Daddy Balo
iti lamesita, inyalus-osko ti bagik tapno agsanggirak iti sopa, sa sinungbatak ti awagna.
“Immawagakon ta puro ‘thanks’ met manen ti isungsungbatmo.”
“Thanks.”
“’T-ti ania?”
“For the call… joke lang,” inkatawak. “Komusta?” Plain housewife, dayta ti panangiladawan ni Dindi iti kasasaadna. Kalpasan a nagturpos iti kolehio, saanen a nakabirok iti trabaho ta nakidenna iti maysa a negosiante nga aglaklako iti spare parts ti lugan iti ilida nga Apalit. Saan kano a palubosan ti lakayna nga agtrabaho ket isu laengen ti nagaywan iti kakaisuna nga anakna a lalaki nga agtawenen iti innem uray kasano ti ayatna nga agtrabaho koma met iti Manila. Tapno panawanna laengen ni lakayna nga adda kano ilimlimedna a kabit.
Kas iti ninamnamak idi makariingak, addan dagiti komento ni mama kadagiti ladawan ni Belle a naipaskil iti FB. Pinusuanna amin a ladawan. Saan pay a napnek, inawagannak. Maragsakan la kano unay a naragsak met ti paboritona a napintas a reyna nga apokona. Uray awanen ni Belen nga inana, insennaayna.
LUNES, dua nga aldaw sakbay ti bisperas ti Paskua, saanakon a simrek iti opisina. Rabii ti biahemi kadagiti annakko nga agpa-Ilokos, isu a nagmalmalemak a nagidalimanek iti balay ken nangisagana kadagiti kargami nga agawid. Immununan a nagpakada ni Manang Sol a nagawid iti Malate. Imbagak kenkuana no makasangpetkami manipud idiay Ilokos, agderetsokaminto met iti Malate ket sadiay ti pangpalabsanmi iti bisperas ti Baro a Tawen.
Daytoy ti umuna a Paskua nga awanen iti pagtaenganmi ni Belen. Malidayanak unay a makaanag iti dayta, ken makapanunot a dakkel a pannakaikawa daytoy kadagiti annakmi a pinanawanna.
Naisaganakon dagiti bagahemi iti malem. Intarapnosko pay nga inleppas ti naawatko a sideline a trabaho manipud ken ni Ninang Zita, isu pay a sukat ti magastos iti panagbakasionko ti masingirko. Agalas singkon idi makarubuat dagiti ubbing. Eksaktonto a sumangpet ni Bobby iti alas sais manipud iti opisinana. Sapaenna ti rummuar, kas inkarina idi kiniddawko nga isun ti mangitulod kadakami nga agaama iti terminal.
Karuruarko iti banio idi agkiriring ti selponko. Ni Nida.
“Agawidka gayam Ilokos, dinak pay isurot. Uray mapan ag-swimming la koma.”
“Umaykan, a, tapno makitam manen ni Belle.” “Seriosoka met. Ngem nasakit latta ti nakemko ta never nga inawisnak idiay Ilokos, uray pay idi.”
“Uray awisenka idi, ammok a dinaka palubosan ni papangmo.”