Padasenyo Dagitoy a Features ti Windows Calculator
IDI addakami iti hayskul, gimmatang dagiti dadakkelko iti scientific calculator tapno adda usarek iti asignaturami a Chemistry ken Physics. Nangina ti scientific calculator kadagidi a panawen. Dimi ammo no sagmamano itan ti scientific calculator.
Ngem kasla saan sa metten nga uso ti scientific calculator a kas iti daydi us-usarenmi idi addakami iti hayskul. Ngamin, addan calculator app a para iti Android smartphone, a kas iti smartphone-ko ita. Uray ti laptopko nga addaan iti Windows 10, addaan iti kastoy. Ken saan la gayam a simple nga arithmetic ti mabalin nga aramiden iti Windows calculator. Padasenyo man met dagiti sumaganad a features-na:
Standard, Scientific, Programmer, ken Date Calculator.
No standard calculator, mabalin ti addition, subtraction, multiplication, ken division. Mabalin pay nga alaen dagiti square root, percentages, wenno fractions. Ngem no i-click-yo ‘diay tallo a linia iti makanigid a ngatuen ti app, makitayo dagiti nadumaduma a features ti Calculator app: Scientific, Programmer, ken Date calculation.
Mabalin nga usaren dagiti trigonometry operations ti scientific calculator a kas koma ti SIN, COS, ken TAN.
No coder wenno programmer-kayo met, mabalin nga usaren ti Programmer calculator a para iti binary, decimal, ken dadduma pay a kita ti calculation. Babaen met ti date calculation, makuentayo no mano nga aldaw, lawas, wenno tawen ti napalabas manipud iti maysa a petsa. No bilang diyo malagip no manot’ tawenyon, ikabil laeng ti kasangayyo ken automatic a bilangen ti calculator no aniat’ edadyo iti agdama.
Converter. Adda met conversion feature ti calculator. Iti Estados Unidos, kanayon nga usarenda ti milia para iti distansia ken libra (pound) para iti timbang idinto a kilometro ken kilo ti maar-aramat iti Filipinas. Mabalin nga usaren ti calculator tapno maammuak ti kaibatogan ti distansia iti kilometro ken milia. Saan laeng a dayta ti mabalin nga i-convert ti calculator, mairaman pay ti temperatura, oras, kinapardas, ken nagdumaan ti dua a nailian a kuarta a kas iti doliar ti USA ken Pisos ti Filipinas. Ngem masapul ti internet connection tapno agtaray daytoy a feature.
Ngem kas palagip dagiti mannursuro, uray no adda calculator, ditay’ koma liplipatan ti agkuenta ta ditoy a mapaneknekan nga ammotayo dagiti proseso ti Matematika.—O