Kudeta (26)

Kasla nasulnot dagiti mata ti Presidente a nakakita iti ladawan nga adda dita. Ni Madam Rose, ar-arakupen ti maysa a natayag ken nabisked a lalaki.

Ti Napalabas: Pinanggep da Edgar a butbutngen ni John ngem pinarmek ni John dagitoy. Kayat ni John nga ikkan iti pagnakmanna ni Edgar. Sinerrekna iti kuarto daytoy iti hotel. Nadiskarkulona ti kabaelan ni Edgar ket naisagmak koma no saan a dimteng da Daniel. Nabuya ni Loida ti naiparang a ladawan dagiti nangbomba iti Luneta ket nagapada ken Daniel. Pinagpanaw ni Loida ni Daniel. Napan sinabat ni John ni Gloria Sarandi iti LIA. Intarusna iti hotel. Nadlawna a gargarien ni Gloria isu a bimmaba ket kinasaritana da Daniel ken Jerky. Impudno dagiti dua nga isuda ti nangbomba iti Luneta. Dida ammo, addan nangkidnap ken ni Gloria. Innalada ni John iti kuerpo ti polisia ket inimbestigarda. Insardengda laeng idi dumteng ni Rommel. Inawagan dagiti nangkidnap ken ni Gloria. Dumawdawatda iti sangapulo a milion a pisos a ransom. Impakammona daytoy ken ni Mr. Bosworth ket imbilin daytoy ti panangiruarna iti pangsakana ken ni Gloria iti pundo ti CIA. Kabayatanna, napatayen da Edgar ni Eddie Quirino ken dimmanonen daytoy iti Presidente ket kayat ni Pat nga ibabawina ti ipapanna iti Ilokos. Napan sinabat ni John ni Ricky Ramirez iti LIA. Sinurot ida ni Craig Stewart, maysa kadagiti kameng ti CIA nga agpangpanggep a mangpatay iti Presidente. Napan da John iti banko tapno mangiruarda iti kuarta ngem agkedked ti manedier a mangted. Iti met hotel da Daniel ken Jerky, kinatok ida dagiti armado a lallaki.

N(Maika-26 a Paset) AKAUL-ULIMEK ti manedier ti banko a nangmatmat iti monitor ti computer. Pinarimrimanna ni Ricky a nakatugaw iti lobby sa isublatna ni John Villa a kasla alusiisen. Idawdawatna a tumaliaw la koma ti guardia ngem nakumikom met a mangpaspastrek kadagiti kustomer nga agserrek. Sangkataliawna met ti nadusol a paltog iti siket ni John. Agtigtigerger dagiti ramayna a nakapatay iti keyboard.

Madamdama pay, nagparang ti inur-urayna a code. Sekreto a katulagan ti bankoda ken ti maysa a nalimed nga organisasion nga ag-withdraw iti dakkel a kantidad iti kanito ti emerhensia. Naglogout a dagus ti lakay.

Timmakder ti lakay sa sinaludsodna: “How do you want that ten million, Mr. Villa? Big or small denomination?”

“Kasapulak ti sagsasangagasut a nareppet a sagsangapulo a ribu... Sikan ti makaammo no mano a kareppet ti dadduma,” kinuna ni John. “Can you give us an hour?” Nagwingiwing ni John. “Thirty minutes, Mr. Lacson... thirty minutes...” “We can’t do that fast...” “Mabalinko nga iserra daytoy a banko, Mr. Lacson... tapno pagtitinnulonganyo... your choice...” Immanges iti nauneg ti manedier sa kinuna: “Padasenmi...” “Aramidenyo,” nakabilbileg ti timek ni John. Kinitana ti relona. Iti panagkunana, no maatrasda man, sangkabassit laeng. No agkiddaw iti sumagmamano a minuto a pawayway, umannugotda met ngata.

Kinapudnona, awan rantana a mangited iti dayta a sangapulo a milion a pisos. Wayawayaanna ni Gloria nga awan ti kasukatna a kuarta.

NAGKATOK manen ni Dario iti ridaw. “Room service...” inyawagna. Naguray iti sumagmamano a kanito ngem awan nanglukat iti ridaw. Liningayna ni Edgar nga adda iti likudna. Sangkataliaw met dagiti dadduma a kaduada ti pasilio. Kayatda a siguraduen nga awan ti makakita kadakuada. Nadisable-da itayen dagiti CCTV.

