Apay a Naliday Dagiti Daniwmo?

Saan laeng a siksika ti agsalsaludsod no apay nga adda saem, nga adda sainnek a di kabaelan nga ilemmeng dagiti balikas; uray dagiti palatang dagiti niog, dagiti aringgawis ti sarguelas ken salamagi iti likud ti inaladan, dida kabaelan a tagikuaen, a bukodan ti saplit ken ranggas ti nakaparsuaan... Napateg ti panagpinnakada, naragsak wenno nasaem man. Nasaysayaat no adda panangrikep, ngem ti awan... Naminribu nga insuratko a diakon kayat ti agdaniw pay, a diakon kayat ti maikulkuleng, ti makipimpinnerreng iti diding, iti bobeda, iti awan. Ken saan kadi a kunada pay a ti biag ni mannaniw bin-ig a pannakapaay? Kunam: “Iti panangbasak iti daniwmo, diak mapupuotan ti agsainnek iti panagaribasay dagiti luak a mangbabasa iti basbasaek...” Balonko ti adu nga arapaap, pinanawak ti Teppang nga ikutko ti rimat dagiti mata, ti sutil nga isem, isuna, nga inay-ayatko iti awan mulitna nga ayat, kas iti kinasin-aw ti linnaaw, iti kinapuro ti ubbog idiay Ared-ed, iti panangbirok iti gatad ni nam-ay a katukadna... Kunada a ti gasat saan a naiparparna laeng; ketdi, isu ti kayat! No kayat, apay ngarud a napasamak kenkuana ti napasamakna? Kinayatna kadi nga agsagabaak? Ammok, adda maim-impen a sakit ti nakem, ngem kasano koma ti panangitedko iti awan kaniak? Agsakdoak iti pigsa iti bubon ni lagip a nabunubonan iti siit; intukit ni L., ni C., isuda amin nga inay-ayatko. Kayatko ti mawayawayaan, ti agampayag: Daliasatek ti kasla awan pagnguduanna a taaw, kas iti panaglayag dagiti ulep iti kasla awan paggibusanna a law-ang.