Kudeta (51)
Inasut ni Gloria ti paltog a salikadna. Inkasana. Impaturongna iti ulo ni Mrs. Villa.
Ti Napalabas: Nagturongen ti Presidente iti kapitolio. Nakapuesto metten dagiti tao ni Agent Stewart agraman dagiti sniper iti Central Hypermart ken iti pasdek ti banko iti asideg ti kapitolio. Nagpuesto met da Ricky iti ngato ti kapitolio. Agbitbitlan ni Presidente Acosta idi paltoganda. Insalakan ni John. Pinaltogan met ni Ricky dagiti sniper a CIA. Agturongdan iti kapitolio idi malagip ti Presidente ni Gloria. Idi kuan, dimteng ni Gloria nga adda palpaltoganna. Inkeddeng ni John a da laeng Gloria, Jay-ar, ti Presidente ken ti inana ti agtuloy nga aglibas iti tunnel ta tulonganda dagiti PSG. Ngem inturong ni Gloria ti Presidente ken ni Anwar. Naragsakan ni Gen. Miguel. Kayat ni Anwar nga iwaragawag ti Presidente Acosta ti pannakayallatiw ti turay ken ni Gen. Miguel ngem di kayat ti Presidente. Babaen ken ni Deputy Bosworth, naammuan ni John a baluden dagiti kalaban ti Presidente. Inkeddengna a rautenda ti warehouse. Ngem awan tao a nadatnganda. Inawagan ni Deputy Bosworth ni John. Imbilinna a mapanda alaen ni Pat Coloma. Bayat ti panagturongda iti ospital a yan ni Pat Coloma, buybuyaenna ti Facebook Live ni Gloria.
(Maika-51 a Paset)
BUMAYAKABAKEN. Naidumduma ti kinadadakkel dagiti tinukel ti tudo. Umas-asideg ti trak a nagluganan dagiti soldado iti nagparkingan ni Daniel. Nakaparpardas ni Daniel a limmugan iti van, innalana ti bazooka, linuktanna ti bassit a kahon dagiti bala sa nanggammat iti maysa. Inyusongna iti paltog. Dimsaag. Ininderna ti takderna, imbaklayna ti bazooka, sa sinirigna ti umas-asideg latta a trak. Idi namnamaenna a mapuntaannan daytoy, kinalbitna ti gatilio. Naipugso ti asuk iti likud sa simmuyot iti sango ti bala sa timmayab a nagturong iti trak. Bimtak ti trak. Nauram. Ngem sinebseban met laeng a dagus ti napigsa a tudo.
Nakaparpardas ni Daniel a nagsubli iti uneg ti van. Pinagandarna ti lugan sa pinasiwetnan. Nupay nakaparpardas ti panagwidawid ti wiper ti windshield, marigatan latta ni Daniel a mangkita iti dalanna gapu iti kinapigsa ti tudo.
Ngem saanna a mabalin ti agpainayad. Nasken a maalana a dagus da John ket makapanawdan ditoy. Ammona nga adda maibaon nga umarayat iti nabomba a trak.
Pagam-ammuan, maysa a lalaki ti nagparang iti imatangna. Nakatakder daytoy iti tengnga ti kalsada, ken adda patpaturonganna iti paltog. Ni John! Ket madungparnan! Impennekna nga imbaddek ti preno. Naganit-it ti naguyas a ligay ti lugan. Nagsardeng ti van iti awan pay maysa a metro iti nagtakderan ni John.
Linasin ni Daniel ti patpaturongan ni John. Ngem nabuslon ti tudo a mangpalpalidem iti windshield. Dimsaag. Ni Edgar ti patpaturongan ni John! Nagburek a dagus ti dara ni Daniel. Ni Edgar ti nasken a papatayenna a tao. Immasideg ken ni John. “Ipalubosmo a siak ti mangpapatay kenkuana, manong,” kinunana.
Liningay ni John ni Daniel. Immisem. “Panggepnak a papatayen... ngem naibusan iti bala.”
