Panangimaton iti Pagtaengan
MASANSAN a mangmangngegtayo ti zero waste. Ngem kasla saan met a maipatpatungpal dagitoy a palagip. Kasla awan ti pagnaan dagiti pammalagip. Ken uray saan koma lattan a zero waste ti maaramid. Uray no maikabassit lattan ti kaadu a basura iti aglawlaw.
Kadawyan nga iti pagtaengan ti pakairugian ti pannakaimanehar dagiti basura. Ngem adu latta ti saan a mangipatpatungpal iti daytoy ta kas kunkuna dagiti agtagtagibalay, narigat ta adu ti kasapulan a bannog ken saan a makaay-ayo nga aramiden.
Ngem ti kinapudnona, saan nga agpayso a narigat nga aramiden ti panangikabassit iti basura.
Maipalpalagip a dakkel ti maitulong iti panangikabassit ti basura iti aglawlaw. Makatulong iti pannakasaluad ti salun-at malaksid iti pannakainut ti kuarta ken tiempo. Dagitoy laeng ti rumbeng nga aramiden: Saan nga idulin wenno ikkaten dagiti saan a kasapulan a wara.
Ikabassit dagiti kasapulan a bambanag no saan a kabaelan nga ikkaten wenno ipakni kalpasanna.
Uliten nga aramaten dagiti saan a maidulin wenno maikabassit a bambanag. Bay-an nga agrupsa wenno agrakaya ti dadduma.
Saan nga agiyawid kadagiti nagduduma a bambanag no mapan kadagiti komperensia, peria, ken padaya.
Saan a mapupuotan ti pannakaurnong dagitoy no agyawid tunggal adda papanan. Amirisen ketdi no nasken nga agyawid kadagitoy.
Urnnosen met dagiti wara ken dadduma pay a gamigam iti pagtaengan. Ipadawat wenno ilako lattan dagiti saan a kasapulan kadagiti mayat iti segunda mano.
Ikabassit ti ipapan iti tiendaan babaen ti panangaramid iti listaan a para iti sagpaminsan a pannakitienda. Mapalliiw nga ad-adu dagiti maparnuay a basura iti masansan nga ipapan iti tiendaan.
Agaramat kadagiti mabalin ng ulit-uliten nga alikamen a kas iti serbilieta, botelia a para iti inumen, ken dadduma pay. Liklikan ti panagaramat kadagiti disposables.
No mapan iti tiendaan, mangitugot iti bay- on wenno dagiti reusable a pagikabilan.
Liklikan ti panangaramat kadagiti plastik wenno dagiti maminsan laeng a maaramat a panganan, pagisupotan ken dadduma pay.
Kadagiti mabalin a mapagrupsa a basura, agaramid iti compost pile a pangigabsuonan kadagitoy.
Kas iti kankanayon a madakdakamat kadagiti amin a bambanag iti komunidad: mangrugi amin dagitoy iti pagtaengan.—O