Siled ti Kararag

Bannawag - - Itoy A Bilang - Ni PAMELA ROSALES ti Oregon

Basaentayo ti Proberbio 3:27-29

Liklikam ti kinadakes ket magnaka iti nalinteg a dalan. Dika sumiasi iti tumutop a pagnaan.—Proberbio 3:27

NAOPERAR ni Bill a gayyemmi. Maisaruno koman a dagus ti radiation treatmentna. Ngem ketdi, namindua a naipan iti emergency room ket kasapulanna ti lumasat iti lima pay nga operasion. Babaen ti email, kiniddaw ni Julie nga asawana ti pannakaikarkararag ni Bill ken impadamagna ti pagdurdur-asan ti kasasaadna. Inaldaw nga agmaneho iti adayo iti ipapanna iti ospital, ket inasikasona dagiti pakseknan ti seguro, ti kasapulanna iti ospital ken dagiti dadduma pay a masapul a mataming. Idi agangay, napaksuyan ni Julie.

Kalpasan ti pannakabasak ti naudi nga email-na, sinaludsodko iti Dios, “Kasano a makatulongak?” Pagamammuan, adda immapay iti panunotko: Saludsodem ken ni Julie no kayatna ti makipagyan ditoy balaytayo. Simmaruno a napanunotko: No agyan daytoy iti balay dagiti gagayyemna. Imbagak daytoy ken ni lakayko, ket nagdesisionkami nga idiayami kenkuana nga agyan iti balaymi. Idi makasaritak ni Julie, nagsangit ket kinunana, “Kaibagbaga kaniak dagiti gagayyemko a mapanda agbakasion. Isu a kunak a kasapulak ti pumanaw iti balayda.”

Adun ti nangngegak a padas dagiti tattao no kasano a narisut ti panagkasapulanda iti maitutop a tiempo. Masmasdaawak latta ket kunkunak iti bagik: Kasano a napasamak dayta? Iti daytoy a napasamak kadakami, napigsa ti riknak a mangawis ken ni Julie a makipagyan kadakami a kas man ti Dios ti agsasao iti napigsa a timek.

Adu ti wagas ti panagtrabaho ti Dios, kas met laeng ti kaadu ti tattao a nakasagana nga agtignay nga agtulnog iti panangiturong ti Dios. No tignayennatayo ti Dios a tumulong iti maysa a tao, alaentayo ti amin a gundaway nga agserbi kadagiti adda iti aglawlawtayo.

Kararag: Ipatpategmi a Dios, ipakitam kadi kadakami dagiti tattao a makasapul iti tulongmi ita nga aldaw, ket ikkannakami iti tured nga agtignay. Amen. Kapanunotan: Ania ti inted ti Dios kaniak a mabalinko nga ibinglay iti sabali a tao? Ikararagan: Dagiti pamilia a sumangsango kadagiti pakaseknan ti salun-at ken panagpaagas.

(Naadaw iti Siled ti Kararag, Paguummongan ti Sangalubongan Tapno Agkararag, Septiembre- Oktubre 2018 a bilang. Impablaak ti Discipleship Resources-Philippines. Sarungkaran ti http://discipleshipresourcesphilippines.com wenno ag-e-mail iti drphilippines@gmail.com.)

Newspapers in Tagalog

Newspapers from Philippines

© PressReader. All rights reserved.