“Pabus- oyannak, manong... Adu ti atrasona daytoy a tao kaniak.” “Dinak kabaelan a paltogan, Daniel,” inngirsi ni Edgar. Inasut ni Daniel ti paltog a salikadna. Inkasana daytoy. Immasideg ken ni Edgar sa impaturong ti paltogna iti daytoy. “Ti kunam mabutengak a mangpapatay kenka?” “Gapu ta dagiti laeng awanan gaway ti ammom a papatayen!” “Dinak am-ammo, Edgar...” nakatangtangken ti timek ni Daniel. “Ipakitam ti kinamalalakim. Labanannak iti tinnakiagan.” Agpingpingki dagiti sangi ni Daniel a kimmita ken ni John. “Ikkanka iti lima a minuto,” kinunana. Inyawat ni Daniel ti paltogna ken ni John, sa nakaparpardas ti tarayna a nagturong iti yan ni Edgar. Pinagsasarunona a dinanog ni Edgar.
Ngem nalisian ni Edgar ti maikapat a danog ni Daniel sa natengngelna ti takiag daytoy. Tiniritirna, imbaklayna sa imbautna ni Daniel.
NAKATURONG dagiti mata ni Gen. Miguel iti mapa ti Filipinas. Malaksid iti Metro Manila, adun ti kontroladona iti Ilocos Region, Cagayan Valley ken Mountain Province. Ngem ti Mindanao ken kaaduanna a paset ti Visayas, panatiko pay laeng ti Presidente dagita. Ngem namnamaenna a no mapagulimekda ti Presidente ken awanen ti mangngeg dagiti tao maipanggep iti daytoy, uray saandan a mapilit ti Presidente a mangiwaragawag iti isusukona, kumapuy ti resistansia dagiti mangsupsuportar iti daytoy. Siguradona a sumuko dagitoy ket isuna ti suportaranda.
Maymaysa a tao ti mabalin a makaatipa iti dayta. Ti Chief of Staff ti Presidente, ni Pat Coloma. Iti kinapigsa ti impluensia daytoy iti Presidente, bigbigen ken raraemen dagiti tattao. Inawaganda pay ketdi iti Little President.
Imbaonnan ni Edgar a mapan mangdutdot wenno mangpapatay ken ni Pat Coloma iti ospital ti Siudad ti Laoag a nangitarayanda. Sangatrak pay a soldado ti imbaonda nga ayuda. Agur-uray laengen iti damag manipud ken ni Edgar.
Apaman a matay wenno matiliw ti Chief of Staff, maiwaragawag iti sibubukel a pagilian ti napasamak daytoy tapno mapukaw ti namnama dagiti tropa ti Presidente
ket sumuko ken kumappengda laengen kadakuada. Sumuko met no kuan dagiti tropa a mangbambantay iti Malakanyang. Dayta ti kayatna. Dina kayat nga ibilin ti panangribbuotda iti palasio. Dina kayat a madadael ti pasdek. Simbolo ti demokrasia iti pagilian ken sentro ti bileg ti gobierno ti Malakanyang.
Ngem nakasagana a mangibilin iti pannakadarup dagiti kalabanda no saan a sumuko dagitoy. Napaisem iti nakasamsam-it. Inton agsapa no bigat, agmartsanton nga agturong iti Malakanyang. Bayabayento dagiti napilina a kameng ti gabinetena. Dina napengdan ti nagkatawa. Asino ti mangipapan nga agballigi daytoy a kudeta? Napaisem manen. Ngem nangin-inut a mapunas idi malagipna ni John Villa ken dagiti kakadua daytoy. Ania itan ti napasamak kadagitoy? “Shit,” nayesngawna. Isuda laengen dagiti nabati a parikutna. Innalana ti radio. “Papa to Zebra.... Papa to Zebra... can you hear me, over?”
