Crush ni Krystal ni Marco
INAKO ni Krystal Reyes a crush- na ni Marco Gumabao a kaparehana iti digital a pelikula nga “Apple Of My Eye.” Kuna ni Krystal a nasingpet para kenkuana ni Marco ket pasado daytoy kadagiti pagrukodanna iti maysa a dream guy.
Nakaay-ayat a kasarsarita ni Krystal a madlaw nga ubing pay laeng ken medio maud-udi iti panawen ta tagaprobinsia ken inakona a dina kabesado dagiti ramit iti teknolohia. Naaddaan laeng daytoy iti selpon nga addaan iti kamera idi nagartistan daytoy banag a nakatulong kenkuana ta agarup kastoy ti karakterna nga Apple iti nasao a digital film.
Mismo a ni Bela Padilla a nangsurat iti “Apple Of My Eye” ti nangpili ken ni Krystal ta masapul a baro a rupa ti agakem. Apagisu kano ni Krystal iti pinarnuay ni Bela a karakter a lumaban ngem
sweet ti aura- na. Karit met para ken ni Krystal ti papelna ta daytoy ti umuna a pagakemanna a kangrunaan a bida a babai ken umuna a nataengan nga akemna ta nangrugi daytoy a child star.
Iti panangidirehe ni James Mayo para iti Dreamscape Digital, mabuya daytoy iti IWant. Adda gayam director’s cut ti digital a pelikula a “Glorious” a pagbidaan da Angel Aquino ken Tony Labrusca iti panangidirehe ni Connie Macatuno. Iti nasao a bersion, ad-adu dagiti mabuya nga eksena ti innayat da Angel ken Tony. Kayatna a sawen, no napagsasaritaan ti nakaro nga innagekda iti immuna a bersion ti pelikula, adadda man ket ngata itan a pagsasaritaanda dagiti eksena ti innayat nga adda laeng iti director’s cut. Wen, ta kuna ti direktor, sungbatan ti nasao a bersion ti saludsod no naglabus wenno saan ni Angel. Isu met la a no mapagsasariaan ti pelikula a “Glorious,” makaisisem da Tony ken Angel. Pudno ket ngata a ‘glorious,’ aya?—O