Basol ni Ma’am?
MASANSAN a pabpabasolen dagiti nagannak dagiti mamaestra nga agkurkurang ti panangisuroda kadagiti ubbing iti nasayaat a kababalin. Ala, mabalin nga adda met bassit kinaagpaysona dayta. Ngem no anagen a nasayaat, iti pagtaengan, saan nga iti pagadalan ti umuna a pakaisuruan ken pakaadalan dagiti ubbing iti nasayaat a galad. Dagiti laeng mannursuro ti mangpabileg kadagiti nasayaat nga isursuro dagiti nagannak kadagiti annakda.
Kadagiti naglablabas a panawen, dagiti nasayaat a galad ti kankanayon nga igunamgunam dagiti nagannak kadagiti annakda. Ket dagitoy a nasayaat a galad, itugtugot met dagitoy nga annak iti eskuela. Ngem iti agdama, irekreklamo metten dagiti mannursuro nga agliwliway dagiti ubbing nga agyaman kadagiti nasayaat a bambanag a magunggun-odda ken agpadispensar met no adda saan a nasayaat a naaramidda.
Agpimpinnabasol la ket ngarud dagiti nagannak ken dagiti mannursuro no asino ti rumbeng a mangisuro iti nasayaat a galad kadagiti ubbing.
Kinapudnona, adu pay a nagannak ti mangraraut kadagiti mamaestra no kasta a maungtan wenno madissuan dagiti mannursuro dagiti ubbing nga agaramid iti maikaniwas. Ngem nasken koma a maammuan dagiti pada a nagannak nga isuda a mismo a nagannak ti rumbeng nga umuna unay a mangisuro kadagiti annakda kadagiti nasayaat a galad ken panangraem iti dadduma a tattao.
Saan koma met a rumbeng a pabasolen dagiti pada a nagannak ti epekto ti modernisasion ken social media a makaigapu iti panagbalbaliw ti galad dagiti ubbing. Ti napateg, mangipaay dagiti nagannak iti panawen tapno maisuro kadagiti annakda dagiti pagbatbatayan ti nasayaat a galad.
Malaksid iti daytoy, nasken pay nga aramiden met laeng dagiti nagannak dagiti bambanag a kayatda nga aramiden dagiti annakda.
Ad-adda ngamin a tuladen dagiti ubbing dagiti makitkitada a nasayaat a galad dagiti kabbalayda ngem ti maibilbilin nga aramidenda.
No makitkita dagiti ubbing a nasingpet dagiti nagannak kadakuada, ad-adu dagiti gundaway a tuladenda daytoy a kinasingpet.
No makita dagiti ubbing nga idiaya dagiti nagannak kadakuada ti tugaw kadagiti nataengan wenno adda an-annayenna, tuladenda met daytoy.
Saan a nasken nga agatendar dagiti ubbing kadagiti klase no kasano a raemenda dagiti dadduma tattao. Saan met nga epektibo ti panagbasabasa wenno panagbuyada iti telebision tapno mayadal kadakuada ti nasayaat a galad. Maipasagepsep ti disiplina ken dagiti nasayaat a palagip manipud kadagiti nagannak. Kangrunaan iti amin, nasken a respetaren dagiti nagannak dagiti annakda tapno agsubli met laeng kadakuada daytoy a panagraem dagiti annakda. No kastoy ti aramiden, mairaman a respetaren dagiti ubbing dagiti dadduma a tattao agraman dagiti mamaestrada.
Iti sabali a pannao, kadawyan a mangrugi kadagiti nagannak ti panangrespetar dagiti ubbing kadagiti mamaestrada ken dadduma pay a tattao a makalangenlangenda.—O