Saludsodem ken ni Apo Hues
SALUDSOD:
Idi pay dandanikamin agturpos iti hayskul a nagbalin nga agayan-ayat da Susan (gayyemko) ken Marco (maysa nga ul-ulila). Nagtultuloy ti relasionda agingga iti nagturposda iti kolehio. Nakastrek a polis ni Marco ngem daksanggasat ta iti di pay unay nabayag, napaltogan iti maysa nga operasionda. Iti ospital, nupay nadagem ti napasamakna, makabigbig ken makasao pay, naangay ti kallaysada ken Susan babaen ti maysa a pastor, ken nagpaayan ti maysa a nurse ken maysa a polis a kas saksi. Iti di nagbayag, pimmusayen ni Marco. Anian nga anug- og ni Susan.
Sumagmamano a bulan kalpasan a naitabon ni Marco, adda nakaibaga ken ni Susan a mabalinna ti ag- claim iti benepisio gapu iti pannakatay ti asawana a polis. Bayat ti pannakaproseso ti claim, nagriri ti ikit ni Marco. Isu kano ti nangay-aywan ken ni Marco idi ubing pay ken isu ti nagpagadal kenkuana; ngarud isu ti rumbeng a papanan dagiti benepisio. Innayonna a saan a balido ti kasar ta awan met lisensia ti panagkallaysa da Marco ken Susan idi kasaren ida ti pastor.
Tulongam man ti gayyemko, Apo Hues. Husto kadi ti ibagbaga ti ikit daydi Marco?—Gayyem ni Susan SUNGBAT:
Adda kapadpada daytoy kaso ti gayyemmo. Adda idi maysa a babai a nakikasar iti dandanin matayen a ka- live in- na a naatake iti puso. Nagkasarda idi dandanin mauyos ti anges ti lalaki. Gapu ta awan met ti tiempo ta kasta ngarud ti situasion, saanda a nakaala iti lisensia ti panagkasar (marriage license) a kas ituyang ti linteg. Kadagiti ngamin agkallaysa, segun iti Artikulo II ti Kodigo ti Pamilia ti Filipinas (The Family Code of the Philippines) tapno balido ti panagkasar, masapul nga adda lisensia ti panagkasar sakbay a mapalubosan ti nobio ken nobia nga agkasar.
Ngem nupay kasta ti adda iti linteg, adda met dagitay makuna a tao a mawayawayaan iti obligasion (exempted), kas koma no matmatayen ti maysa kadagiti makikasar (Artikulo 27) wenno nagkabbalaydan iti lima a tawen wenno nasursurok pay (Artikulo 34), no dagiti agkasar ket adayoda unay ken awan ti lugan a mapan sadiay opisina ti lokal a registrar (Artikulo 28), wenno Muslimda.
Ngarud, kuna ti Korte Suprema a balido ti kasar uray awan ti lisensia ti panagkasar ta matmatay met ‘diay nobio/nobia ket awanen ti tiempoda a mangala, ken saan met a mabiit ti mangala ta agurayda pay iti sangapulo nga aldaw sa maited ti lisensia ti panagkasar. Maibatay iti daytoy a desision, awan ngarud ti karbengan ti ikit ni gayyemmo nga agtawid ta legal ti kasar ti gayyemmo.
Ngem gapu ta ni ikit ket tinagibi, pinadakkel ken pinagadalna ni Marco, ala, ket saan met a dakes no iburayanto ni Susan ti ikit ni Marcos nga ikit metten ni Susan. Addanto daytan ken ni Susan.—O