Dagiti Agtutubo ken ti Panagmaneho
MABALIN nga ammo dagiti agtutubo ti agmaneho ngem awan pay ti naananay a padasda.
Nasken ngarud a kankanayon a bilinen ken salakniban dagiti agtutubo no mapalubosandan nga agmaneho a kas iti panangliklik kadagiti peggad iti kalsada.
No met makiluglugan dagiti ubbing, kanayon nga ipalagip kadakuada ti dida pannakilugan iti nabartek a tsuper.
Maiparit itan ti panagaramat iti selpon bayat ti panagmaneho. Saan koma ngarud nga ipalubos nga agawen ti panangaramat iti selpon ti atensionda iti panagmaneho. Mabalin nga adda saan a nasayaat a mapasamak uray no apagdarikmat laeng ti panagaramat iti selpon bayat ti panagmaneho.
Adu pay ti maak-aksidente gapu iti alkohol ken droga. Uray bassit laeng ti mainum a nasanger, dakkel ti peggad nga ipaayda iti asino man nga agmaneho.
Kas iti makabartek a mainum, maiparit met ti panagmaneho no adda iti impluensia ti droga, ilegal, legal wenno agas nga adda reseta ti doktor.
Agpada nga adda epekto ti legal a droga ken dagiti maireseta nga agas iti kabaelan ti agmaneho a panagannad.
Kasta met a kaaduan kadagiti aksidente iti dalan ti maigapu iti kinapardas ti lugan. Ti kinapardas ti lugan ti kadawyan a pakaigapuan ti ipapatay, pannakadunor ken kinatalged dagiti pasahero.
Nasken laeng a kankanayon a palagipan dagiti ubbing a liklikanda ti makilumba wenno makiinnuna nga agpataray kadagiti kalkalsada. Malaksid iti daytoy, makaipaay pay iti peggad dagiti tsuper a napardas nga agmaneho kadagiti tattao a malabsanda malaksid iti pannakasinga dagiti sabali a tattao iti kinatagari ti lugan.
Adu pay a tsuper ken pasahero ti matmatay gapu iti dida panagaramat iti seatbelt. Nataltalged met laeng ti panagaramat iti seatbelt ngem ti saan a panangikankano iti daytoy.
Siguraduen pay a kanayon a maamiris ti lugan nga ar-aramaten dagiti agtutubo. Mairaman ditoy dagiti pilid a goma agraman ti presion, tawa, sarming, panaglati, dagiti silaw ken dagiti dadduma nga indicators.
Ipalagip pay kadagiti agmanmaneho nga agtutubo nga itugotda ti selponda, plaslayt, ken papel ken lapis a pangisuratanda iti mensahe no bilang panawanda ti lugan iti ania man a rason.
Masapul pay nga adda dagiti rigis a maaramat iti panagsukat iti goma tapno adda pangpunas kadagiti marugitan nga ima, ken first aid kit.
No ma-flat ti goma, ibilin kadagiti ubbing ti nainayad a panangimahehoda iti lugan iti nataltalged a pagsardengan. Mabalin a madadael ti goma ken wheel rim ngem nasaysayaat daytoy ngem ti isaldada ti bukodda a karadkad.
No met madadaelan iti napeggad a lugar, ibalakad kadagiti agmanmaneho nga ubbing a panunotenda a nasayaat no kasano ti kinatalgedda ken no rumbeng a panawanda ti lugan nga awan peggad.
No panawanda ti lugan, ipasigurado a nakakandado ken itugot dagiti napapateg a bambanag.—O