Makumikom ni Liza iti “Darna”
M AYSA ni Arjo Atayde kadagiti naapektaran iti napasamak nga aksidente iti NAIA itay nabiit. Adda nayiskediul a pabuyana iti Naga City. Gapu iti ayatna a matungpalna ti pabuya, inkeddeng daytoy ti agbiahe babaen ti bus. Ti alas tres iti malem a pabuya, natungpalna iti alas siete iti rabii.
Saan met a nasayang ti panaguray dagiti fans ta nangato met ti enerhia ni Arjo iti laksid a nabambanog iti biahe.
Kinapudnona, kalpasan ti pabuya, dagus met laeng a nagsubli iti Manila ni Arjo ta adda trabahona iti kabigatanna.
* * * Iti napalabas a 2nd Pista ng Pelikulang Pilipino, ti pelikula a “Pinay Beauty” nga improdius ti Quantum Films ti sinuportaran da agassawa a Jericho Rosales ken Kim Jones.
Saan nakakaskadaaw ta ni Jericho ti agparparang a paborito ti nasao a production outfit.
Ni Echo ti bida iti “Girl in the Orange Dress” a pakisalip ti Quantum Films iti 2018 Metro Manila Film Festival. Kakaduana ditoy da Ria Atayde ken Jessy Mendiola.
Kabayatanna, nakaay-ayat a makita ti asmang da Jericho ken ti asawana a ni Kim ta kasla agnobioda laeng.
* * * Kalpasan ti panaggibus ti teleserye a “Bagani,” makumikom met ita ni Liza Soberano iti shooting ti pagbidaanna a pelikula a “Darna” nga idirehe ni Erik Matti.
Itoy a gundaway, saan a ni Enrique Gil ti makapareha ni Liza iti nadakamat a proyekto.
Kabayatanna, aginana ni Enrique ta napalalo kano ti iliwna iti pamiliana.—O