Agpareha Manen da Alex ken Empoy
MAPASPASANGASANGAN ti panagpareha manen iti pelikula da Alessandra de Rossi ken Empoy Marquez. Kas iti damo a nagparehaanda a pelikula a “Kita Kita,” idirehe ken sinurat met laeng daytoy ni Direk Sigrid Andrea Bernardo ken mapauluan iti “Walang KaParis.”
Kas ipaspasimudaag ti paulo, manamnama a mapanda agsiuting sadiay Paris. Kas kadagiti sabsabali a pelikula ni Direk Sigrid (nasiuting ti “Kita Kita” iti Japan), pagaayat daytoy ti agsiuting kadagiti nadumaduma a lugar wenno iti ruar ti pagilian ta para kenkuana, iti kinalawa ti lubong, masapul a makasursurotayo kadagiti sabsabali a kultura. Ket gapu ta posible a saan met nga ania a makaadu iti maadakan dagiti agbuybuya kadagiti nadumaduma a lugar, uray kaskasano, adda ‘mayasidegda’ a nasayaat a lugar babaen ti pelikula.
Mapan a dua a tawen met sa nasunotanda ti “Kita Kita” a kangatuan iti naganar nga indie a pelikula nupay indardarirag ti prodiuser. Nakumikom ngamin ni Direk Sigrid kadagiti sabsabali a proyekto ken iti biangna, saan pay a nakasagana a dagus a mangsunot iti pareha da Alex ken Empoy.
Ket idi naaddan iti tiempo ni Direk Sigrid, inyasidegnan daytoy proyekto a “Walang KaParis.”
* * * Saan a masuron, ketdi maragsakan, ni Angel Locsin nga inaramid dagiti netizen a meme dagiti ladawanna nga agsangsangit kadagiti nadumaduma nga eksena ti “The General’s Daughter.”
Kinapudnona, in- share- na pay ketdi dagitoy. Sa impalagipna ti panangbuyada iti nasao a teleserye.—O