Dagiti Dua a Mannalon
IDI un-unana nga aldaw a napuskol pay laeng dagiti kabakiran, adda dua a mannalon a napan nagpukan iti kayo iti bantay nga ilakoda iti agar-aramid iti dadapilan. Sangat- salog ti desdes a dalanen ti nuangda a nagpaguyod iti troso. Idi makadanonda iti maudi a sang-atan, madi ket madi lattan dagiti nuangda a sumang-at.
“Bay-am no madi dagiti nuang,” kinuna ti maysa kadagiti mannalon. “Makauray daydiay agar-aramid iti dadapilan! Yinanata ketdin!”
“Ngem masapul a mailakok a dagus daytoy a troso!” kinuna met ti maikadua a mannalon.
“Huh!” indusngi ti umuna a mannalon, ket inalsaannan ti nuangna. “Isanggirta pay la ditoy sirok ti kayo. Nagimas ti puyupoy ti angin. Dika agdanag, dinata baybay-an ti Apo! Mailakotanto dagita a troso.”
Ket insanggiren ti mannalon iti puon ti kayo. Intakkabna pay ti kallugongna iti rupana. Iti di mabayag, mayaten ti urokna.
Ngem saan nga inalsaan ti maikadua a mannalon ti nuangna. Binautbautna ketdi ti nuangna tapno isang-atnan ti troso. Agkakadakes a sao ti nagaon iti ngiwatna.
Isu met a lumabas ni Apo Dios, kaduana ni San Pedro. Inilut ni Apo Dios ti tengnged ti ayup ket iti apagdarikmat, kas man la naikkan iti baro a kired ti ayup ta linaklakanan nga insang-at ti troso.
“Hm, dika maawatan, Amo,” kinuna ni San Pedro ken ni Apo Dios. “Nangngegmo met nga agkakadakes a balikas ti nagaon iti ngiwat daydiay a mannalon ngem apay a tinulongam? Dayta umuna a mannalon, sika ti napanunotna itay ngem dimo man la riniing tapno ipakona manen ti nuangna ket mapaguyodnan nga awan sawsawirna ti ilakona a troso.”
“Daydiay maikadua a mannalon, pudno a nagaalas a balikas ti rimmuar iti ngiwatna ngem saan a nagtaud dagidiay iti kaunggan ti pusona,” kinuna ni Apo Dios. “Ti adda iti pusona, isu ti asawana ken dagiti annakna a mangnamnama iti nasapa nga isasangpetna ken ti pannakailakona a dagus iti troso tapno adda igatangna iti kanenda.” “Ket ti umuna a mannalon, Amo?” inunton ni San Pedro. “Ay, sanak la mapanunot no adda kayatna,” kinuna ni Apo Dios. “Simro manen ti kinasadutna ket bay-am a maturog agingga iti kaykayatna.”—O