“Awan sa ti tao, boss,” kinuna ni Dario a nangtaliaw ken ni Edgar.

“Toktokem pay maminsan. No awan pay la manglukat, kugtaramon ‘ta ridaw,” imbilin ni Edgar.

Naminsan pay a nagtoktok ni Dario, sa impigpigsana ti bosesna: “Room service!”

Awan ti naurayda. Kinugtaranda ti ridaw. Nailukat. Ngem sakbay a nakastrekda, sinabat ida dagiti sumanengseng a bala nga impugso dagiti umel a paltog. Nagpakleb dagiti dadduma a tao ni Edgar iti datar idinto a pimmideg iti diding dagiti dadduma. “Daniel! Jerky!” inyawag ni Edgar a nakapideg iti diding. “Agawidkan, Edgar! Baybay-annakami... sakbay nga adu ti matay...” insungbat ni Daniel.

“Ammom no asino ti matay, Daniel! Saan a siak. Saan a dagiti taok. Dakayo ti napalawlawan. Awan ti pagtarayan wenno paglemmenganyo!” Nagkatawa ni Edgar. “Pudno a saannakam’ nga am-ammo, Edgar...” “Am-ammoka! Nalastogka! Nagpaayka laeng bassit iti Special Action Force, paglastogmon, longat!” “Adu ti terorista a pinatayko idiay Mindanao, ket sika?” “Fuck you! Nagasatka laeng ta nairana a sika ti innala ni heneral a hitman-na! Ngem no ipagarupmo a nalalaingka ngem iti siak, nagbiddutka!”

Nagkatawa ni Daniel. “Iti kina-Scout Ranger-mo, adda kadin napataymo a kabusor? Amangan no uray maysa, awan!” Napigpigsan ti katawana.

Kellaat a timmakder ni Edgar. Agririaw a nangpaltopaltog iti karkulona a paglemlemmengan ni Daniel.

Nagkatawa manen ni Daniel. “Ala, wen, adda napataymo no adda. Ngem siguradoak a dagitay awan a pulos gawgawayna. Dagitay inosente... Kasta kadi ti Scout Ranger?” Nagpaggaaken ni Daniel. Kayatna a suronen ni Edgar tapno mapukaw daytoy ti simbeng ti panunotna ket manayonan ti gundawayda a makalibas ken Jerky.

“Sumardengka!” inriaw manen ni Edgar. Pinaltoganna manen iti disso a paggapgapuan ti timek ni Daniel.

“Malaksid nga asoasonaka ni general ken kasla robotka a paggargarawenna, awankan, Edgar. Awan serserbim. Iggem ni general ti tengngedmo. Mabutengka kenkuana. Uray gerretem ti tengngedko no di agpayso ti kunak!” “Uray met sika!” Malasin itan ni Daniel ti nagpaiduma a suron ni Edgar. Ket inyad-addana pay a suronen. “Ngem nawayaankon! Sika, saan!”

Pudno a makapungtoten ni Edgar. Liningayna ni Dario a nakapakleb iti datar. “Darupem ida, nalawag?” immandarna.

Nagkusipet ni Dario a nangkita ken ni Edgar. “Boss...” adda panagkedked iti timekna. “Nangngegnak, saan? Dumarupka, kunak!” “W-wen, boss...” kinuna ni Dario a mabutbuteng. Dina pay nalipatan ti panangdisnog ni Edgar kenkuana iti bar ti hotel a nagtarusanda. Nagmaga ti karabukobna.

“Bumilangak iti tallo, apaman nga agpaputokkami, tumarayka a sumrek, maawatam?” kinuna manen ni Edgar.

Natung-ed ni Dario, ngem agbebessagen. Am-ammona met da Daniel ken Jerky a kas iti pannakaam-ammona ken ni Edgar. Sharpshooter dagiti dua. Manmano nga agmintisda no pumaltogda. “Maysa... dua... nakasaganakayon?” “Wen, boss...” dandani naggigiddan dagiti taona a simmungbat. “Tallo!” Nagbusi dagiti paltog da Edgar ken dagiti kaduana ngem awan masnop a puntiriada. Kumanakraas dagiti alikamen, diding, appliances, ken no ania pay ditan a mapuntaan. Timmakder met ni Dario. Timmaray a simrek iti kuarto.

