirok dagiti saleng. Malasin met ketdi a saanda a pudno ta ayupda met a tagaganggannaet a daga a kas koma kadagiti kamelio, tigre, elepante, leon, sunggo, hippopotamus ken dadduma pay. Paggugusto dagiti ubbing a sakaysakayan dagitoy. Adu met ti agse-selfie iti abayda. Ngem idi damok met ti nag-selfie idiay napasanudak iti kigtotko. Dandani ketdin nadalapusko ti nagdakkel a kobra iti sanguanak. Nakangato ti immakaba nga ulona ket tumukkawen. Anian a tigergerko. Pudno ngamin a kasla kobra ti langana sa inkabilda pay iti baet dagiti muyong iti igid ti dalan.
Adda met dagiti nadalus a panganan iti parke a mabalin a pagorderan iti nadumaduma a taraon ken inumen. Adu pay dagiti cottages a mabalin a pagturogan. Ditoy ti ayuyang dagiti aggapu kadagti adayo a probinsia a kaaduanna ti grupo dagiti pamilia, estudiante, ken dagiti
ganggannaet a puli. Adda pay mini-golf course a ranrantaenda a papanan.
Pagaayatko ti agpallailang ditoy ta uray nakatugawak laeng, mapnek dagiti matak a mangbuybuya iti nalangto a kakaykaywan a nangabungot kadagiti bantay iti aglawlaw. Makapasalibukag ti lamiis ken lamuyot ti apros ti pul-oy iti bagi, rikna ken kararuak, a kas man addaak iti nakataltalna a lugar. Malipatak dagiti tattao iti asidegko a di agsarsardeng nga agaayam, agpagnapagna, mangmangan wenno agsel-selfie. Iti ngato iti di unay adayo, makita met dagiti agluglugan iti 840 a metro ti kaatiddogna a dual zipline a kaatiddogan kano iti Asia. Adu met dagiti naayat nga aglugan iti python roller zipride, iti flying lizard canopy glider, ken iti ropes challenge course.
Napanen dagiti kakaduak kadagiti paglinglingayan a pagluganan. Inluganda ti aguppat ti tawenna a lalaki nga apokok iti Forest Luge. Imbes a nagluganak met, napanak nagna iti cable hanging bridge a 80 metro ti kaatiddagna ken 30 metro ti kangatona. Insardengko iti tengnga ta ninanamko ti nagpintas a buya dagiti nalangto a kayo ken mula, dagiti turod ken bantay a digdigosen ti lawag ti ubing pay nga init, dagiti puraw nga ulep nga aglaylayag iti asul a langit. Makapabang-ar a buya a kail-iliwko unay a subliasublian.
Iti baba, nalawag a makita dagiti agluglugan iti barrel train, ATV, ken zorb, ken uray dagiti nakalugan kadagiti bumper boat iti lagoon iti baba a mismo ti hanging bridge. Makaawis dagiti katkatawada a mangpisang iti kinaulimek ti Dahilayan Forest Park.
Simmurotak kalpasanna kadagiti annakko a nagbuya kadagiti aglalangoy a dadakkel ken nadumaduma ti kolorda a poi. Nagadun a sensilio iti lansad ti dan-aw. Ipuruak dagiti tattao ti kuartada kadagiti poi tapno ngata aritenda nga umasideg dagiti poi iti yanda. Napintas ngamin a buyaen dagiti poi nga agiinnuna nga aglangoy a mapan iti ipagarupda a makanda.
Inunormi dagiti dalan nga agpababa nga agpangato. Nabayag a binuybuyak ti nakangatngato nga sky tower base jump. Ngem napimpintas nga adayo ti buya ti aglawlaw. Iti sadino man a pangiturongan kadagiti mata adda latta makakayaw a buya. Agkarasardeng ti balasangko a nangretrato iti close up kadagiti naidumduma ti kinapintasda a sabsabongbakir ta kabarbaroda iti panagkitana ken pudno met a makaawisda iti imatang.
Iti isasang-atmi manen iti kapuskolan dagiti saleng binay-ak dagiti kakaduak nga immuna ta inyin-inayadko ti nagna. Makabannog ti umuli-umulog ngem di nagressat ti panagdaliasat dagiti matak iti awan kaaspingna a kinapintas ti aglawlaw nga impintak iti panunotko gapu ta di kabaelan ti dilak nga iladawan. Anian a nagpintas! kinunkunak lattan. Diak naaluadan ti nagdayyeng ta diak nasbaalan ti ragsak ken yaman a nagari iti barukongko. Ngamin napaneknekak manen ti naindaklan nga ayat ken pannakabalin ti Namarsua a nangkawes iti kinadayag ken kinalibnos itoy a paset ti nakaparsuaan. Obra Maestra ti Namarsua dagitoy a buya a mangted pannakapnek iti rikna ti amin a makakita.