Awan ti naurayna a sungbat. Nagrarek laeng ti radio. Liningayna dagiti taona a makumikom iti communication center. Isuda dagiti mangmonmonitor kadagiti mapaspasamak iti sibubukel a pagilian. Isu ti pakaibatuan ti amin a damag maipanggep iti insayangkatna a kudeta, kas koma no adda dagiti agdemontrasion kontra kadakuada, wenno no adda umalsa a kameng ti Armed Forces. “Papa to Zebra, can you hear me, over... acknowledge, over....” inulitna ti nagradio. Ngem kaskasdi nga awan ti simmungbat. Napataliaw idi adda agkatok iti kuartona. Maysa a kapitan. Inseniasna ti iseserrek daytoy.
“We have bad news, sir,” impasungad ti kapitan. Kellaat a nagdanag ti heneral ta ti saan nga isusungbat ni Edgar ti dagus a simmiplot iti panunotna. “Ania dayta?” ”Pinabettakda ti trak a nagluganan dagiti soldalo a backup iti raid iti Laoag General Hospital, sir... Maysa laeng ti nakalasat.” Napariaw ti heneral. “Ania ti napasamak?” “Adda kano immun-una a napan nangala ken ni Mr. Coloma, sir, kuna ti Direktor ti LGH.” “Ammotayo kadi no asino dagidiay, captain?” “Dagitoy ti impatulod ti Direktor ti ospital, sir...” kinuna ti kapitan. Impakitana iti heneral dagiti ladawan iti selponna.
Miningmingan ti heneral dagiti ladawan. Saan a makauni gapu ta agtigtigergeren dagiti dakulap ken dagiti bibigna. Imsiagen iti pungtotna. ”Isuda dagiti tao a pasapsapulko. Masapul a matayda!” “Mangi- dispatch- tayo kadi iti soldado wenno polis?”
“No... Kontakem ni Edgar. Kayatko a makasarita ita met laeng!”
NAGPATANGKEN ni Daniel iti sakit ti bukotna a naibuttuog iti semento. Sa di pay nakatakder, kinugtaran manen ni Edgar ti bakrangna. Uray la a nagasug iti sakit a nariknana. Nagngariet ken nagpatangken ta addayta manen ti maysa pay a kugtar. Sakbaya a manaltuog ti bakrangna a salbagen ti sapatos ni Edgar, insanggana ti takiagna sa ginammatanna ti saka ni Edgar. Agarup ginuyodna daytoy sa kellaat, ken napuersa, nga induronna. Kinagiddan dayta ti panagallinna nga immadayo. Timmakder a dagus.
“Papa to Zebra... Papa to Zebra...” nangngeg ni Edgar iti radiona.
“Saanmo kadi a sungbatan?” kinuna ni Daniel. “Ti boss- mo dayta... Ni Gen. Miguel...”
“Papatayenka pay nga umuna,” kinuna ni Edgar a naglidem pay ti rupana a nangkita ken ni Daniel. Nagkatawa ni Daniel. “Nalastogka latta!” Naggarakgak ni Edgar. “Kitaenta ti laingmo!” inkarit ni Edgar. Nakangirsi.
“Laglagipem ti orasmo, Daniel,” impalagip ni John. “Masapul a pumanawtayon ditoy.” Nagtung-ed ni Daniel. Dinarupna ni Edgar. Maysa a right straight ti binulosanna. Nagdisso daytoy iti rupa ni Edgar. Impasarunona ti kanigidna. Saan a pulos a nasiputan ni Edgar dagiti nagsasaruno a danog ni Daniel. Sipud pay nangrugida a nagtrabaho iti heneral, ni Edgar ti paborito daytoy. Isu ti patinayon a pakaipaayan dagiti nanam-ay a mision. Agbiahe iti first class iti eroplano. Maipaayan pay kadagiti luxury a lugan idinto a dagiti arigna agdaig a lugan ti maipausar kadakuada ken Jerky. Saan a mapunas ti rurod ni Daniel iti daytoy a tao. Isu a saannan nga ininggaan a dinanogdanog daytoy. Nalulon ti rupana
ni Edgar iti danog ngem saanna pay nga ininggaan. Agingga iti nagpusipos ni Daniel ket nakapigpigsa ti kugtar a nagdisso iti panga ni Edgar. Kasla salloy daytoy a nabaliktad iti semento.
