Saludsodem ken ni Apo Hues
SALUDSOD:
Ni Oscar (parbo a nagan) nga anak a lalaki ‘toy gayyemko, nakiasawa ken ni Azon (parbo a nagan) ket naaddaanda iti tallo nga annak. Kalpasan ti sumagmamano a tawen, pinanawan ni Oscar ni Azon ket inkabbalayna ni Brenda (parbo a nagan) ket naaddaanda met iti dua nga annak. Manen, insina ni Oscar ni Brenda ket inkabbalayna ni Charisse (parbo a nagan) a kaopisinaanna. Nagdennada iti dua a tawen ngem awananda iti anak. Idi napan nagpasiar da Oscar ken Charisse idiay Boracay, naatake iti puso ni Oscar ket natay.
Ita, kaap-apa ti legal nga asawa ni Oscar dagiti dua a kinabbalay ni lakayna no papanan dagiti nabati a sanikua ni Oscar. Salsaludsoden met ‘toy gayyemko (ina ni Oscar) no adda met bingayna iti nabati a sanikua ti anakna. Tulongam man ‘toy gayyemko, Apo Hues. Dios unay ti agngina.--Mercedita ti Ilocos Sur
SUNGBAT:
Adda iti Kodigo Sibil ti Filipinas ti maipanggep iti panagbibingay iti sanikua ti natay nga asawa. Segun iti Artikulo 995 agingga iti 1002, kunana a ti nabati a nabiag a naikasar nga asawa (ni Azon), kagudua ti bingayna kadagiti nabati ti pimmusay (daga, balay, kuarta, lugan, kdp.) ket dagiti annakna, pagbibingayanda met ‘diay kagudua— agpapada iti bingay dagiti annak.
No adda “anak/annak iti ruar” ti pimmusay, kastoy met ti bingay ti mapan iti nabiag nga asawa, kakapat, kas iti bingay dagiti lehitimo nga annak. Ket ti apagkapat, pagbibingayan met dagiti “annak iti ruar.” No awan dagiti annak iti ruar, kagudua koma ti mapan iti nabiag nga asawa ket kagudua met ti pagbibingayan a parepareho dagiti legal nga annak, kas nasaon. Ngem gapu ta adda met “annak iti ruar,” maibingayanda met iti tawid manipud iti sanikua ‘diay natay. Dagiti dua a girl friend ti pimmusay, awan ti bagida.
Ket iti met saludsod ti gayyemmo (ina ti pimmusay), maibatay iti daytoy a kaso, sagudayen met laeng ti Kodigo Sibil nga awan ti bingayna. Ngamin, no nakiasawan ti anakna, babai man wenno lalaki, naikkaten iti poderna ti anakna.—O
(Adda kadi problemayo a legal? Ipatulod iti: “Saludsodem ken ni Apo Hues,” c/o Judge Joven F. Costales (Ret.), 51 E. Rimando St., Brgy. Natividad, Naguilian, 2511 La Union. Wenno ipatulod babaen ti e-mail iti: jov_cos@yahoo.com wenno iti bannawagmagazine.mb@gmail.com. Ilanadyo koma ti kompleto nga impormasion wenno banag a mainaig iti problemayo.)