Tips
“Tiklopenyon,” impukkawko kada Elmo ken Idrong idi diakon magawidan ti imonko. Simmang-atkami.
Sinabatdakami dagiti babbai. Siniggawatda ti alatmi ken Bebbeb. Agkulkulibagtong dagiti bunog ken kampa. “Kuak daytoy, kuak dayta!” nagiinnagawda. “Naimas daytoy ta nalukmeg ken dakkel ti ulona!” Pinetpetan ti maysa ti kadakkelan a kampa ket dinan pinalusposan.
Binaonko ni Idrong a nangayo. Nangisagana ni Bebbeb iti tagaang. Nangaramid ni Elmo iti pagtudok kadagiti matuno. Nangkaliak iti bubon. Inarasawko ti bagas a balonmi.
“Mangalakayo,” indiaya dagiti lallaki iti sangsanguenda a serbesa. “La ketdi, Dios ti agngina,” insungbatmi. Naglalanglangda a nangan. Simminakami. Namikki dagiti babbai ta isiitanda ti kasla kikit a bunog. Apo met ti panagipapel ti Amerikano a kasla idi laeng a makaraman iti lames. Panay ti panangsubo ti Intsik ken ni Luzviminda. Agkaplatoda pay. Simriam ti barukongko. Idi uliten latta ti Intsik, timmakderak. Ginammatak ti rupana. Naiparusisi iti kadaratan. Nagiiriag dagiti babbai. “Isunan!” Nagbitinan ni Luzviminda ti takiagko. “Intayon,” inseniasko kadagiti kakaduak. Inalikumkomda ti udaod. Pinagsukatko ni Luzviminda. Pinanawanmi dagiti kagungluanna.
Pinaunak da Elmo, Edrong, ken Bebbeb. Nagabaykami ken Luzviminda. “Aniat’ relasionyo iti daydiay?” inusisak. “Awan.” “Apay nga’d kasdiaykayo?” “Kastakami ngamin no kua…” “Hus,” ginuttak ti imana, “ibagamon no nobiom!” “Andres,” kinunana, “agpayso nga agnobiokami ken ni Tony Chua ngem awan ti riknak kenkuana. Ti laeng kuartana ti kayatko. Isu ti pangal-alaak iti gastuek nga agbasa.” Napanak naginum iti tianggi ni Celia. “Nabayagka a di immayen,” kinuna ni Celia. “Adut’ trabahok,” inlibakko. Nagorderak iti arak. Intumbak ti guduat’ baso.
“Aniat’ pagbarbartekam?” dinamagna. Iniggamak ti imana. Agpadada ken Luzviminda a nalamuyot nupay napugpugot ni Celia.
“Sika,” minatmatak ti nalanay a rupana. Napintas man daytoy a kayumanggi. Inawidko ti gemgemna sa indennesko iti bibigko. Kinuddotnak. Nangitangadak manen. Ngem naliblibnos ni Luzviminda, intanamitimko.
Napanak iti parke. Nalamiis ditoy. Isunto koma ti asawaek, nakunak. Napintas a talaga.
Nagpasiapasiarak iti parke iti tuktok ti bassit a bantay. No addaka ditoy, makitam ti sibubukel a Bangued ken dagiti duapulo ket siam a bariona a pakairamanan ti Dumanay. Kasla uleg ti Karayan Abra a kimmawiwit iti bakras ti Bantay Bullagaw.
Adu ti tao ditoy parke. Kasla bassit a Luneta. Adu dagiti asmang iti sirok dagiti pandek a bayabas. Immapalak. Inlunodko ti Intsik a puon ti nagginnuraanmi ken Luzviminda.
Laslasinek dagiti tao ta no adda am-ammok, awisek a mapan aginum iti tiendaan ni Celia.
Napanak iti burayok iti makanawan a bangir ti bulto ni Apo Victoria. Binuyak ti panagpangato ken panagpababa ti danum. Iti sirok ti pandek a bayabas, adda sangaasmang nga agin-innapungol. Atiddog ti buok ti babai. Immasidegak. Agbisbisongda. Ni Luzviminda ken ti Amerikano a presidente ti SCA!
Diak napupuotan ti luak. Ania daytoy a babai, nagriaw ti unegko. Sugsugpon! Sugpon dagiti Intsik ken Amerikano! Luzviminda!
Timmallikudakon.—O