Ad-adda a Naballigi ni Bela nga Scripwriter Ngem Kas Aktres?

N ASALUDSODMI dayta, ‘bagis, ta daytoy kinamannuratna ti pakakumikoman ni Bela Padilla. Ad-adda a dagiti sinuratna ti maipelpelikula, ngem ti agparang isuna iti pelikula. Ala, no sadino ti pagragsakan ni Bela, suportarantayo, a. Malaksid a nabaybay-anen ni Bela ti kinaaktresna, awan pay ketdin ti tiempona iti lovelife. Iti pannakasursurat daytoy a tiempo ti Aldaw Dagiti Puso, awan ti date ni Bela ta adda trabahoda kadagiti kakaduana iti maysa manen a proyekto a pelikula. Pudno a napinget a kas mannurat, aya? Parikut ita dagiti direktor, ken artista payen, ti kinabassit dagiti agbuybuya iti sine. Adu a pelikula ti ngilngilawen. Saantayon nga agdakamat. Ita, ti nakita ni Ogie Diaz, saan a nasayaat ti Mierkoles a damo a panangipabuya iti pelikula ta katibok ti trabaho. Marugian kano koma ketdi iti weekend wenno arinunos ti lawas. Mabalin met. Iti biangko, ‘bagis, masapul nga akuen dagiti direktor ken artista a Filipino a nagbaliwen ti tiempo. Adun a platform ti paggapuan ti entertainment-da, kangrunaanna ti social media. Iti biang ti pelikula, addan dagiti pelikula a bassit laeng a tiempo ti palabsen, mabuyan iti cable. Sa adda payen dagitit pakabuyaan a kas iti Netflix. Ken siempre, kangrunaan latta a pagawis iti agbuya ket ti kalidad. Nangruna ti kalidad ti istoria. No kas iti “Bato” a pelikula a nagbidaan ni Robin Padilla, kuna ngarud dagiti pada a miron, uray libre, awan ti mapan agbuya.—O (Chairman ni Kabagis Eloy iti Hunta Direktiba ti FAMAS, Host-Producer ti Celebrity Hour Media Forum, ken Trustee iti Aliw Awards Foundation, Inc.— AST)