Daddy Balo

“Dad, they are girl… friends.” Sakbay a mapitikko ti darangidong ti anakko a lalaki, immasideg ni Belle sa immarakup kaniak.

“Dad, when will Tita Weng call you?” sinaludsodna.

“Anytime, just wait,” panangyandingayko. Ngem diak ammo no kaano, ta amangan ket no inkasaren ti nobiona a Pranses.

Apaman a makarubuatak, inkanayonmin ti nangrabii. Isu pay a magastos no yawisda manen ti agJollibee. Pinagsanguanda ti naigisar iti sibuyas a corned beef; binagik met nga inibus ti natda a sidami itay pangngaldaw nga adobo nga utong nga adda laokna a tokwa.

Agalas sieten idi sumangpet ni Bobby nga umay mangsukon kadakami. Natrapik kano iti wangawangan ti Meycauayan iti expressway. Ngem mangnamnama ketdi a makamakammi ti alas dies a biahemi iti estasion ti Partas. Adda impareserbak a tugaw isu nga awan pagdanagak a mataktak ti biahemi ta ammok a kaburnok ita dagiti agawid iti probinsia kadagiti terminal iti Cubao.

Naibayag iti kagudua oras ti ipapanaw ti paglugananmi a bus iti terminal. Adda kano nagdoble a numero ti pagtugawan ket agparikut ti barbasan ken butiog a kundoktor no asino ti paturayenna. Kapilitan a nagpabus-oy ti babai nga immununa a nagreklamo ta nakitana a kadua ti kapadana iti numero iti tiket ti bukodna a pamilia. Naimbag ta adda saan a simmangpet a nagpareserba iti tugaw ket isun ti nangala iti puesto daytoy iti likud.

Adda laeng iti sanguananmi a tugaw ti pasahero a lalaki a nairaman iti doble a numero ti tiket. Nakaaruat daytoy iti ngumisit nga asul a jacket a nabordaan iti logo ti Malakanyang iti barukongna. Kadua daytoy ti asawana iti akinkanawan a paset idinto nga agabay iti tugaw dagiti dua a lallaki a tinedier nga annakda iti kanigid.

Kastakami koma met, kas iti dati; uppatkami iti naudi a panagawidmi idiay Narvacan. Pinagsaggaysaanmi idi ken Belen a sinaklot dagiti ubbing isu a dua laeng a tugaw ti binayadanmi. Ngem ita, inyalaak ida iti saggaysada a tugaw tapno diak marigatan a mangsaklot kadakuada.

Agabaykami ken Belle iti kanawan idinto nga adda ni Normandy iti kanigid, iti dumna iti pasilio tapno mabantayak. Kaabayna ti natayag a baket a puraw aminen a buokna ken adu ti alahasna. Naisem daytoy a nangbuybuya kadakami a nangurnos kadagiti tugawmi. Kinablaawanna ni Normandy iti abayna ket immisem met ti ubing.

“Ang pogi nitong katabi ko…” Tiningigan ti baket a kinita ni Normandy. “Nasaan pala si mommy, iho?”

“Nasa abrod po!” insungbatko a dagus ngem gimmiddan met ti inosente a sungbat ni Normandy.

“Patay na po!”

“N-namatay sa abrod?”

“Hindi po. Patay na po si mommy bago po ako nag-birthday.” Pinagsinnublatnakami ken Normandy a kinita ti baket. Nagtungtung-ed sa umis-isem a nangmira manen iti rupa ni Normandy.

“Biyudo na po si daddy.” Nakigtotak iti insungbat ni Normandy ta diak ammo a nadakamatko dayta a balikas kadagiti ubbing.

“Ow…” Siak manen ti kinita ti baket. Inisemak.

“But he has girl… friends,” insampitaw ni Belle a dumdumngeg met gayam. “Ow,” kinuna latta ti baket nga ad-addan a nabennat ti isemna ken naggaraw dagiti naingpis a kidayna. “Napakabibo ng mga anak mo. They’re so cute.”

Saanen a nagunton pay ti baket, ngem ammok a maay-ayatan ken ni Normandy a pasaray arasaasanna, a pagkatkatawaan met ti ubing.

Nagandaren ti lugan, kinagiddan ti pannakapaitayab iti stereo ti naliday a kanta ni Gary Valenciano a para Paskua. Insadag ni Belle ti ulona iti bakrangko. Madamdama pay, dimmagsen ti bagina a kas kadagsen ti simken a riknak iti daytoy a panagawidmi.

Kas iti nabasak a salaysay iti Bannawag, ti selebrasion ti umuna a Paskua nga awanen ti maysa nga ipatpateg iti biag ti kalilidayan a sagrapen dagiti naulila. Kas dagiti napalabas a panagkasangay dagiti ubbing, ti panangbisitami ken ni Belen iti kamposanto a nakaidulinanna ken panagpiesta iti lugarda iti Malate, maysa manen daytoy a panangkarit iti kabaelan dagiti ubbing a manglipat iti liday iti kaawan ti inada.

Barbareng, kunak, nga iti daytoy a panagbakasionmi, mailiwliwagda ti liday ken iliwda iti inada iti pannakakitada manen ken ni lolada ken kadagiti kakasinsinda.

Simken ti nakaro nga iliwko ken ni baket a kaduak koma met ita nga agbiahe, ken kaduak iti lugarmi iti Nanguneg, ket inturogkon.

(Maituloyto)