Nagkul-ob da Daniel ken Jerky. Agtudon ti bala iti yanda ket masiguradodan a desidido ni Edgar a mangipakni kadakuada. Ngem nasiput ni Jerky. Iti panangrugi ti panagtudo ti bala, nasiputanna ti maysa kadagiti tao ni Edgar a timmakder. Agpalpaltog a simrek iti kuarto. Saanna nga insina dagiti matana iti daytoy. Ket idi nalawagen a makitana daytoy, pinaltogannan. Nakusbo ti lalaki iti nakarpetan a suelo. Kellaat, nagulimek dagiti paltog. “Dario,” nangngeg dagiti aggayyem ti pukkaw ni Edgar. “Ania ti napasamak?” “Napuntaannak,” insungbat ti lalaki. Agas-asug. “Matayak san!” Saan a nagtimek ni Edgar. Ginundawayan dayta ni Daniel. “Edgar,” impukkawna, “nalaka laeng a paltogak ti tao ta nawaya a makitak. Ngem ikkanka iti gundawaymo a mangisalakan. Palubosanka— sika wenno maysa kadagiti taom— ti umay mangala iti taom... Saandakayo a paltogan. Ngem pumanawkayon, bayandakamin!”

“’Ninam!” inriaw ketdi ni Edgar. “Iti inaramidyo, namnamaem nga ipalubosko pay a makalasatkayo?”

“Boss, tulongannak! Diak pay kayat ti matay!” inyararaw ni Dario.

“Sumardengka,” imbugkaw ni Edgar iti taona; saannan a masneban ti pungtotna, “no dimo kayat a siak ti mangpaltog kenka!”

Pinakayaban ni Daniel ni Dario. Nagdisso ti bala iti diding nga asideg ti ulo ni Dario.

Nagkatawa ni Daniel. “Ops! Nagasat ti taom, Edgar, ta nagmintisak! Diak la sigurado no agkibaltangak pay iti sumaruno!”

Ad-addan ti suron ni Edgar. Uray tiptipdenna ti irarasok ti darana, dina magawidan. Nalastog a talaga daytoy a Daniel!

“Maibusen ti anusko, Edgar... Ikkanka pay maysa a gundaway. Umaymo alaen ti kaduam... Saandaka a paltogan. Ngem panawandakami. Deal?” “Boss, pangngaasim, tulongannak!” kinuna manen ni Dario. Kellaat nga adda pimmaltog. Naudatal ni Dario. Madamdama, simkilen.

Nakigtot ni Daniel. Uray ni Jerky nasdaaw. Dida ipagarup a kabaelan ni Edgar nga isakripisio dagiti taona.

“Nasungbatak kadin ti saludsodmo, Daniel?” agtigtigerger ti timek ni Edgar gapu iti pungtot.

“Agmauyongkan, Edgar! Papatayem ti bukodmo a tao? Agpadakayo laeng ken ni general!”

“Managinkukunaka, Daniel, no ibagam a dimo maitured nga aramiden ti inaramidko! Ngem ita, awanen ti rason a makalibaskayo pay. Maibaleskonton ni Dario inton bagkatenda ti bangkayyo nga ipanaw ditoy!”

Nagkinnita dagiti aggayyem. Ammoda nga awan pagtarayanda. Ken saan a makaanay ti balada a makiranget kadagitoy a death squad ti heneral.

Nagdalupakpak ni Jerky iti datar. Nagsanggir iti sofa a naglingedanna. “Ania itan?” sinaludsodna ken ni Daniel.

Timmulad ni Daniel a nagdalupakpak iti datar. “Agurayta, ania pay. Ngem makigasanggasatta. No matayta met laeng, masapul nga ad-adu ti irisangta a biag tapno maksayan ti managdakdakes iti lubong.”

Nagkatawa ni Daniel iti nakapuy. “Biddut ti napilita a pagsapulan...”

