Idi Un-unana a Panawen
saan kadi?” Nagkatawa dagiti dua. “Baluddakan, Acosta!” imbikag ni Anwar. “Ita...” Nagkatawa ni Anwar. “Apay, ar-arapaapem a maisalakandaka pay? Umuna, awan ti makaammo kadagiti kakaduam no sadino ti yanmo. Maikadua, ipagarup dagiti tao nga awankan, a nataykan a presidenteda.”
“Nalipatanyo nga adda Bise-Presidente a nakasagana a mangsukat kaniak iti kanito a mapaneknekanda a natayakon!”
“Saan a mapasamak dayta no maammuan dagiti tao a sipapaluboska a mangyakar iti turay.”
“Imposible ti pampanunotenyo...” impapilit ti Presidente.
Makapungtoten ni Anwar. “Kunak a dakaminton ti makaammo! Basta aramidem ti kayatmi.” “Ket no saan?” “Saanen a nasken a sungbatak dayta, Acosta!” makapungtoten ni Anwar. “Laglagipem a maaramidko ita ti kaykayatko kenka. Baludka ket pulos nga awan ti makaitured a mangisalakan kenka.” “Nalipatanyo nga adda ni John Villa...” Ad-addan ti pungtot ni Anwar iti pannakangngegna iti nagan ni John. Nadlaw dayta ti Presidente.
“Dinadadaelna ti grupoyo idiay Basilan, saan kadi? Pupuotenyo ti saok. Iti uray ania nga oras manipud ita, rumaut daydiay tapno umaynak wayawayaan.”
Nagkatawa ni Gloria. “Nalabes unay ti panagtalekmo iti dayta a tao. Ania ti maaramid ti lima a tao iti kaadumi?” Nagngirsi. “Laglagipem met ti saok. Siakto ti mangpapatay ken ni John!”
Napangirsi ti Presidente. “Gapu iti imonmo... ta saan a sika ti ay-ayatenna!”
Agallabat a tungpa ti nangpasardeng iti Presidente. Ngem intuloyna ti nangsuron ken ni Gloria. Kayatna a mapukaw dagitoy dua ti kinasimbengda tapno saanda a makapagpanunot a nasayaat.
“Kunam nga inaramatmo laeng ni John... ngem agparparang a sika ti inaramatna. Sika laeng ti nangipeksaanna iti iliwna iti pudno nga ayayatenna...” Nagsanaltek pay. “Sumardengka!” kimliit ni Gloria. Limed a naragsakan ti Presidente. Madlawna a sumamsamay ti ar-aramidenna.
“Kasta met laeng ti inaramidmo kaniak. Pinaayayammo ti bagim tapno mayasidegka kaniak...” Dandani nagdul- o ta dina koma mairusok a sawen ti kasta iti maysa a babai, ngem isu ti dawdawaten ti gundaway.
Napukawen ni Gloria ti simbengna. Inasutna ti paltogna sa indusagna ti putan daytoy iti rupa ti Presidente. Nagasug ti Presidente. Nagdara ti pingping daytoy. Idanogna koma pay maminsan ti paltog iti rupa ti lakay ngem inatipa ni Anwar.
“Isardengmo dayta,” nabileg ti timek ni Anwar. Sinippawna ti ima ni Gloria.
Agtigtigerger iti pungtotna ni Gloria ket
agpilpilit a rumuk-at ken ni Anwar. “Bay-annak ta papatayek laengen!” inyikkisna.
“Natangken ti bilin ni General. Masapul a saanta a sugatan,” impalagip ni Anwar.
Nauuneg dagiti anges ni Gloria iti pungtotna. Sinangona dagiti taoda. “Sige, ag- live broadcast- tayo,” imbilinna. “Saan,” insupiat ni Anwar. “Ti kunak... ag- live broadcast,” nabilbileg ti timek ni Gloria. “Kunak la ngaruden a saan,” kinuna ni Anwar ket immasideg ken ni Gloria.
Nakaparpardas ni Gloria a nangipaturong iti paltogna ken ni Anwar. “Sige, pawilannak ta kitaem no dika papatayen...” Nangemkem ni Anwar iti pungtotna ngem nagsardeng. Nakaparpardas ni Gloria a nangikasa iti paltogna sa impaturongna ken ni Anwar. “Padasennak...”
Napanganga ni Anwar. Pinerrengna ti babai ngem dina kabaelan a kasalip dagiti umap-apuy a mata daytoy.
“Ita, mabalin kadi nga ibagam kadagiti taom nga ag- live broadcast- tayo?”
Immanges iti nauneg ni Anwar. Saan a nakapagkitakit. Am-ammona daytoy a babai. Sineniasanna dagiti taona. Madamdama pay, buybuyaenen ti sibubukel a pagilian, agraman iti ballasiw-taaw, nangnangruna iti Amerika ti mapaspasamak iti pagilian, ti panangipakaammo ti maysa a babai iti maipapan iti situasion ti pagilian a Filipinas.
(Maituloyto)