Idi Un-unana a Panawen
IDI un-unana a panawen, adda maysa a tao, a kas kadatayo, ammona a no kayatna ti mapanto idiay Langit inton matay, masapul ngarud nga agaramid iti nasayaat ita ta sibibiag pay. Ammona a nasken nga ayatenna ti kaarrubana a kas iti panagayatna iti bagina. A nasken a raemenna dagiti dadakkelna. A nasken nga agbalin a napudno kadagiti padana a tattao. A nasken a tulonganna dagiti makasapul. A nasken a salaknibanna dagiti mairurumen.
Inaramidna amin dagitoy. Ngem sagpaminsan laeng. Ipaayna ti tulong iti gayyemna no malagipna daytoy a gayyem. Nga agkararag no makalagip. A mangted met iti tulong iti nakurapay no kuriruen ti konsiensiana. Ta madukotan unay kadagiti personal nga aramidna ken iti trabahona.
Daytoy a galadna, nailasagna. Ket adu dagiti gundaway a gapu iti kaadu nga ar-aramidenna, malibtawanna ti gundaway a panangipakitana koma kadagiti nasursurona a nasayaat a galad.
Agingga iti maysa nga aldaw, pimmusay daytoy a tao. Bayat ti yuulina iti agdan nga agturong iti Langit wenno Paraiso, pinampanunotna no ania dagiti naaramidanna a nasayaat ket iti panagkunana, umdas metten dagitoy tapno maikari nga agnaed iti Langit.
Ngem idi makadanon iti ruangan ti Paraiso, natakuatanna a nakarikep daytoy. Idi kuan, adda nangngegna a timek: “Agsiputka, ta daytoy a ruangan, aglukat laeng iti maminsan iti uneg ti kada sangapulo ribu a tawen!”
Nagtakder sadiay ti tao; nakamulagat, nagpigerger pay iti gagarna a makastrek iti Langit. Inkarina iti bagina nga agtalinaed a nasiput. Ta apaman nga aglukat ti ruangan, dagusenna met ti umuneg.
Ngem gapu iti nakairuamannan nga ugali, nasarakanna laengen ti bagina a sabali manen ti pampanunotenna. Kalpasan ti panagurayna iti impagarupna a nakapapaut a panawen, natnag dagiti abagana; napadumog; sinaguyepyep; ket inturogna iti sangkabassit.
Ngem iti dayta a kanito nga idadateng ti naimas a turog, naglukat ti ruangan ti Paraiso. Ket idi agmulagat ti tao, apagisu met a karikrikep manen ti ruangan.—O