Netizone
kita!” Kayat manen ti babai nga arakupen ni Martin ngem nagsanud ni Martin a nangiwalin iti ima ti babai. Agiikiisen dagiti kakaduana a babbai iti pannakaray-awda.
Kasla adda nangkeddel iti sellangko. Mabainak metten a mangkita kada Martin ken Jennifer. Imbaw-ingko ti panagkitak kadagiti ubbing nga agdidigos sa pinagpasiarko iti adayo a surong. Iti nagbuksitan ti karayan a dati a kabangkagan a mabalbaluan ngem inin-inut a kinibkibkiban ti danum. Kunkuna dagiti lallakay idi a malasagannanto met laeng ta kasta kano idi ubbingda pay ngem ad-adda met a limmawa. Daydi dati nga agarup tallopulo a metro a danum, saanen a nakurkurang a limapulo a metro ti kalawana. Ita, namulaanen iti nakaad-adu a cottage a gabutendanto inton panawen ti panagtutudo.
Iti karkulok, mamitlon iti dati a kaaduna dagiti cottage. Daddadakkelda payen. Ken kaaduanen ti adda iti medio tengnga ti karayan— saan a kas idi a timmakderda iti nasinged iti igid. Tunggal maysa kadagiti cottage, adda rangtayna a no saan a naaplagan iti sinigpit a tinidtid a bulo, binakul a bulo met laeng. Adda pay dagiti naisangsangayan ti kinadakkelna a naipuesto iti katengngaan ti karayan. No diak mariro, nairanta a pagkakantaan ken pagaayaman ta addaan iti videoke ken adda nakitak a nakaiggem iti ‘tako’ wenno pool cue. Diak laeng sigurado no biliar ti ay-ayamenda wenno pool. Di met mangngeg ti pannakakirat dagiti pitsas wenno bola ta nakapigpigsa met dagiti videoke. Agsasallupang pay ketdi dagiti agkakanta isu nga awan nalawag a mangngeg.
No idasigko ti langa ti karayan iti daydi pinanawak, adayo a napimpintas ita. Kasla maysan a dakkel a resort. Adda pay dakkel a hotel a naipaammimi iti bakras ti karayan iti adayo nga abagatan. Nakaad-adu pay gayam a pagtagilakuan iti makmakan. Kasla pay ketdi mabalin ti agpatpatnag nga agpipiknik ta addada dagiti naimula a kawayan a nagtagisabong iti flood light. Addada barangay tanod nga agronronda. Nakakitaak pay itay iti polis a nagpasurong.
Diakon masdaaw no apay nga adda tinapay a nalako dagiti ubbing a pinaglakok. Iti langa dagiti tattao, adu ti dayo. Alisto a malasin no asinoda. Isuda dagiti nakaringringgor nga agdidigos: agsisinnayyoda ken agtatapuakda iti rangtay a kumamang iti cottage nga inupaanda. Madlaw a magagaranda unay iti disso. Naringgor latta met dagiti tagaditoy ken kadagiti kabangibang a barangay ngem nataltalnada nga amang. Saanda a kas iti gagar, ragsak ken ringgor dagiti sangsangaili ti makita kadagiti ummongda.
Naimbag la ketdin ta immayak ditoy ta nakitak. Napintas sa a talaga ti mangipatakder iti paglakuan iti tinapay. Mabalin pay a pagmeriendaan. Pudno nga adda balon dagiti umay agpiknik ngem no mangidiayaak iti naidumduma, amangan no maawisko ti imatangda. Natiagak idi adda mangkalbit iti takiagko. Ni Martin. “Yam-ammok kenka,” insungo ni Martin ni Jennifer. “Hi!” kinunak. Inngatok ti imak sa winaliwalik. “Hello?” kinuna ti babai. “Siak ni Jennifer… nobiok ni Martin.” Nakais-isem ti babai a nagkuna. Pinagsabetna dagiti pinagtukkolna a tumengna sa binistradna ti gayadan ti nalayak a siurtsna.
Naayatanak iti diarna nupay diak ginusto ti sinaona a nobiona ni Martin. Adda met gayam ilemlemmengna daytoy a lalaki. Kunak man no awan.
“Amor ti naganna,” inyagaw ni Martin. “Kinaeskuelaak iti hayskul.”
“Ar-armem, ala, Martin?” pagammuan ta kinuna ni Jennifer. Tiningiganna ni Martin. “S-saan… k-kayatko a sawen…” “Loko, umadu ti nobiam, a, a dimo ammo no dimo manen maipudno ti ayatmo…”
Diak nagawidan ti di nagapput iti kinuna ni Jennifer. Limmagan pay ti riknak ta naawatakon ti kayatna a sawen. Kayat siguro ni Jennifer ni Martin ngem di met inarem ni Martin.
“Napiliaka a talaga,” kinuna ni Martin a mapilpilpil ti isemna. Kudkudkodenna ti teltelna a kimmita kaniak. “Kakaseraak idi mangal-ala pay iti engineering. Ngem immakar iti kasera idi nag-shift iti Accounting. Padana a CPA dagita kakaduana.” Nakipinnayapay kaniak dagiti kakadua ni Jennifer. “Bro,” kinuna ni Martin iti maysa kadagiti lallaki. “Ibaudmon ket no makakita iti sabali!” Aggargaragak ti lalaki a nangsallabay ken ni Jennifer. Nagsasaritakami la biit sa nagpakadada. Inyawis ni Martin ti idadagasda idiay balayda ngem nagkedkedda. Kayatda kano a subboten ti pinagbayadda. Nadumaduma nga ili ti naggapuanda,