Sika ken ti Tarakenmo
MAYSA a rekado iti maluto a taraon ti cinnamon a magatgatang iti groseria ken dadduma pay a pagtagilakuan. Magatang a napolbos wenno kasla ukis ti kayo wenno sanga. Maang-angkat daytoy a rekado iti Sri Lanka, India ken abagatan nga Asia.
Maimulmula ti cinnamon kadagiti napudot ngem nadameg a lugar nga addaan iti napukray ken nalaka a mapanawan ti danum a daga.
Iti akin-uneg nga ukis ti kayo ti cinnamon ti pakaalaan iti maar-aramat a pagrekado kadagiti isagana a taraon.
Sigud a mapapati a napeggad nga ipauneg dagiti taraken nga ayup ti cinnamon. Mailiklik daytoy a mailaok wenno maipakan kadakuada iti amak a saan a maitutop nga ipaunegda a mabalin nga agtungpal iti nagduduma nga an-annayen.
Ngem kalpasan ti adu a napasnek a panagadal, naammuan nga adu gayam a pagsayaatan ti ipaay ti cinnamon kadagiti taraken nga ayup malaksid kadagiti tattao a mangar-aramt a pagrekado kadagiti isaganada a taraon.
Iti tao, adu dagiti pagsayaatan nga ipaay ti cinnamon a mabalin a maipaay met kadagiti taraken nga aso.
Nabaknang ti cinnamon iti eugenol, maysa a nalanit ken aromatiko a sustansia a mangsaranget iti panagletteg ken mangpapatay kadagiti mikrobio iti bagi.
Daytoy ti rason a maar-aramat ti cinnamon iti pannakaaramid dagiti agas, pagpapintas ken uray kadagiti mailaklako a pagpatay kadgiti insekto.
Makatulong daytoy a sustansia tapno saan a tumangken dagiti piskel malaksid iti panangep-epna iti ut- ot nga itden ti panagkadawyan dagiti babbai, panagbetted, reuma ken panagsakit dagiti susuop. Nabaknang pay ti cinnamon kadagiti natural nga antioxidant a kas iti Bitamina C ken flavonoids a mangwaya iti panagtaray ti dara kadagiti urat.
Gapu iti nangato nga imet ti cinnamon nga antioxidant, makatulong daytoy iti pannakailiklik iti kanser ken pannakadadael dagiti selula ti bagi.
Maar-aramat pay ti cinnamon a pangpasayaat iti pananggiling ti bituka iti taraon. Tipdenna ngarud dagiti sakit a kas iti panagsarua, panagtabbel ken panagalsem ti tian.
Malaksid iti tulong ti cinnamon iti pannakasaranget ti sakit ti puso yadayona pay ti mangipauneg iti peggad iti diabetes ken nasapa a panagkabaw.
Dagitoy ti rason a mabalin nga ipakan ti cinnamon iti aso iti maitutop a kaadu iti inaldaw a kas ibalbalakad dagiti beterinario.—O