Siled ti Kararag
Basaentayo ti Mateo 23:1-12:
Ti kangrunaan kadakayo masapul nga isu ti adipenyo.— Mateo 23:11
IDI maiserrek iti balay a pagagasan ni nanangko, naaddaanak iti gundaway a mangobserbar kadagiti adu a tattao a maseknan kadagiti matartaraken a pasiente. Malagipko iti umuna a daras a pannakakitak ken ni Manny. Kasla natuso a lalaki ngem maisupadi gayam iti akinruar a langana. Inaldaw a pakpakanen ni Manny iti pangaldaw ni nanangna. Napnuan anus a nainayad ken naannad a pakanenna ti inana. Mamatiak a ti kinaanusna ken panangipategna ibulbulonna iti pangaldaw ti inana. Kasta met a naimatangak dagiti agtrabtrabaho a masuelduanda laeng iti bassit a kuarta ngem ipakitada latta ti ayat ken panangipategda kadagiti pasiente a saandan a kabaelan a saluadan ti bagida. Dagiti sumagmamano a pasiente agkabawda payen ta saanda a mabigbigen dagita a tulong.
Sagpaminsan iti damdamag, mangipabuyada kadagiti bannuar a rumbeng laeng a mabigbig. Nupay kasta, adu dagiti tattao a naulimek laeng nga agserserbi iti inaldaw a saan a maam-ammuan. Saanda a pulos a maipabuya kadagiti damdamag. Nalabit saan a mabigbig a naindaklanda; ngem kadagiti aramidda, makitak dagiti tattao nga agserserbi, kas iti insuro ni Kristo a wagas ti panagserbi. Ti kinapudnoda ken saan a magatadan a panagserbi ti mangipakita iti kuna ni Jesus a “ti kangrunaan kadakayo.”
Kararag: Luktam kadi dagiti matami, Apo, kadagiti agserserbi nga addaan anus ken parabur. Tulongannakam’ a makaadal kadagiti pagwadanda tapno maaddaankami iti pakumbaba nga agserbi kadagiti makapulapolmi. Amen.
Kapanunotan: Umanayen a ti Dios laeng ti makakita kadagiti aramidko.
Ikararagan: Dagiti mangtartaraken kadagiti nataengan.