Nagkatawa met ni Jerky. “Agtungpalta la ketdi iti purgatorio... Sabagay, purgatorio metten ti inaldaw a panagbiagta...” Idi kuan, adda nalagipna a limmawagan dagiti matana. ”Apay a dimo awagan ni John?” kinunana. “Makumikom iti panangsakana ken ni Mayor Sarandi...” “Ngem kasapulannata... Matulonganta a mangispal ken ni Mayor Sarandi, matulonganta a mangsapul ken ni Melanie Davis, ken, kangrunaanna, matulonganta a mangatipa iti kudeta.”

Nagmalanga ni Daniel. Apay ketdin a saan? nakunana nakemna. Awan met mapukawna no saan man nga umay. Inruarna ti selponna.

NAKATALTALNA ni John a nanguray ken ni Mr. Lacson a mangul-ulod iti adda ligayna a maleta. Inyawat a dagus ti manedier ti banko ti maleta idi makaasideg. “Sangapulo a milion a pisos dayta, Mr. Villa,” kinuna ti manedier. “Mabalinmo a bilangen...”

Immisem ni John. “Agtalekak kenka, Mr. Lacson. Ken agyamanak iti tulongmo,” kinuna ni John. Timmallikuden. “Mr. Villa...” inyawag ti manedier. Timmaliaw ni John. “Inton maminsan, mabalin a mangiruarka iti kasta ti kadakkel, mabalin nga agpakaammoka uray maysa laeng nga aldaw sakbayna?”

Immisem ni John. “No isu ti pagayatam, Mr. Lacson... Naimbag nga aldawmo,” kinunana ket intuloynan ti rimmuar iti opisina ti manedier.

Timmakder met ni Ricky iti pagtugtugawanna idi masaripatpatanna ni John. Sinabatna ti gayyemna sa indiayana ti panangguyodna iti maleta. Inted ni John ti maleta.

Apagisu nga agkiriring ti selponna. Ti pardas ni John a nanguyos. “Hello...” insungbatna. “Manong John...” malasinna ti timek. Ni Daniel. “Masapulmi ti

tulongmo.” “Tulong?” “Naammuan da Edgar ti yanmi. Napupokkamin.” “Yanyo?” “Iti hotel a dati a nagtarusanmi.” “Naglokokayon. Naisagmakkayon iti naminsan dita sa nagsublikayo pay laeng? Kayatyon sa ketdi ti matay... Numona ta adda papanak. Ania a kuarto ti yanyo?” ”Room 326...” “Umaykamin...” “What happened?” sinaludsod ni Ricky idi ibolbolsan ni John ti selponna. “Adda laeng inta dagasen...” “Okey.” Kinita ni John ti relona. Alas dose kinse iti malem. Saan met ngata nga umawag ti nangkidnap ken ni Gloria sakbay a makagtengda iti hotel.

Awan trapik ket alisto laeng a makagtengdan iti hotel a yan da Daniel ken Jerky. Awan makita ni John a lugan ti polis ket iti panagkunana, di pay nadlaw ti hotel ti kaadda ti riribuk a mapaspasamak iti uneg. Mangipakita a biniangan da Edgar dagiti CCTV ti pasdek isu nga awan pupuot dagiti seguridad ti hotel.

NAILUKAT ti ridaw. Nakaparpardas ni Pat Coloma a nagturong iti yan ti Presidente a makumikom a mangrebrebisar kadagiti adu a papeles iti lamisaanna. Immangad ti Presidente. Madlaw ti pannakakigtotna iti kellaat nga iseserrek ti gayyemna. Naparasaw ngem di met makaunget. Immisem ketdi. “Simrekka lattan a di man laeng nagtoktok...” kinunana.

Indisso ni Pat Coloma ti folder nga iggemna iti lamisaan ti Presidente. “Kitaem dayta... Intel report manipud iti PNP ken Philippine Army. Naggapu ken ni Gen. Manzano...” Ti PNP Chief ti ibagbagana.

“Awan ti panawenko nga agbasa... Ibagam lattan no ania dayta...”