Naibiat ti kimat. Sinaruno ti gurruod. Immasideg iti nakaidasayan ni Edgar. Saan nga agkutkuti daytoy. Kayatna a paltogan. Kayatna a papatayen. Ngem napaanges lattan iti nauneg. Nagwingiwing.
Nasaysayaat no agbiag tapno malagipto daytoy no kasano ti kabaelanna.
Inaprosanna ti rupana sa timmangad iti langit. Sinalbag dagiti dadakkel a tinukel ti tudo ti rupana.
Nagpusipos, sa timmaray a nagturong iti van. Limmugan iti sango. Inrikepna ti ridaw. In- shift- na ti lugan iti D sa pinaggunayna daytoy. Pinapardasna ti wiper. Di pay a nakaadayo iti dua a metro idi makitana ni Edgar a nakatakder iti masanguananna. Nakaiggem iti paltog, ken nakapaturong kenkuana.
Binaddekanna ti preno sa binerberna. Liningayna ni John nga adda iti passenger seat. “Padungparamon,” kinuna ni John. Immanges iti nauneg ni Daniel. Nangemkem. Saanen a nagtagtagari. Ad-adda ketdi a pinaberberna ti makita ti lugan sa rinuk-atanna ti preno. Nakapaspaspas ti lugan a nangdungpar ken ni Edgar. Naipuruak daytoy iti adayo. Insardeng ni Daniel ti lugan. Innalana ti paltogna sa dimsaag. Binuyatan ti nakapigpigsa a tudo. Nagturong iti nakapasagan ni Edgar. Agnguynguy-an daytoy. Iti radio, mangmangngegna ti awag. “Papa to Zebra.... Papa to Zebra... can you hear me, over...”
Agmimiray ni Edgar a mangkitkita kenkuana. Masiguradona a saanen a makalasat pay daytoy, ngem impaturongna latta ti paltogna iti daytoy sa kinalbitna ti gatilio iti namindua. Nagkuripaspas ni Edgar.
Inruarna ti selponna sa rinetratona ti nakabasbasa a naidasay a bagi ni Edgar.
Innalana ti radio ni Edgar sa nagsubli iti lugan. Pimmanawdan iti inaladan ti ospital. Mangmangngegda ti adu a wangwang iti saan unay nga adayo. Iti yaadayoda, nakitada ti dakkel a trak a nagbalin laengen a rurog ken naiwalang iti kalsada.
Nakataltalnada nga uppat. Nagsardengen ti panagsayasay ti dara iti luppo ni Jerky. Ipakitada koma iti ospital ngem ammoda a risgado ti kasasaadda. Ipanda laengen iti maysa a bassit a klinika nga am-ammo ni Daniel. “Papa to Zebra... Papa to Zebra... acknowledge, over...” nasingada iti radio nga innala ni Daniel manipud ken ni Edgar. Kinita ni Daniel ni John. “Sungbatak kadi, Manong John?” Nagtung-ed ni John. “Papa, can you hear me, over?” insungbat ni Daniel iti radio. Simngat ti ulimek. Awan ti simmungbat ngem adda karasakas ken anges a mangngegda.
“Ammok a mangmangngegnak, general. Ammok met a malasinmo ti timekko.”
“Apay nga adda kenka ti radio ni Zebra?” insungbat ti heneral. “Zebra?” inulit ni Daniel. “Kayatmo a sawen, ni Edgar?” “Wen!” Natangken ti boses ti heneral. “Natayen, sir...” Addayta manen ti ulimek. “Ammom kadi no ania ti napasamak kenkuana, general?” Mangarkaremkem ti timek. “Pasapulka kadagiti soldadok. Ammok nga addaka dita Laoag. Paanupka. Saannak a mailemmengan.”
