Awan ti Agbisin Ditoy Lugarmi
MARSO 13, 2020 ti naudi a panagklasemi iti Cristina B. Gonzales Memorial High School, Bucay, Abra, ta imbilin ti prinsipalmi (Ma’am Jasmine “Jaz” P. Bringas) kadagiti ubbingmi a saandan a sumrek iti Lunes, Marso 16 ket agtalinaedda laengen iti balbalayda. Mangrugi ngamin iti umuna a segundo ti sumuno nga aldaw, maisaaden ti sibubukel a pagilian, karaman ti probinsia ti Abra, iti Enchanced Community Quarantine (ECQ) gapu iti panagsaknap ti sakit a COVID-19.
Daytoy quarantine a maigapu iti COVID-19 ti nangbaliw a namimpinsan iti wagas ti panagbiag dagiti umili.
Ngem ditoy lugarmi a Pagala, Bucay, (Sitio Dardaraoas), dimi unay narikna dayta epekto ti quarantine wenno ECQ (Enhanced Community Quarantine). Ditoy ngamin lugarmi, saan unay nga adu ti balbalay ken saan unay nga agaassideg ti kaaduan. Agrikultura met ti pagbiagan ti kaaduan ket nawaya latta dagiti tattao a mapan agiwayway iti tarakenda a kalding, baka, nuang ken dadduma pay a dingo. Kadagiti awan igatangna iti sida, adu ti pagalaan iti taraon iti aglawlaw. Iti karayan a sakup ti barangaymi, adu ti maala dita a lames, bennek, bisukol, balangeg, ken samimit wenno aba. Nupay kasta, nakaawat latta met amin a bumarangay iti bagas ken groseria.
Wen, awan ti agbisin ditoy lugarmi iti daytoy idadateng ti pandemia (adukami pay ketdi a limmukmeg). Nakaladladingit laeng a panunoten nga adda met dagiti kakailian nga adda kadagiti “nararang-ay” a lugar wenno siudad aglalo iti Metro Manila ti nagbalin a kalbario ti kasasaadda. Adu ti nagkuna a saanda a matay iti bayrus ngem matayda met iti bisin. Adu pay kadakuada ti di naikkan iti tulong pinansial iti babaen ti SAP (Social Amelioration Program) ti gobierno.
No am-amirisen daytoy a pagteng a paspasaren ita ti sangatawan, adda dagiti nabalitokan nga adal nga impalagipna kadatayo a kas iti kinapateg dagiti mannalon ta isuda la ngarud ti agpatpataud iti pagbiag. Iti kastoy pay a panawen a nataltalged ‘tay adda pempenna nga apit a taraon ken dingo a partien) ngem ‘tay adda pempenna a kuarta.
Segun met iti maysa a nabasami, nasaysayaatto kanon ti biag ti sangatawan kalpasan daytoy a didigra ta pagbalinennatayo a natibtibker. ken ital-ona ti kinataotayo. Ala, ket nagsayaaten no kasta.—O