Lemongrass-Ginger Chicken ken Petsay

DAYTOY potahe nga idasartayo ita, naggapu iti Food and Nutrition Research Institute (FNRI) ti Department of Science and Technology (DOST). Nairaman daytoy iti 2024 Menu Guide Calendar iti tema a “Delights for your Heart: Healthy Recipes for Individuals with Hypertension.”

Sapay koma ta agballigi ti ahensia iti daytoy a gannuat tapno matulongan dagiti agsagsagaba iti hypertension wenno hayblad. Namnamaen ti ahensia a makatulong daytoy kadagiti health worker ken caregiver a mangplano iti kanen dagiti addaan iti hypertension.

Padasentayo ngarud ti agluto iti “Lemongrass-Ginger Chicken with Pechay.”

Dagiti Kasapulan:

3 tasa a danum

1 puon, baraniw bulong/barunibod (lemongrass); nadekdek, sigloten 2 tasa, onion leeks

1/3 tasa, laya; nadekdek

¼ tasa, sibuyas a nalabaga; naiw-iwa

½ kutsarita nga asin, iodized

¼ kutsarita, black pepper (pimienta); nadekdek

5 pedaso a karne

(luppo) ti manok; maikkat ti kudilna

2 ¾ tasa, petsay; masteam

Para iti Sauce:

1/2 tasa a digo (ti naipaburek a manok) 2 kutsara, toyo (soy sauce) 1 kutsara, tubbog ti kalamansi; kappespes 1 kutsara, laya; nagadgad

Para iti Manok:

Mangala iti kaserola. Ikabil ti danum, baraniw, onion leeks, laya, sibuyas, asin, pimienta, ken manok.

Kaluban ken paburkan iti 25 a minuto. Adawen ti karne ti manok sa ipaigid.

Panangisagana:

Mangala iti malukong (bowl). Paglalaoken ti ½ tasa a nagpaburkan iti karne ti manok, toyo (soy sauce), tubbog ti kalamansi, ken laya. Daytoy ti agpaay a pagsawsawan (dipping sauce).

I-brush ti naaramid a sauce iti karne ti manok tapno saan a mamagaan ti manok.

Idasar ti manok agraman 2 kutsara a dipping sauce, ½ tasa a nagpaburkan iti karne ti manok (digo) agraman ti petsay.

Addaan ti lemongrass wenno baraniw (barunibod) iti diuretic compound a makatulong a mangikkat kadagiti nalabes a sodium ken fluid iti bagi tapno mamantener ti nasayaat a presion ti dara.—O