(ANG INYONG KAPALARAN SA HUNYO 6 – 12, 2018)

Bisaya - - Young Blood Writer - Ni Madam Gertrudes-Lee

PISCES – (Pebrero 20 – Marso 20) – Niining semanaha makatublaw sa personalidad ang imong ihat-ad nga ideya. Mopatigbabaw ang imong talagsaong karisma. Daghan ang makabig sa imong maayong mga suhestiyon. Makahimamat kag binuhat nga mounong kanimo. Suwerte mong adlaw ang Biyernes ug palaran mong numero ang 7, 6, ug 5. ARIES – (Marso 21 – Abril 20) – Adunay mohapuhap sa imong kasingkasing. Molagsik pagbalik ang imong panglawas. Makadawat kag pagdayeg sa maayo mong binuhatan. Suportahan ka sa imong pamilya sa transaksiyon nga imong sudlan. Kusog ang imong sex appeal. Domingo ang suwerte mong adlaw ug 3, 4, 2 ang palaran mong numero. TAURUS – (Abril 21 – Mayo 21) – Niining semanaha mokusog ang imong immune system. Motaas ang lebel sa imong kadasig. Molig-on ang imong pagsalig sa kaugalingon. Dako ang posibilidad nga moasenso ka sa umaabot. Salig kanunay sa Diyos. Tabunokon ang romansa. Suwerte mong adlaw ang Martes ug palaran mong numero ang 9, 1, 8. GEMINI – (Mayo 22 – Hunyo 21) – Mahusay mo na ang kaguliyang sa pamilya. Mapabalik mo ang kanhing kasadya sulod sa panimuyo. Mahinayon ka sa pagtrabaho sa abroad. Matuman na ang plano mong magpalit og kabtangan. Makahibalag kag binuhat nga mosabot kanimo. Biyernes ang suwerte mong adlaw ug 4, 5, 9 ang palaran mong numero. CANCER – (Hunyo 22 – Hulyo 22) – Niining semanaha adunay makabig pagsunod sa maayo mong ehemplo. Makalikay ka sa kabilinggan sa panglawas. Angay lang sundon ang gitambag sa doktor. Mohatag kag maayong rason. Masumok kag talagsaong romansa. Suwerte mong adlaw ang Miyerkoles ug palaran mong numero ang 6, 2, ug 3. CAPRICORN – (Disyembre 22 – Enero 21) – Niining semanaha mapukaw ang imong kadasig sa arte. Tabunok ang imong malalangong imahinasyon. Dako ang paglambo sa imong estilo. Mosamot kadaghan ang imong magdadayeg. Makalikay ka sa tentasyon nga mokabig kanimo. Suwerte mong adlaw ang Sabado ug palaran mong numero ang 9, 2, ug 3. LEO – (Hulyo 23 – Agosto 23) – Daghan ang makamatikod sa imong gihuptan nga katakos sa pagka lider. Makahimo kag proyekto nga wala mabuhat sa uban. Mogahin kag panahon nga makaserbisyo sa simbahan. Buligan sa Ginoo ang imong pagpaningkamot. Mainit ang romansa. Lunes ang suwerte mong adlaw ug 1, 8, 2 ang palaran mong numero. VIRGO – (Agosto 24 – Septiyembre 23) – Niining semanaha ipadaplin mo ang negatibong emosyon. Pakadak-an mo ang pag-ugmad sa imong personalidad. Modapig ka sa matarong. Di ka magpanuko sa pagsulti pabor sa kamatuoran. Makighuygo ka uban sa mahimayaong pakigtagay. Suwerte mong adlaw ang Domingo ug palaran mong numero ang 6, 5, 3. LIBRA – (Septiyembre 24 – Oktubre 23) – Ipadayon mo ang imong pagpanukiduki. Kinahanglan nga makahimo kag kongklusyon sa imong teyoriya. Magmatngon ka sa imong mga lihok kay adunay gustong magbutang-butang nimo. Ipadayon mo ang kanunayng pag-ampo. Dugosnon ang romansa. Sabado ang suwerte mong adlaw ug 2, 4, 9 ang palaran mong numero. SAGITTARIUS – (Nobiyembre 23 – Disyembre 21) – Masabtan mo ra ang gipangatarongan sa imong minahal. Hatagan nimog higayon nga siya makahatag sa iyang opinyon. Di ka lang molugak sa paggiya kaniya. Walay makababag sa maayo mong gilaraw. Daghang makaalinggat sa imong kaanyag. Huybes ang suwerte mong adlaw ug 5, 6, 4 ang palaran mong numero. SCORPIO – (Oktubre 24 – Nobiyembre 22) – Niining semanaha magmasanagon ang imong pagpanglimbasog. Dako ang posibilidad nga mokusog ang halin sa imong tindahan. Madugangan ang imong mga kostumer ug kini mahimo mong mga suki. Makombensir mo ang imong kapikas. Suwerte mong adlaw ang Martes ug palaran mong numero ang 3, 8, 7. AQUARIUS – (Enero 22 – Pebrero 19) – Angayng likayan mo ang pagpakiglantugi. Maglisod ka pagkombensir sa uban. Way makadaog sa lantugi. Magbugno ug mag-ilogay ang pagbating pisikal ug espirituwal. Maningkamot ka pagsubay sa matul-id nga dalan. Matagbawon ang romansa. Miyerkoles ang suwerte mong adlaw ug 4, 1, 8 ang palaran mong numero.

Newspapers in Cebuano

Newspapers from Philippines

© PressReader. All rights reserved.