Saludsodem ken ni Apo Hues

SALUDSOD:

Babaen ti korte, inadaptar ti kapiduak a ni Kasinsin Belen (saanna a pudno a nagan) ni Benjamin (saanna a pudno a nagan) a kas pannakaburidek dagiti tallo nga annakna a babbai. Pinadakkel, pinagadal ken inikkan ni Kasinsin Belen iti nasayaat a panagbiag ni Benjamin. Ngem ni Benjamin, nalaing met a makibarkada, ket no makainum, pagsasawanna pay ni Kasinsin Belen agraman dagiti annakna a babbai. Agtawen itan ni Benjamin iti tallopulo. Naibaga pay iti naminsan ni Benjamin a mapataynanto pay ketdi dagiti kabbalayna.

Ita, panggep ni Kasinsin Belen a dinanto patawidan ni Benjamin kadagiti mabatina a sanikua. No mabalin, papanawennan ni Benjamin iti pagtaenganda. Pangngaasim kadi, a, Apo Hues, ta balakadam man ni Kasinsin Belen.—Antonia ti Ilocos Sur

SUNGBAT:

Maipanggep iti panagtawid iti sanikua, dua a kita ti dokumento ti mabalin a maaramid. Umuna: ‘tay Maudi a Bilin ken Testamento (Last Will and Testament) a manotarioan ken matestiguan ti tallo a tattao. Ken ‘tay maikadua, ‘tay isurat babaen ti ima ‘diay mangpatawid. Ti umuna, aggastoska bassit ta notarioan ti atorni ti dokumento. ‘Diay maikadua, naisurat babaen ti ima ( handwritten), awan ti masapul a testigona ken saanen a manotarian. ldiay dokumento, ikabil ni kasinsinmo a Belen no asino ti papanan dagiti sanikua, daga, balay, kuarta, kdp. Maikabil ti nagan dagidiay papananda. Ket ‘diay tinagibina (ni Benjamin), ikabilna nga awan ti maited kenkuana gapu ta narungsot unay kenkuana ken kadagiti tallo a babbai nga annakna ken panggepna pay a patayen ida.

Dayta man ti sagudayen ti Artikulo 919, Bilang 6 ti Kodigo Sibil ti Filipinas (Civil Code of the Philippines). Maysa pay a panangikkat wenno panangpaawan iti tawid ti loko a tinagibi ket ‘tay panangileppas iti legalidad (Revocation) ti panangadaptar iti daytoy a kas legal nga anak (Adopt) gapu ta panggepna a papatayen ti nangadaptar kenkuana (Artikulo 348) wenno ungungtan wenno pagsawsawanna iti nakaro ti nangtagibi kenkuana (Kodigo Sibil ti Filipinas ken Seksion 1, Paglintegan 100 ti Paglintegan ti Korte ditoy Filipinas (Revised Rules of Court of the Philippines). Mabalin pay a maidarum iti kaso kriminal gapu iti panangranggas kadagiti babbai (Violence Against Women wenno Akta Republika No. 9262).—O

(Adda kadi problemayo a legal? Ipatulod iti: “Saludsodem ken ni Apo Hues,” c/o Judge Joven F. Costales (Ret.), 51 E. Rimando St., Brgy. Natividad, Naguilian, 2511 La Union. Wenno ipatulod babaen ti e-mail iti: jov_cos@yahoo.com wenno iti bannawagmagazine.

mb@gmail.com. Ilanadyo koma ti kompleto nga impormasion wenno banag a mainaig iti problemayo.)