Pan de Amor (20)

“Suitor?” pagam-ammuan la ta kinuna ni Miguel a ni Martin ti kayatna a sawen.

Ti Napalabas: Simmangpet ni Amor iti Pakni ta umayna bangonen ti nalugi a panaderiada. Nagpatulong ken ni Miggy. Kinasaritana ni Martin a kinaeskuelaanna idi ta isu ti mangbangon. Agkonkontrata daytoy iti mapatakder a balay ken inrapinna ti nagbasa. Insingasing ni Martin a panagananna iti Pan de Amor ti panaderia. Kinontra ni Anti Lucia ti plano ni Amor ken pati pagdissuanna. Pasaray idildilig ni Amor ni Martin ken ni Miguel a nobiona idiay Spain. Impudno ni Amor ken ni Martin nga adda nobiona idiay Spain, ni Miguel. Impaw-it ni Miguel ti dati nga engagement ring-da ken imbaga daytoy a sumarunonton. Napanunot ni Amor a padalusan ti dati a bakery-da ta isu ti pagyanan ni Miguel. Nagpalako iti tinapay kadagiti ubbing. Sinalangad ni Anti Lucia. Nagsangit ni Amor ket inubor ni Jacko ti balay da Anti Lucia. Kabigatanna, impakammo ti kapitan a nagreklamo ni Anti Lucia ta pinaltoganda ti balayda. Nagpakuyog ni Amor ken ni Martin idiay karayan. Iti panagabayda a nagsarsarita, nakarikna ni Amor iti naidumduma. Nagpawpawpawda. Inkeddengda ti agawid idi makitada a sumalog ni Anti Lucia. Ngem nagparikut ni Amor idi ibagada nga adda dakkel a tao nga agur-uray kenkuana idiay balayda.

(Maika-20 a Paset)

“KUMAPETKA ta patayabekon!” kinuna ni Martin. Nalawag a nangngegko ngem kasla diak naawatan ta di unay nagrehistro iti panunotko. Pudno a mariribukanak. Nupay nadagdagsen nga amang ti riknak idi pumanawak idiay Spain, ad-adda met a diak mapagturong ti panunotko ita.

Kasla pay ketdi masadutak nga agpanunot. Adu dagiti banag nga agsisinnilliwasiw iti utekko ngem kawawda. Awan ti nalawag. Ammok a mabalin, addan ni Miguel idiay balay. Ammok met nga adda ni Martin iti abayko. Ammok pay nga addaak iti karayan. Ken ammok a nakaluganak iti kurongkurong. Ngem agingga laengen dita ti ammok. Di kayat ti panunotko ti umagpang. Kasla addaak iti maysa a lubong nga agtatapawak. Kasla buybuyaek dagiti nasken nga aramidek ngem masadutak nga aggaraw. Ta kasla dead-end ti amin. Awan ti papananda. Addada. Ngem kasla awanda.

Wenno agkitakit laeng kadi ti riknak a mangawat nga addan ni Miguel?

“Hoy!” Kinagiddan ti timek ti pannakasagid ti abagak ket natiagak. Nagangsabak a nangkamakam iti angesko. Kellaat pay a naibbatak ti nagkapetak gayam nga akinngato a landok ti tangkal ti kurongkurong. Tinaliawko ti nangsagid kaniak. “Kalla nakakitaka ‘ti ar-aria, anti!” Nakalawlawa ti ngiit ni Klit a mangtangtangad kaniak. Nagkatawa ket nakipagkatkatawa dagiti dua a kakaduana nga ubbing. Agpayso nga adda sutsutil daytoy nga ubing. Nadlawkon dayta iti namin-ano la a daras a panaglakoda iti tinapay.

“Okeyka met laeng?” adda panangilala iti timek ni Martin. Mariknak a kayatnak nga andingayen ngem agalumiim a mangsagid kaniak. “Aglulusiawka. Nauprankan sa metten. Amangan no mablaawka.” Mablaaw, kunami iti maikawa ti bagi.