“No saan a kinabaelan ni Edgar ken dagiti pasurotna ti nangtiliw ken nangpapatay kaniak, kasano nga agballigi dagiti
soldadom, general? Ni Edgar ti kalaingan a tiradormo... ngem ania ti napasamakna? Natayen!”
“General Miguel...” insallawat ni John. “Asinoka?” “Gayyemko,” insungbat ni Daniel. “Saanta nga agam-ammo, general. Ngem siguro, nangnangngegmon ti naganko...” “Sika ni...” “John... John Villa, general.” Kellaat, naibuang ti makatitileng nga ulimek. “Ammok a hostage- mo ti presidente, general. Ngem kayatko nga ibaga kenka a saanka nga agballigi a mangagaw iti turay.” Nagkatawa ti heneral. “Pengdandaka, general...” “Saanka laeng a nengngeg, nalastogka pay! Ania ti panagkunkunam iti bagim, superhero?”
“Maysaak laeng a gagangay a tao, general. But with common sense, with dignity and pride... Saanak a kas kenka a mangaramat iti bilegna iti dakes a wagas. Saanak a kas kenka a mangpapatay iti tao, inosente man ken saan, tapno laeng magunodmo ti kayatmo. Ngem kasta ti tao no dadduma,
general. No dadduma, mabulsekda kadagiti arapaapda. Saanda nga ammo ti ar-aramidenda. Isu nga ikkanka iti gundawaymo a makapagbabawi. Palubosam ni Presidente Acosta tapno saanka a maisagmak.”
Immuneg ken bimmannayat dagiti anges ti heneral. “Pudno a lastogka! Kagudua ti sibubukel nga Armed Forces of the Philippines ti iggemko. Adun ti kontroladok a probinsia ken siudad!” “But you don’t have the support of the people, general.” “Ken addaak pay laeng, general,” imballaet met ni Pat Coloma. “A lot of those in the upper echelons of the Armed Forces of the Philippines still listen to me, general... and I could activate them.” “Naladawkan, Mr. Coloma.” “I don’t think so, general. Agsiputka.” “Your president will die soon...” “You don’t have the guts to do that.” “Watch me, in less than 24 hours, your president will die.” “And the people will revolt against you.” “I will have the full and complete confidence of the Filipino people.”
“Saanto a mapasamak dayta, general. Panatiko dagiti tao ken ni Presidente Acosta. No agkaykaysa dagiti umili nga agdemonstrasion kontra kenka...”
“Saanto a mapasamak dayta!” inyagaw ti heneral.
“Malaksid no rugiamon a papatayen dagiti inosente a tattao,” kinuna latta ni Pat Coloma. “Shut up!”
Naragsakan ni Pat Coloma iti nadlawna a kasla pannakastreknan iti panunot ti heneral. No agpungtot daytoy, al-alisto a makaaramid iti biddut, a mabalinda met a gundawayan.
“Am-ammoka, general. Adu dagiti inosente a tattao a pinaipaknim tapno laeng magun- odmo ti tarigagaymo. Ngem saanka nga agballigi ita.
Isu a palusotam laeng ti presidente, saandakan a saraken pay. Saandaka a papatayen. Ken kangrunaanna, gutigotek ti
presidente a mangipaay kenka iti exit visa to exile.” “F__k you! You are talking to the next president of the Republic of the Philippines! Give me some respect!”
“I would probably respect you more if you withdraw from your evil desire, general. Again, we are giving you a chance. Release the president... No saan, awagak dagiti heneral a napudno iti Presidente ket paribbuotko ti headquarters- mo.” “Agdardarepdepka laeng, Coloma!” Saan manen a nakateppel ni John. “Nangngegmo ni Mr. Coloma, general. Ikkandakayo iti gundawayyo a mangibabawi iti amin. Ruk-atam ti presidente ket ibilangtayo a saan a napasamak daytoy. No dimo kayat, agkikitatayton idiay impierno! Good night.”
