Ania ti Mapaspasamak iti Abagak? (3)
TULOY ti sungbat iti surat ni Ms. Landlady ti Tuguegarao City, 56 anios ken mangimatmaton iti 2-kadsaaran a dormitorio iti nasao a siudad. Kunana a mabambannog nga agdaldalus iti balay. Iti napalabas a tallo a bulan, makarikrikna iti panaas iti puon ti kanawan nga imana. Nakaro no kasta nga adda gaw-atenna wenno no ingatona ti imana. Kinapudnona, marigatan payen a mangigaraw. Damdamagenna no ania ti napasamak iti abagana ken no masapul kadi nga ipaoperarna daytoy.
Ti panangagas iti sakit iti abaga, kasayaatan no ipreskribir ti doktormo. Mabalin ti agpakita iti family doctor. Napateg ketdi a mapanka agpakita iti orthopedic and trauma doctor, iti physiatrist, ken iti neurologist nangruna no adda nerve impingement (pigis iti abaga) wenno uray iti pain specialist.
Gagangay met a para iti kaduan a dunor iti abaga, masapul ti inana ken physical therapy— kombinasion ti masahe, panagwatwat wenno ehersisio a mangisubli iti pigsa ti abaga, ken espesial nga ehersisio a mangisubli iti kabaelan nga aramiden ti abaga.
Makatulong met dagiti agas (drug) a mangtellay iti sakit ken panagbukno, ken mabalin a mayindieksion iti abagam.
Masapul kadi ti operasion? Iti kasom, dakkel ti posibilidadna a saanmo pay a masapul. Umanay kenkan ti inana ken physical therapy. Adda ketdi dagiti sabsabali nga addaan iti problema a kas iti napigis a rotator cuff a masapul no kuan ti operasion. Agduduma dagitoy nga operasion manipud iti simple arthroscopy tapno maikkat ti scar tissue (piglet) wenno major open surgery tapno matarimaan ti abagam.
Iti sabali a bangir, para kadagiti saan a grabe a problema, addada maidiaya kadagiti pasiente. Iti biangmo, posible a physiotherapy ti umisu kenka.
Ania dagiti rason wenno pagilasinan tapno agpakitaak iti physiotherapist
para iti sakit iti abagak? No saan a maaw-awan ti sakit iti nasuroken a makalawas iti laksid ti medikasion a kas iti painkiller ken anti-inflammatory ken agtultuloy a maapektaran dagiti aktibidadmo a kas iti panagsukat iti bado; panagbagkat, pananggawat iti bukot wenno mabalin a maapektaran pay ti pannaturogmo, masapul nga agpakitakan iti physiotherapist.
Dagiti gagangay a wagas ti physiotherapy treatment:
• Soft tissue release wenno advanced a teknik iti panagmasahe tapno maamiris, mabennat ken mapasayaat dagiti nalulukneng a tisyu iti bagi a kas iti pennet (ligament ken tendon) ken fascia (kalupkop ti masel). • Joint mobilisation wenno panangpalukay iti susuop. • Postural correction wenno panangatur iti postura ti abaga. • Progressive strengthening programme wenno panangpapigsa iti abaga. • Stretching exercises wenno ehersisio a mangpapigsa iti abaga. • Panangikabassit iti aktibidad. • Heat/ice therapy wenno panangusar iti heat pack wenno ice pack iti abaga. • Ultrasound therapy.
Iti kasom, makatulong kenka dagiti nadakamat iti ngato. Saludsodem iti doktormo wenno physical therapist-mo tapno ilawlawagda ti akem dagitoy a wagas ta napateg dagitoy a proseso nangruna no saan a nasken a kasapulam ti operasion.
Kasano a maliklikan ti sakit iti abaga? Maliklikan daytoy babaen ti regular nga ehersisio a mangpapigsa ken mangunnat kadagiti abagam ken tapno mapagtalinaed ti umno a posturam. Liklikam met ti kellaat nga adu nga aktibidad tapno saan a maklaat ti bagim.-- Doc Gener ken Doc Lorna