Ading Kosinera

IBINGLAYMI man met dagiti resipe dagiti nadumaduma a luto nga insagana ti DOST-Food Nutrition and Research Institute (FNRI). Nairaman dagitoy a resipe iti 2019 Menu Guide Calendar. Alisto nga isagana dagitoy a para iti pamilia.

Munggo Gisado nga Adda Karabasa ken Sotanghonna

( Munggo wenno balatong, napintas ken nalaka a paggapuan ti protina a para iti muscle growth ken repair. No awan ti nakasagana a sotanghon, mabalin met nga isandi ti misua.)

Dagiti kasapulan:

1 tasa a balatong, berde, nabilag

5 tasa a danum

3 tasa a danum

1 bassit a pakete ti sotanghon

2 kutsara a manteka

2 kutsara a bawang, nadekdek

¼ tasa a lasona, nagalip

¼ tasa a kamatis, nagalip

1¼ tasa a pork kasim, nagiling

2 tasa a karabasa, nagalip a pakubiko

2 tasa a danum

1½ kutsarita nga iodized salt

2 kutsarita a patis

2 tasa a bulong ti marunggay

Panangisagana:

1. Bugguan a nasayaat ti balatong. Ikkaten dagiti tumpaw a saan a nasayaat a bukel.

2. Ipaburek iti danum agingga a bumlad a nasayaat. Ipaigid iti apagapaman.

3. Mangala iti malukong. Danuman ti sotanghon. Yuper iti 30 a minuto. Paubosan kalpasanna.

4. Gisaren ti bawang, sibuyas, kamatis, ken karne. Lutuen iti lima a minuto.

5. Inayon ti napablad a balatong, karabasa, danum, ken asin. Kaluban ken lutuen iti 10 a minuto.

6. Inayon ti sotanghon. Lutuen iti 2 a minuto.

7. Inayon ti bulong ti marunggay. Paburken iti maysa minuto.

8. Makaaramid iti lima a servings: 1 ½ tasa ti kada serving wenno kaibatogan ti 325 g.

Mapattapatta nga enerhia ken sustansia nga imet ti tunggal serving:

(Naibasar iti Philippine Dietary Reference Intakes (PDRI) a para iti 19-29 years old a lalaki.) Energy, 852 kcal Protein, 24.4 g Fat, 29.7 g Carbohydrate, 121.8g Calcium, 174 mg Iron, 5.8 mg Vitamin A, 340 μg RE Vitamin C, 68 mg