Lalaki Latta ti Kayat ni Meg
MAYSA ni Meg Imperial kadagiti bida iti “Abay Babes” a naipabuya nangrugi iti daytoy Septiembre 19 a mabalin nga ibaga nga agarup perpekto ta napintas, nalinis, ken nalaing iti diskarte. Ngem umisu kadi nga abay no ti akemna met ket lakien?
Inako ni Meg a narigat nga akmen ti lakien nangruna ket naulimek dagitoy. Naimbag laeng ta adda pagayamna a lakien a nagbasaranna iti panagaktingna. Malaksid iti daytoy, imbalakad ni Direk Don Cuaresma a tuladen ni Meg ni Jake Zyrus a sigud a Charice.
Ti nakaay-ayat iti pelikula, uray no lakien ti akem ni Meg, pinagsuotda latta iti two piece. Kuna ni Meg a daydiay ti comedy-na. Ne!
Iti saludsod no posible kadi nga agayat iti lakien ni Meg, kuna daytoy nga adayo a mapasamak. Kaykayatna kano latta ti lalaki.
Kabayatanna, kakadua ni Meg iti nasao a pelikula da Roxanne Barcelo, Kylie Verzosa, Nathalie Hart ken Cristine Reyes iti panangiprodius ti Viva Films.
* * * Ni Bryan Revilla ti bida iti episode a “Virgo” ti pelikula a “Tres” a pagkakaduaanda kada Carla Humphries ken Joey Marquez, iti panangidirehe ni Richard Somes. Dagiti met kakabsatna a da Jolo ken Luigi ti bida iti dua a sabali pay nga episode ti nasao a pelikula.
Nakaay-ayat ta adda gayam bersion daytoy a full-length; nayababa laeng iti 35 a minuto para iti daytoy nga antolohia a “Tres.” Mangnamnama ni Bryan nga addanto gundaway a maipabuya ti full-length a pelikula.
Segun iti trailer ti “Virgo,” nakaddidilalw a kaing-ingas ni Bryan ni Bruce Willis iti pelikula daytoy a “Die Hard.” Ammo kadi ni Bryan dayta?
Kabayatanna, maipabuya ti “Tres” iti panangidirehe ti Imus Productions ken iwaras ti Cine Screen (Star Cinema) mangrugi iti daytoy Oktubre 3.—O