300 KA NEGO-KARTS GIAPOD-APOD

Bisaya - - Young Blood Writer - Ni GWARGZ P. MONREAL

USA ka dakong okasyon nga dili gyod malimtan sa taga probinsiya sa Davao del Sur, mao ang pagpanghatag sa Department of Labor and Employment XI og tresentos (300) ka Nego-Karts o Negosyo sa Kareton. Usa kini ka bisikleta nga adunay gitakin nga karo o sidecar.

Ang proyekto nga nagkantidad og P3,015,000.00 ka pesos, giapodapod kaniadtong Mayo 11, 2018 didto sa Davao del Sur Coliseum nga nahimutang sa Siyudad sa Digos.

Ang gipanghatagan sa maong proyekto naglangkob sa upat (4) ka asosasyon nga mao ang Digos Public Market Ambulant Vegetables & Fruit Vendors Association (125 ka membro) sa Digos City Public Market; Guihing Ambulant Vendors Association (26 ka membro) sa Guihing, Hagonoy, Davao del Sur; Bansalan Gulayan ng Bayan Association (62 ka

membro) sa Poblacion 2, Bansalan, Davao del Sur ug Laminusa Muslim Vendors Association (87 ka membro) sa Acaciahan, Zone 1, Poblacion ug Laminusa Village, Punta Biao, Cogon, Digos City.

Sa mensahe ni DOLE XI Regional Director Raymundo G. Agravante, siya nag-ingon nga ang maong ayuda pinasikad sa mando ni Presidente Rodrigo Roa Duterte nga mao ang pagpapaspas sa hinabang sa gobyerno ngadto sa gagmayng mga magpapatigayon aron modako ang ilang kita, monindot ilang panginabuhi ug makaamot sa pagtubo sa ekonomiya sa nasod.

Dugang pa ni Direktor Agravante nga aduna pay daghang proyekto alang sa taga Davao del Sur nga atua nag-ungot sa opisina sa DOLE XI kay naghulat pa sa mga dokumentong gikinahanglan gikan sa mga benepisyaryo niini. Iyang giaghat ang mga aplikante sa pagpadali og hatag sa kulang nga mga dokumento.

Sa iyang hinapos nga mensahe, iyang giawhag ang mga benepisyaryo sa 300 ka Nego-Karts nga unta ila kining ampingan kay kini seguradong makahatag sa ilang panginahanglan nga pagkaon sa lamesa, edukasyon sa mga anak, tambal, bayad sa suga og tubig, ug uban pa.

Dako pod ang pagpasalamat ni Direktor Agravante sa probinsiya sa Davao del Sur pinangulohan ni Gobernador Douglas Ra. Cagas nga

mihatag og pinansiyal nga kabahin alang sa kalamposan sa maong proyekto. Ang pakiglambigit sa opisina sa gobernador ngadto sa Department of Labor and Employment nga opisina sa Davao del Sur (DOLE DSFO), gipaagi sa Davao del Sur Provincial PESO kun Public Employment Service Office nga gipangulohan ni Rolly M. Impas.

Dihang gihinabi sa media, si Paul V. Cruz, ang hepe sa Technical Services and Support Division (TSSD) sa DOLE Rehiyon XI nagkanayon nga ang mga Nego-Kart gipanghatag usab ngadto sa ubang probinsiya sa Rehiyon sa Davao sama sa Davao City, Davao del Norte, Davao Oriental ug Compostela Valley Province. Ang wala pa mahatagi mao ang bag-ong namugna nga probinsiya sa Davao Occidental nga kanhi tipik sa Davao del Sur.

Si Hepe Paul V. Cruz namahayag sa media nga aron makadawat usab ang ubang gagmayng negosyante, makiglambigit lang sa opisina sa PESO nga anaa sa kada munisipyo o siyudad. Ang programa sa DOLE nga gitawag og DILP o DOLE Integrated Livelihood Program alang lamang sa mga asosasyon o gagmayng kooperatiba.—

Ang disenyo sa Nego-Karts nga gipanghatag sa DOLE XI ngadto sa taga Davao del Sur.

Si Paul V. Cruz, OIC-Chief sa Technical Support and Services Department sa DOLE RO XI nga gikahinabi sa taga media.

Tipik sa 300 ka Nego-Karts nga giparada sa plasa sa

Si DOLE XI Regional Director Raymundo G. Agravante nga nagbatbat sa iyang mensahe ngadto sa mga benepisyaryo sa Nego-Karts diin anaa usab sila si Paul V. Cruz nga OIC-Chief sa TSSD, DOLE XI (wala) ug Engr. Reynaldo Dennis V. Badilles nga Hepe sa DOLE Davao del Sur Field Office (DOLE DSFO).

Tipik sa mga membro sa upat (4) ka asosasyon nga mga benepisyaryo sa Nego-Karts.

Newspapers in Cebuano

Newspapers from Philippines

© PressReader. All rights reserved.