Kastoy, Kapid, Ditoy Hawaii
ITAY alas 2:50 iti malem (Pebrero 5), simmanglad ti Southwest Airlines (SWA) iti eropuerto ti Honolulu. Daytoy ti immuna nga isasangbay ti SAL iti Aloha State. Iti daytoy a biahe, dagiti laeng inspektor ti Federal Aviation Administration (FAA) ken dadduma nga opisial ti SWA ti pasahero. Agsubli mel laeng ita nga aldaw ti SWA ngem mapandanto manen idiay Maui. Kadagitoy a biahe, kayat a penken ti FAA a kabaelan ti eroplano ti bumallasiw iti nalawa a baybay ken no ammo dagiti piloto ti aramidenda no bilang adda emerhensia bayat ti kaadda ti eroplano iti tangatang.
Iti daytoy a panangpadasda iti nasao nga eroplano, awan nakitada a parikut wenno pakapilawan ti kompania— iti eroplano ken kadagiti piloto. Ket no kastoy met laeng ti kinasayud ti panaglayag ti eroplano iti ipapanna idiay Maui, mabalin nga iti saan a mabayag maikkanda iti sertipikasion ken pammalubos.
Kinuna ni Andrew Watterson, ti executive vice president ken chief revenue officer ti nasao nga airline, a rugianda ti agbiahe iti kanito a maawatda ti sertipikasion ken pammalubos nga agserbi a pagluganan dagiti pasahero manipud iti Oakland, California ken iti Hawaii.
Manamnama a mangrugida nga agbiahe iti daytoy umay a bulan. Nupay kasta, adda makitada a makaigapu iti talaan— ti maipagarup a shutdown manen ti gobierno ti Amerika iti daytoy umay a Pebrero 15. Kinapudnona, itay koma napalabas a bulan ti pannakaipadas ti panaglayag ti eroplano ngem natalaan gapu iti government shutdown.
Sagudayen ti panagkuna ni Community Outreach Director Laura Nieto, ti ruta ti SWA ket kadagiti siudad ti San Diego, San Jose, Oakland ken Sacramento ken ti Honolulu ken Maui. Nupay kasta, apaman a makapagsimpa, mairamanto ti Big Island ken Kauai a destinasion ti nasao nga eroplano.
Dakkel a banag kadagiti agindeg iti Hawaii ken kadagiti dadduma nga agdaldaliasat ti kaadda ti SWA.
Nabayagen nga ur-urayen dagiti tagaHawaii ti kaadda ti sabali a kompania ti eroplano nga agserbi iti Hawaii malaksid iti Hawaiian Airlines (HAL).
Iti agdama, ti laeng HAL ti kakaisuna a paglugluganan dagiti agal-allatiw kadagiti isla iti Hawaii.
Maipalagip nga iti napalpalabas, dua dagiti kompania ti eroplano nga agserserbi iti Hawaii, ti Aloha Airlines ken ti HAL. Nupay kasta, nagsardeng ti Aloha idi Marso 31, 2008.
Nangrugi ti Aloha idi Hulio 1946 manipud kadagiti eroplano a naar-aramat idi Maikadua a Gubat iti Sangalubongan. Nupay kasta, nagbalin a kabaruanan dagiti eroplanona a kas kadagiti eroplano ti HAL idi 1959 ket nangrugi ti napigsa a risiris dagitoy dua a kompania.
Dakkel a nakaragsakan dagiti agdaldaliasat ditoy Hawaii ti napigsa a dangadang dagiti dua iti negosio: kinababa ti plete ken kinasayaat ti serbisio.
Ngem dimteng ti panawen a naangsan dagiti dua. Immuna a nagiwaragawag ti HAL iti pannakalugina ket nagkiddaw iti tulong babaen ti bankruptcy. Idi nakaungar ti HAL, ti met Aloha ti nagkuna a ma- bankrupt ket kasapulanna ti $65milion tapno maituloyna ti panagserbina iti Hawaii. Ngem daksanggasat ta nagtultuloy ti pannakalugi daytoy.
Idi awanen ti Aloha, nagmaymaysan ti HAL a nagiballasiw kadagiti tattao, kadagiti lumugar ken turista.
Simmaruno a napasamak ti in-inut nga ingingina ti plete iti HAL.
Adu ti nakarikna ken saan a makabael iti plete a mapan iti sabali nga isla. Adu dagiti pasken dagiti kakabagian ken papagayam a saan a matabunuan gapu iti kinangina ti plete. Nagreklamo dagiti umili ngem awan ti pagpilianda.
Ket iti daytoy nga isasangpet ti maysa a dakkel a kompania ti eroplano ti sungbat ti nabayagen nga ar-araraw dagiti agdaldaliasat iti Hawaii.
Inkari ti SWA ti nababbaba a plete, ti libre a dua a kargamento, ken nalaklaka a singir no agsukat ti pasahero iti iskediul.
“Makapanakto manen idiay Hilo,” kinuna ni uliteg, maysa kadagiti mangnamnama iti ibababa ti plete.—O