Showbiz
AGRIRI ni Robin Padilla, ‘bagis, gapu ta adda mangibagbaga nga iboykotda ti pagbidaanna a pelikula maipapan iti kabibiag ni Gen. Ronald “Bato” Dela Rosa.
Am-ammo ngamin a supporter ni Presidente Duterte ni Robin. Kuna ni Robin a saan koma nga ibibiang ti politika. Ti adatna, ad-adda nga im- bash- da. Ta kasano kano a saan a mairaman ti politika no para senador ti akin-istoria iti nagbidaanna a pelikula.
Sabagay.
*** Iti pannakasursurat daytoy, adda pay laeng ni Rhian Ramos iti Amerika nga agbakbakasion.
Adda met dagiti mangibaga a saan laeng a bakasion ti panggep ni Rhian. Wen ta tagasadiay ti baro a boyprenna. Kunada ngarud: Alam na this!
*** Dinawat ti grupo nga Autism Society of the Philippines (ASP) nga isardeng koman dagiti netizen ti “Boyet Challenge” wenno panangtulad iti karakter a Boyet iti “My Special Tatay.”
Kuna ti nasao a grupo a saan a nakakatkatawa ti nasao a challenge no di ket pananglais kadagiti addaan iti autism.
Wen, husto ti ASP, ‘bagis.
*** Ti la maiba- bash ngamin dagiti netizen. Ni met Beauty Gonzales ti nakitada. Linaisda dagiti paskil daytoy a ladawan iti Instagram a kaaduanna iti nakasuot iti bikini ken twopiece.
Ti ketdi makunatayo kadagitoy a manglalais, mabalinda met nga i- unfollow ti account ni Beauty no dida magustuan, saan, ‘bagis?
*** Adu dagiti agsalsaludsod no addan relasion da Jake Cuenca ken Kylie Versoza, ‘bagis.
Masansan ngamin nga agpaskil dagitoy iti ladawanda iti social media a nakadungdungngoda iti tunggal maysa. Agpareha dagitoy iti teleserye a “Los Bastardos.” Ala, ket no pudno man nga adda relasionda, awan met siguro ti dakesna ta baro ken balasangda met, di kadi?—O
(Chairman ni Kabagis Eloy iti Hunta Direktiba ti FAMAS, Host-Producer ti Celebrity Hour Media Forum, ken Trustee iti Aliw Awards Foundation, Inc.—AST)