Pinilitko ti immisem sa tinung-edak. “Dinak pakadanagan,” kinunak, “kayak daytoy. Kinigtotnak laeng ngamin ni Klit.” Pinilitko a pinaragsak ti bagik. Ginammatak ti bakrang ti ubing sa kinilikik. “Pilioka, a…” “An’a, intayo ngaruden?” inamad manen ni Martin. Mapilpilit ti tung-edko. Ta no mabalin laeng— ken no adda sabali a papananmi— diak pay la kayat ti agtarus idiay balay gapu iti nagduduma a rason.

Umuna, diakon sigurado ti riknak ken ni Miguel. Addan panagduaduak. Ket mabutengak iti mabalin a matakuatak.

Maikadua, amangan no ibaga ni Miguel nga isu gayam a nakisinaak kenkuana ta addan sabali a lalaki iti biagko. Di mainsasaan a kasta ti panunotenna no makitana ni Martin. Mabainak met ngarud a mangibaga ken ni Martin a dinak pay laeng itultulod idiay balay. Siak pay met ti napan nangawis kenkuana nga umay ditoy karayan.

Maikatlo, kasla saanak pay a nakasagana a makisango manen ken ni Miguel. Maikapat… Napasennaayak a kimmita ken ni Martin a nakapaspasnek a mangiturturong iti kurongkurong. Nabannayat ti panagpatarayna ngem kasla nakaparpardaskami iti panagriknak. Makitkitakon ti balaymi.

Imbes nga iti likud ti balay, iti sango ti nangitarusan ni Martin iti kurongkurong.

Pudno nga addan ni Miguel! Nagabayda ken Manong Jacko a nakatakder iti sango ti panaderia. No di koma nakarukob, ta pagtamtam-ekanna ti pangiggaman ti maysa kadagiti uppat a dadakkel a maletana, pagat-abagana laeng ni Manong Jacko.

Diak masdaaw no apay a di pinastrek ni Manong Jacko iti

balay ni Miguel. Sipud naammuanna ti napasamakmi, madi ti papangresanna ken ni Miguel. Dina pay ngarud kayat ti agyan idiay panaderiami a maysa. Nupay kasta, napayamanak ta saan a binaybayan ni manong nga agmaymaysa ni Miguel iti ruar. Di ket koman kasla manok nga intinnag ti kali iti tengnga ti kapanagan.

Nadlawko a dagus ti ragsak ni Miguel idi malasinnak iti isusungadmi. Adda gagar iti rupana a simmabat. Madungparak, dina payen kuna. Basta simmabat lattan.

Nagpainayad ni Martin. Ken napilitan a nangisardeng iti kurongkurong ta saan metten a nagpaigid ni Miguel.

“Como estas, mi amor?” insabat ni Miguel. Awan pangyarigak iti langana no di kasla kumarayo nga ubing a nakakita iti isasangpet ti inana a napan naglaba iti nagmalem idiay karayan.

“Okey lang,” insungbatko. Saanko nga inespaniol. “Sibibiagak pay met laeng.”

Diak napakadaan ti panangapungolna kaniak. Imbilin ti panunotko a rumkuasak, ngem kasla addada koriente a simmuksok iti nabasa a pagan-anayko ket diak nakakuti. Nagtalaytay daytoy a koriente kadagiti ur-uratko ket nangipaay kaniak iti naidumduma a ragsak.

Napasennaayak ta iti daytoy a nariknak, kapkapnekakon nga adda pay laeng nabati a panagayatko ken ni Miguel.

Ngem apay a kasla maalumiimak itay apungolennak?

Sabagay, sibabasaak gapu iti panagdigosko idiay karayan. No di rimmuk-at a dagus itay, sigurado a nabasa met ti aruatenna. Numona ta nakaguguapo iti suotna nga asul a checkered a long sleeves nga inasmanganna iti maong a pantalon. Adda ketdi nadlawko a nagbaliwan ti langana. Kasla limmakay iti lima a tawen gapu iti manmanon sa a makartiaan a barbasna. Kasla pay limmawa bassit ti pultakna. Ngem iti laksid dayta, guapo latta. Asino a taga-Pakni ti saan a makayawan iti langana aglalo ket nalinis ti kudilna? Aglalo pay ngatan no maammuanda ti kinasingpetna.

