SAN NICOLAS, ILOCOS NORTE.
Naangay ti “37th Quiz Show and the 10th Saririt Cultural Festival Regional Competition” idi Enero 12, 2019 iti San Nicolas Elementary School, San Nicolas, Ilocos Norte iti panangisponsor ti University of the Philippines Namnama, grupo dagiti estudiante nga Ilokano iti University of the Philippines. Nakisalip ditoy dagiti agad-adal iti elementaria ken junior high school iti panagkanta iti Ilokano, bukanegan, deklamasion iti Ilokano ken Ingles, panagbitla iti Ilokano ken Ingles, kannawidan a sala, kdp. Nagpaay a hurado dagiti sumagmamano a kameng ti GUMIL (Gunglo Dagiti Mannurat nga Ilokano) Ilocos Norte kadagiti dadduma a salip. Adda iti ladawan da Ian Paolo Tajorda (kakanigidan) ken Joshua Nalundasan (kakanawanan) ti UP Namnama, ken da (agpakanawan) Regine dela Cruz, Mario Tejada, Leonora R. Melchor, ken Leilanie Adriano. Saan a nairaman iti ladawan da Daniel Nesperos ken Anna Liza Madayag Gaspar a nagpaay pay a hurado, ken ni Joel B. Manuel a maysa kadagiti nagsarita iti seremonia ti pammadayaw.