“Gapu iti pannakaammo dagiti tao iti speaking engagement-mo iti Ilocos Norte, nagtitimpuyog dagiti organisasion a komonkontra kenka nga agturong sadiay tapno mangisayangkatda iti demonstrasion.” “Karbenganda dayta.... basta saanda a mangparnuay iti gulo.” “Ngem iti pannakatay ni Bokal Eddie Quirino, adu la ketdi dagiti lokal nga aktibista ti makikadua iti demonstrasion.”

“Kas kunak, karbenganda dayta... kas makipagili iti demokratiko a pagilian.”

“Ket kasanon ti damag a panagpipinnaltogda iti dua a nalalatak a hotel sadiay? Dimo kadi manen patien nga adda pannakainaigda iti kunkunak a kudeta? ““Saan kadi pay nga inasikaso ti PNP?” “Samman.” “Ket ania pay laeng ngarud ti pakarikutam?” Immanges iti nauneg ni Pat Coloma. “I want you to cancel your trip to Ilocos Norte, Nelson...” addan tangken iti bosesna. Bigbigenna a Presidente ti kasarsaritana, ngem agsasao ita a kas maysa a gayyem.

Nagkatawa ti Presidente. Ginammatanna ti Crown Royal a naiparabaw iti lamisaanna. Pimmidut iti baso sa kinargaanna iti arak. Inyawatna ken ni Pat Coloma. “Ne, uminumka ket nerbiosoka unayen,” kinunana.

Minatmatan ni Pat ti gayyemna. Inawatna met laeng ti baso idi agangay. Ininumna amin ti nagyan ti baso. Nagpormal. “Agpakpakaasiak, Mr. President... no dimo kayat nga ibabawi ti

papanmo idiay Ilokos, kiddawek a yaludodmo...”

“Saanen a masapul. Call the commander of the Armed Forces of the Philippines. Kasapulak ti sangabatalion a soldado a manglawlaw iti kapitolio.”

“Pagbalinem a kasla garison dagiti soldado ti kapitolio?” “Ket no madanaganka met unay...” Napasennaay laengen ni Pat. “Natangken latta ti ulom...”

“Seriously, Pat... Sumagmamano a soldado laeng ti kasapulanta a mangguardia iti aglawlaw ti kapitolio. Nakapaisano ken nakauniporme a polis... Daytay makaanay laeng a mangsalaknib kaniak no kaskasano. Tapno agsardengkan iti dandanagmo.”

Immanges manen iti nauneg ni Pat. “Ngem agaramatka iti bullet proof vest...”

Imlek ti Presidente. “Ket anianto ti sawen dagiti kameng ti prensa? Sigurado a pagkakatawaandakto. Iti bukodko nga iturayan a pagilian, mabutengak a sumango kadagiti tattao... Saan met ngarud a mabalin daytan... Maysa pay, kabaelandak a salakniban dagiti seguridadko.”

“Ngem ti biagmo ti pagsasaritaan ditoy. Ken dakkel pay a pakarikutan dayta.” Kinita ni Pat Coloma ti folder. “Ania manen ti sasawem?” “Intuloymo kadi a kinasarita ni Madam Rose?”

Minatmatan ti Presidente ni Pat. “Wen... Apay, aya?”

“Shit...” saanen a nagawidan ni Pat Coloma ti nagdayamudom. “Imbagak kenka idin a sumapulka iti sabali a pagpalpaliwaam ta delikado... Any foreign spy can pick up your conversation with that woman... ket makaanay nga aramatenda a pang-blackmail kenka.” Saan a nakauni ti Presidente. “Kitaem ti linaon dayta a folder... “kinuna ni Pat. Di pay napukaw ti luksaw iti ayugna.

Saan a nagun-uni ti Presidente ngem napukaw ti ganaygayna. Pugpugtuanna ti linaon ti folder. Indissona ti basona. Pinidutna ti folder. Dina ammo ngem kasla mariknana ti panagtigerger dagiti imana. Naminsan pay a liningayna ni Pat Coloma. “Iti maudi a panid...” kinuna ni Pat. Linukipna ti folder. Kasla nasulnot dagiti matana a nakakita iti ladawan nga adda dita. Ni Madam Rose, ar-arakupen ti maysa a natayag ken nabisked a lalaki.

Asino daytoy a lalaki? nasaludsodna iti bagina. Espia?

(Maituloyto)