Kellaat nga adda nagparang iti baet dagiti sanga dagiti saleng a bimmanesbes iti agarup sangaagpa ket gudua ngata iti ngatuen ti ulok. Nagpaigidak ta insurotko ti panagkitak iti nalukmeg a babai a nakasakay iti python roller. Tinaliawko ta kitaek ti pagturonganna. Ngem ne, nagsardeng ketdi ti lugannan. Nakitak a nupay nagkugtakugtar ti babai, saan latta a nagkir-in ti luganna a naikapet kadagiti kable iti ngato. Pinukkawak dagiti annakko a nakaadayo gayamen kaniak ket nagdardarasda a nagsubli ta nakitada ti nagsardeng a lugan iti ngato. Awan makitami a trabahador iti parke a mabalin
a tumulong iti babai sa adayo pay unay ti launching area iti yanmi. Impadas nga inggaw-at ti manugangko a lalaki ti imana ket apagisu unay a maabotna ti dapan ti babai. Ginammatanna ti dapan ti babai sa nagtaray a nagsubli ket naisurot ti lugan. Nagtaray manen a nagpasango sa impennekna nga insuyo ket nagtarayen ti lugan. Impukkaw laengen ti babai ti panagyamanna a bulon ti panagkakatawami.
Napankamin iti picnic grounds. Agsasallupang dagiti tao a padami a mapan met mangan ken dagiti agsubli manen iti pagpasiaran. Nagadun a tao. Naarimbangawda. Naokupar amin a lamisaan. Nakarkaro pay ngem piesta. Agduduma dagiti mangngeg a pagsasao dagiti pada a Filipino. Adda pay Ilokano. Naggapuanda met ngata? Ngem awan panawen a makipatang ta agdardaras amin, awan pay pagisiisan iti dalan.
Nagadu a balon a nagpuypuyatan dagiti kabbalayko a linuto ngem arig di met naksayan ta dida met nakapangan. Ti inintonarda, daydiay mapan manen agpasiar ken agluganlugan. Imbirokko dagiti matak iti mabalin a pagipadawatan ngem awan uray ubing laeng a makitak, ken napno met iti taraon dagiti sabsabali pay a lamisaan.
Kalpasan ti pangngaldaw simmurotak manen kadagiti annakko. Simmalogkami. Awan matatao iti baba. Nadalus ti berde a karuotan. Nagpintas a pagdalupisakan. Mangngeg dagiti nasinggit nga uni dagiti billit iti kasalengan. Ay-ayamen ti angin dagiti bulong ti saleng. Makapasalibukag ti aplaw ti palayupoy. Idi laeng a makitak daytoy a paset ti park. Idiayak met latta ngaminen ngato a magmagna. Ditoy a binuyami dagiti napan nagpallayog iti tangatang iti nagnaganenda iti Drop Zone a 120 a kadapan ti kangatona ken umuna kano a pendulum swing iti Filipinas.
Maigalut dagiti bagi dagiti aglugan sa in-inayad a maipangatoda ket inton nangatoda unayen, dagus nga ibbatan ti crew ti kable ket anian nga ikkisda a kellaat nga agpababa sa no mamin-ano a mabissabissayotda nga agpangato sa manen agpababa, agpangato sa agpababa agingga nga agtalna ti kable.
Pinadas ti maysa kadagiti dua a babbalasangko ti napan nagpallayog ket kasta unay ikkisna iti butengna. Inkarina a dinanton uliten uray tangdananda pay. Awanen ti nayat a napan nagpallayog kadagiti kakaduak. Nagbuyakami laengen. In-video met ti manugangko ti agayan-ayat a napan met nagpallayog. Nagabayda. Nagpangatoda. Idi nangatoda unayen kellaat a natnagdan. Inyikkis ti lalaki, “Will you marry me?” Inriaw met dagiti agbuybuya ti nagsasaruno a “Yes! Yes, na dayon!” a kayatna a sawen, “Wen a dagus!” Saankon a naallingag ti inyikkis ti babai gapu iti ariwawa ken katkatawami nga agbuybuya.
Idi agawidkami, naminsan pay a minatmatak ti pakabuklan ti Dahilayan Forest Park. Saan nga agkupas ti kinalasbangna. Dimmaeg pay iti panagay-ayam dagiti maris ti lawag ti dandanin agtabon nga init iti tuktok dagiti turod ken bantay, kadagiti kayo ti saleng, nalangto a muyong ken karuotan. Innayonko daytoy buya iti album ti Dahilayan nga intalimengko iti puso ken panunotko ta subliakto manen a buyaen kadagiti darepdepko.
Naisangrat ti Dahilayan Forest Park a tourist destination ti probinsia ti Bukidnon ngem itan, iti entero a pagilian. Nalaka a danonen ti Dahilayan Forest Park. No aggapu iti Luzon ken Visayas aglugan iti barko wenno eroplano. Adu dagiti van ken taxi iti airport ken wharf nga agur-uray iti pasahero nga agpaSiudad ti Cagayan de Oro. Damagen laeng kadagiti drayber no sadino ti pagsakayan a mapan iti Dahilayan ket idiayen ti pagpaitulodan.—O