Kaduam Koma ti Asom nga Agwatwat
TI TARAKENMO KEN SIKA
ADU dagiti linglingay a mapadasan no ibinglayan iti panawen dagiti taraken nga ayup. Agbalin pay ketdi a natalingenngen ti panaglinnangen ti ayup ken ti amona no masansan nga agkadkaduada.
No adda taraken nga aso, makapagwatwat ti akintaraken kabayatan ti panangwatwatna iti ayup.
No met kayat ti akintaraken ti ag- jogging, mabalin met nga ikuyog ti aso nga agtaraytaray uray no iggem ti galut wenno kawar ti ayup.
Ammo ti amin a ti stress wenno pannakaburibor ti pakaigapuan ti adu a sakit ken dadduma pay nga an-annayen. Masansan a dakdakamaten dagiti mangngagas a maigapu dagiti adu a sakit iti pannakaburibor wenno saan a naragsak a panagpampanunot.
Dagiti dagensen ti pampanunot ti mangapektar iti sistema ti bagi a mangpakapsut met iti salun-at.
Maysa kadagiti wagas a mangikabassit iti pannakaburibor ti panagwatwat.
Iti laengen panagtaraytaray, mawatwat ti bagi ken pampanunot ta ikabassitna ngarud ti pannakaburibor. Saan a mapupuotan a pukawen ti panag- jogging ti saan a nasayaat a templada.
Ket no agtaraytaray tapno agwatwat, nasayaat met ngarud nga iraman ti taraken nga aso nga agwatwat.
Kasapulan met dagiti taraken nga aso ti agwatwat tapno mataginayon ti nasayaat a salun-atda ken tapno naragsak ken malinglingayda met ti amoda.
Nupay kasta, agdepende iti kaadda ti oras ti amoda ti gundaway dagiti ayup nga agwatwat tapno mapapigsa dagiti piskelda, umandur, pumigsa ken mamantener ti maitutop a kadagsenda.
No ngarud mapasayaat ti panagtaraytaray ti salun-at ken pannakalinglingay ti maysa a tao, kasta met laeng iti taraken nga aso. Di mapupuotan ti agtaraken iti aso a lumawlawag ti rupana no kasta a makaduana ti asona.
Agrebelde met dagiti aso no awan ti masansan a mapadasanda a positibo ken produktibo nga aramiden. Agaramidda kadagiti saan a nasayaat a kas iti panagngatingat iti sapatos no kasta nga awan ti aramidenda.
Kas iti amona, mayaw-awan dagiti negatibo a tigtignay ti taraken nga aso a kas iti depression wenno pannakirikiar no agtaraytaray met daytoy.—O