Timmakderak. Iniggaman a dagus ni Miguel ti maysa nga imak ket inatibaynak iti ididissaagko iti kurongkurong.

“In-inayad laeng, baka maigaliska,” kinunana iti Espaniol.

“Ah, sabali ti saona!” pagammuan la ta kinuna ni Klit nga agkatkatawa.

“Di maaw-awatan, kunam?” kinuna

met ti maysa. “Higanti pay!” Nagkakatawadan a tallo. Diak natuloy ti dimsaag. Tinaliawko ketdi dagiti ubbing a nakaragragsak. Awan man laeng ti ammoda iti irteng a mapaspasamak iti nagbaetanmi ken Miguel. Pinarimrimak ni Martin. Saan a maun-uni daytoy ngem nakapaspasnek a mangkitkita ken ni Miguel. Immisem idi madlawna a kitkitaek. “Guapo,” kinunana sa kiniddayannak. Linibbiak. Awan ngamin sabali a maisungbatko. Kellaat, nadlawko nga impasalingetnget ni Miguel dagiti dakulapna kadagiti kilikilik. Nagkulaidagak ta maariekak. Ngem kasla ubingak a binagkatna nga indissaag.

“Kalla ubing! A, kalla ubing,” pagam-ammuan ta kinuna manen ni Klit. Kasta unay ragsakna a mangitudtudo kaniak.

Naiturong la ket ngarud ti imatang ni Miguel ken ni Klit. Dinamagna no kaanakak. Imbagak a paglaklakuek ida iti tinapay.

Inruar ni Miguel ti selponna iti bolsa ti pantalonna sa nagitalmetalmeg. Idi kuan, sinangona ni Klit.

“Good chico,” kinunana ket ammok lattan a Google translate ti nangusaranna iti selponna. Saan unay a mapagtalkan ti translation ti Google ngem makaanayen tapno maawatan ti kayat nga ibaga. “Tsiko kano, anti?” kinuna ni Klit. Napuotak laengen ti bagik a nagkatawa. “Saan,” kinunak. “Nalaingka kano nga ubing.”

“Inkayo kano agay-ayamen ket no isukatnakayo iti tsiko,” marmaraisem met ni Martin a nagkuna.

“Laglag, ti la ibagbagam,” kinunak. Ngem nagiinnunan dagiti ubbing a timmapuak manipud iti kurongkurong sa nagtatarayda a nagpalaud. “Inton no kuan, kabutengda,” insidirko.

“Mayat tapno agtalawen,” agkatktawa ni Martin a nagkuna. Nagmisuotak. “Bisitak,” kinunak. Naggarakgak ni Martin. “Nasaysayaaten ti kasdiay ngem ti dawatanda iti kuarta…”

“Puro met ang-angawka ngamin…” impasugnodko. “Agseriosoka man.”

“No dimo pay malagip a yam-ammo ‘ta bisitam,” imbalesna.

Nabainanak. Pudnon sa a masadsadutak nga agpanunmot ita. Nagpadispensarak.

Sa pinagam-ammok ida. Imbagak ti iseserekmi ngem nagsaritada biit.

Di ammo ni Martin ti agsao iti Espaniol ngem ammona ti agingles. Di met ammo ni Miguel ti agsao iti Ingles isu nga agus-usar ti Translator iti internet. Agkaawatanda met.

“Suitor?” pagam-ammuan la ta kinuna ni Miguel. Ammok a siak ti pagdamdamaganna ta kinalbitnak. “Yes,” dagus nga insungbat ni Martin. Kasla nasulnot ti angesko. Kellaat met a nagbaliw ti tabas ti rupa ni Miguel.