“Ken patulodanka iti ladawan ti kalalaingan a mammapataymo, general,” impakamakam ni Daniel sa iniddepna ti radio.
Nagkuyegyeg ti selpon ni John. Inruarna. Adda mensahe manipud ken ni Deputy Bosworth. Linuktanna. “President Acosta is being held at Camp Lego. Rescue before morning. Otherwise, he will be killed.”
MINATMATAN ni Gen. Miguel ti ladawan ni Edgar. Nakakalub dagiti mata daytoy. Awan duaduana a natay a kas met dagiti pasurot daytoy ken ti sangatrak a soldado a naibaon a mangtiliw ken ni Pat Coloma. Natayda amin iti ima ni John Villa ken dagiti uppat a taona. Agtigtigerger iti pungtotna. Kayatna a terreden ti panangkamkamatna kadagiti dadakkel nga angesna ngem saanna a malapdan. Kayatna a mapapatay ti bunggoy daytoy a John Villa. Limada laeng, ngem makaanayda a mangisangbay iti buteng kenkuana.
Bassit laengen ti aramidenna, makapagtugawen a presidente. Ngem agingga iti sibibiag dagidiay a lima, saan nga agtalna ti nakemna. Nasken a maipapaknina ida.
Linuktanna ti ridaw ti opisinana sa pinukkawanna ti kapitanna. Nakaparpardas a simrek iti opisinana ti inayabanna. Inrikepna ti ridaw.
“Nangnangngegmo kadin ti nagan a John Villa?” sinaludsod ti heneral iti kapitanna. Nagtung-ed ti kapitan. “Naibaga ni Edgar, sir.” Nakemkem ti heneral dagiti sangina. Kasano nga ammo pay daytoy a kapitan? Nadiskarkulona kadi met ti kinatao daytoy a John Villa?
“Kayatko a maammuan ti amin maipapan iti daytoy a John Villa malaksid iti kina-CIA-na. Ammok nga adda ti inana ditoy Filipinas...” “Iggemtayo ti inana, sir... ni Mrs. Villa.” “Ania ti kayatmo a sawen?” “Nairamanda a hostage iti pannakatiliw ni President Acosta.” Imsiag a dagus ti heneral. “Saanen a ni Acosta ti presidente, ammom dayta? Siak, siak itan ti presidente!” Intudona ti bagina sa tinugtogna ti barukongna. “Sir...” “Baludtayo ni Mrs. Villa?” Nagtung-ed ti kapitan.
“Ket apay nga awan man laeng ti naipakaammo kaniak? What kind of a gaddem chain of communications are we following? I need to know everything. Every detail of what’s going on. Do you understand?” “Y-yes, sir...” “Get me, Anwar Kalifa or Miss Sarandi...” Nagdardaras ti kapitan a nangpidut iti telepono ti lakay. Nagdayal. “Yes, Miss Sarandi... Gusto kayong makausap ni general...” Inyawat ti kapitan ti auditibo iti heneral. Inawat ti heneral ti auditibo sa inseniasna ti iruruar ti kapitan. “Miss Sarandi,” kinuna ti heneral apaman a nairikep ti kapitan ti ridaw. “Yes, general... what can I do for you?” “Is it true, you have Mrs. Villa, the mother of John Villa?” “We have, sir... and also the son of John Villa...” “Apay a saanko man laeng a naammuan?” “Dagiti laeng dadakkel a banag ti kayatmi a pakariribukam, general. Ipabus- oymo a dakami ti mangtratar kadagiti babassit...” Nangemkem ti heneral ngem saannan nga intuloy ti panangsidirna ken ni Gloria Sarandi. Ti napateg, adda kenkuana ti ina ken anak ni John. Adda kenkuana ngarud ti alas. Saan a ni John Villa ti agintatangken kenkuana.