Ita, a Tallo nga Apagkapat ti Maysa a Siglo

Ita, a tallo nga apagkapat ti maysa a siglo a panangsarabok iti panagtaok, awanen ti kiddawek pay a sagut no di laeng ti agtultuloy nga isusuknal ti sadiwa nga angin, ti nasin-aw a law-ang iti aldaw, iti rabii; ti panagburak dagiti dalluyon; ti panagkaradap dagiti allon iti mail-iliwan a kadaratan...

Sika, a kinabinnuligko iti tallo a dekada ken pito a nepnep ken pito a kalgaw— ti alpha ti omega, ti sam-it ti pait, ti katawa ti liday, ti asin ti alsem. Sika, ti diamante daytoy tallo nga apagkapat ti maysa a siglo ti biagko...

Ita, a tallo nga apagkapat ti maysa siglo ti biagko, saan a diak nagliway, saan a diak nagkibaltang, saan a diak nakalipat. Ngem diak ikalintegan a taoak a nagtagilasag, a nagtagirikna; ta ad-adda a masair, a masaktanka.

Ngem kasano ti panangibagak kenka isuna?

Isu, a nangidateng iti kasla nabendisionan a pannakariing a pulos diak narikna, ngem diak met koma narikna no diak kinayat a marikna!

Isu, a nangakem iti akemmo idi dimo denggen ti palawagko

Idi kinedngannak

Isu, a taklin ken kalasagko Idi inliktadmo ti agdan, idi inrikepmo ti ridaw ti panaglilinnawag Ti panagkikinnaawatan

Ammo ti pudno nga agay-ayat ti agbalin nga umel Ammo ti pudno nga agay-ayat ti agimbubulsek. Ammo ti pudno nga agaay-ayat ti di makangeg. Kangrunaanna, ammo ti pudno nga agay-ayat ti mamakawan.

Ngem sika ti punganay ken gibus ti tallo nga apagkapat ti maysa siglo ti biagko, a no di napattokan iti kinamannakaawat ti mannakaawat, nga inayatko iti amin nga ayatko,

patiek a di simmangbay ti tallo nga apagkapat ti maysa a siglo, a buntokak iti umay a tawen ken ad-adu pay a tawen iti isusuknal ti sadiwa nga angin nga agballatek iti bakud iti likudan ti pagtaengan manipud iti nakadaldalus a Baybay ti Waiehu...

--ARNOLD C. BAXA