Siled ti Kararag
Basaentayo ti Taga- Galacia 3: 26-29:
Iti kasta, awan Hentil wenno Judio, nakugit wenno saan a nakugit, ganggannaet, narungsot a tao, tagabo ken siwawayawaya, no di ket ni Kristo ti isu amin ken adda iti isu amin.—Colossians 3:11
DIMMAKKELAK a nakurapay a kas anak ti maysa a makitaltalon. Iti maysa nga aldaw, nadamagko nga agpadaya ti agkasangay a kaay-ayamko. Makalawas a naggagarak a makadar-ay iti dayta a padaya tapno makiayayam kadagiti padak nga ubbing, mangan iti cake ken ice cream, ken makipagragragsak. Ngem adda laeng maysa a parikut— saanak a naawis. Nagpulkokak. Nakariknaak iti sakit ti nakem ken inay-ayko ti bagik. Gapu laeng daytoy iti kasasaadko; nakakurkurapay ti pamiliak.
Agyamanak ta di kasapulan nga agdanagak a mailaksidak iti bagi ni Kristo. Iti iglesiak, amin a mangay-ayat ken ni Kristo, nga agbabawi kadagiti basolda ken ikagumaananda ti makikappia iti tunggal maysa, ket maawis iti Lamisaan ti Komunion. Ti Apotayo, saannatayo nga ukomen gapu iti sanikua wenno kasasaadtayo iti gimong ngem awisenna ti amin a makipaset iti padayana. Apay nga ilaksidtayo ti asino man manipud iti naidiaya kadatayo babaen ti nakakaskasdaaw a parabur ti Dios? Kinapudnona, amintayo ket managbasol. Babaen ti panangsurottayo iti pagwadan ni Kristo, mabalintayo nga awisen dagiti sabsabali a makipaset iti addaan rag- o a komunidad ni Kristo.
Kararag: Patgenmi nga Apo, tulongannakami koma tapno mariknami ti kasapulan dagiti sabsabali ken maawismi ida iti iglesiami ken iti lamisaan ti Apo. Amen. Kapanunotan: Babaen ken ni Kristo, saanak a mailaklaksid. Ikararagan: Makitatayo koma ti pannakaikaysatayo ken ni Kristo.