Okeyka, Apong
SIEMPRE, saan. Ngem mabalintayo nga itantan. Mabalintayo ti aglakay wenno agbaket a napnuan sudi. Ken aktibo. Kas ken ni Manang Milagros Pineda Patayan. Nasuroken a pitopulo ti edadna, ken ipagpannakkelna daytoy. Saan ketdi a ti pannakagtengna iti dayta nga edad ti pakagragsakanna, ad-adda pay ti aginaldaw nga obrana— ti aglakolako kadagiti nateng a manumtumbalay (mamalaybalay) iti subdibisionmi iti Kamanilaan, ken kadagiti kadarapat a komunidad. Ania ti sekreto ti kinaalibtak ni Manang Mila iti laksid ti edadna? Dagitoy ti sungbatna: • “Saanak nga agsidsida iti karne, nangruna iti baboy. Agsidaak ketdi iti ikan ken natnateng, ken manganak kadagiti prutas.”
• “Nasapa a maturogak iti rabii— alas otso. Ken nasapaak met nga agriing iti parbangon— alas kuatro, tapno isaganak dagiti tagilakok.”
• “Iti agsapa nga aglakolakoak. Aramidek met iti malem dagiti aramid iti balay.” • “Napalalo ti panangsuportar ti pamiliak iti ar-aramidek.” • “Saanak nga agtomtomar iti agas. Iti asi ni Apo Dios, saanak pay a naosospital.” • “Kanayon a positibo ti panagkitak iti biag.” * * *
Ammo ti entero a subdibision no addan nga aglakolako ni Manang Mila. Mangngegmo ti timekna uray no sangaligason (ti subdibision) pay ti kaadayona.
* * * Iti naminsan, “nagpukaw” ni Manang Mila. Nagretiro met laengen, nakunak. Kalpasan ti sumagmamano a lawas, nagparang manen ni Manang Mila.
“Nagbakasionak idiay Pangasinan,” kinunana a maragragsakan ken dinan inyuray a makapagsaludsodak. TagaPangasinan ni Manang Mila.
Nakalawlawa ti isemna, maysa a pagilasinan a saan a kabaelan ti panagtaeng wenno panagbaket a guyoden ti pigsa ken alibtakna.
* * * Adda pay maysa a sekreto ni Manang Mila no apay a saan a bumakbaket.
Isu ti panaginana.—O