Sika ken ti Tarakenmo
ADU a nagannak ti mangiparparit kadagiti annakda a mangsagidsagid iti pusa. Ad-adda pay ketdin a makaungetda no aginteres dagiti annakda a maaddaan iti bukodda a taraken a pusa.
Ngem ammoyo kadi nga adu met dagiti pagimbagan nga ipaay ti panagtaraken dagiti annak iti bukodda a pusa?
Maysa kadagitoy ti pannakasursuro dagiti ubbing a mangibaklay iti responsibilidad. No adda bukod a taraken dagiti ubbing, maipaamiris kadakuada dagiti pagsayaatan ti panagbannog ken panangipaay iti panawen kadagiti bambanag nga adda kaipapananna iti biag. Iti panangpakanda iti pusa, panangdalus iti pagyanan ti ayup ken uray iti panangtaginayon iti kinadalus ti dutdot ti pusa, masursuro dagiti ubbing dagiti nasayaat a galad ken panangipasindayag iti panagtrabahoda.
Masursuro pay dagiti ubbing manipud kadagiti tarakenda a pusa ti panaganus.
Iti panangammo dagiti ubbing kadagiti kasapulan ti tarakenda a pusa, maisuro met kadakuada ti pannakipagrikna ken panangipangruna saan laeng a ti personal a kasapulanda no pay ket dagiti kasapulan ti dadduma.
Masursuro pay dagiti ubbing ti panangisakit ken panangannad kadagiti babassit a parsua a kas kadagiti pusa.
Iti panangisakit ti maysa nga ubing iti pusa, mayallatiw daytoy a panangisakit iti sabali a tattao.
Masursuro pay ketdi dagiti ubbing no kasano ti mangibinglay kadagiti kabaelanda nga ibinglay no adda tarakenda a pusa. Itugotda daytoy a galad iti panagadu ti tawenda saan laeng a para iti pamiliada. Mairaman daytoy nasayaat a galad iti pagadalan ken komunidad.
Saan nga agkarasakit dagiti ubbing nga adda tarakenda nga ayup. Pabilegen ngamin dagiti ayup ti naturalesa wenno immunidad dagiti ubbing.
Paneknekan dagiti panagadal a nakirkired dagiti ubbing kadagiti nagduduma a sakit wenno alerdyi agingga iti panagtaengda no adda tarakenda nga ayup.
Agserbi pay a kanayon a kadkadua dagiti ubbing ti taraken a pusa a mangparegta kadakuada iti adu a kanito.
Masursuro pay ketdi dagti ubbing no kasano a tipden wenno kontrolen ti bukodda nga emosion babaen ti panangbigbigda kadagiti tigtignay ti tarakenda a pusa a mapalpaliiwda.
Kas met laeng kadagiti dadduma a matartaraken nga ayup iti pagtaengan, adu dagiti pagimbagan nga ipaay ti panagtaraken iti pusa.
Saan koma ngarud nga ipaidam dagiti nagannak ti panagtaraken dagiti annakda iti pusa.
Agpaay dagitoy nga ayup a kas nasinged a gayyem dagiti ubbing malaksid iti panangipaayda pay iti natalged a pagtaengan dagiti ayup.—O