Mata Sa Hustisya

Bisaya - - Showbiztsika - Nobela ni Oliver P. Flores

HAPIT na mokadlawon nga namauli sila si Detektib Monsour Morales ug Malou Sayson. Mikuyog si Malou sa hinigugma sa giabangang apartment ni Monsour. Minghapit man god sila sa usa ka talyer nga 24 hours nga bukas aron magpatapak sa mga buslot sa kotse nga Vios ni Monsour nga naigo sa pagpamusil sa mga tawo ni Jeffrey Sandoval.

“Unsa na, Darling? Di ba delikado gyod kay hangtod imong kinabuhi nabutang man sa kapeligro tungod nako? Makigminyo gihapon ka nako?”

Gigakos ni Monsour si Malou nga naghigda sa kama sulod sa kuwarto. Nag-ilis na siyag nipis nga night gown. Nawalis ang sidsid sa gown ug nakita ang hamis, puti ug lingin nga mga paa sa dalaga. Nakaligo na sab siya ingon man si Monsour.

“Kay ngano, Sweetheart, nakamatikod ka ba nga nahadlok ko? No way. Gidawat ko na, with all my heart, ang imong trabaho. Andam kong mabiyudag sayo, uy!”

Nagpangidhat si Malou. Ug si Monsour nga wa mobatig kakapoy niadtong tungora, mitikubo ug gihagkan sa mga ngabil si Malou. Mikabyon ang dalaga sa liog sa detektib. “Pagnga ang suga, Sweetheart!” Mihagawhaw si Malou. Gipawong ni Monsour ang suga sa kuwarto. Milunop dihadiha ang kangitngit. Miigot ang kama, sa sinugdanan hinay lang. Sa nadugay na, nagkakusog kini.

Taas na ang Adlaw apan nagpabiling nanghigda sila si Monsour ug Malou. Apan nagmata na sila. Naghilom ang detektib. Layo ang gilabogan sa iyang hunahuna. “Naglisod ka, no, Sweetheart?” Mibakod si Malou ug gitapis sa hubo niyang lawas ang habol. Sunod nga mibangon si Monsour, gikab-ot ang tualya nga diha sa duol ug iyang gitapis sa hubo usab niyang lawas. Gikab-ot ang kaha sa Marlboro ug lighter nga gipatong sa lamesita sa may ulohan sa kama. Mipabuhot dayon sa aso ang detektib human niya dagkoti ang sigarilyo.

“Very complicated ang kaso ni Angelo Lopez.” Nanghupaw ang detektib.

“Bitaw. Daghang anggulo nga angay susihon. But I’m sure

nga masulbad mo kini. Dako ang pagsalig ko sa imong katakos sa paniktik, Sweetheart.”

Miyango-yango si Monsour. Iyang ginusnos sa ashtray ang upos na nga sigarilyo. Mitindog siya.

“Mag-andam na ko, Darling. Moadto na ko sa lugar nga among gikasabotan ni SPO1 Homer Calderon. Ikaw?”

“Mopauli una ko sa giabangan kong apartment. Mosulod ko sa trabaho ron. Magtaksi lang ko. Gamita ang akong Innova.”

Duna usay kaugalingong kotse si Malou. Anak siya og adunahan, bugtong pa gyong anak. Atua sa London manarbaho ug magpuyo ang iyang mga ginikanan. Dugay na siyang gipetisyonan sa iyang mga ginikanan apan wa siya moapas sa London tungod kang Monsour. Gihigugma niya pag-ayo ang detektib. “Salamat. Asa ka mopauli unyang gabii?” “Dinhi. Gusto kong makahibawo sa lakaw sa kaso ni Angelo Lopez. Nainteres ko aning kasoha. Thrilling kaayo. Imagine, hapit ta mamatay tungod ani?” Mikatawa si Malou.

Nakapanglingo na lang ang detektib nga misulod sa banyo nga diha ra usab sa sulod sa kuwarto.

Segun sa ila nang gikasabotan ni SPO1 Homer Calderon, udto siyang nahiabot sa kan-anan sa Fuente. Nahimutang kini sa suok nga lugar. Nag-una pag-abot ang inspektor. Nag-inom og serbesa. Duha ka botelyang gagmay ang nagbarog sa ibabaw sa lamesa nga iyang nahimutangan. Ang usa wa nay sulod, samtang ang usa nakuhaan na kutob sa tunga. “Ganina ka ra, Homer. Hapit ka na makaduha ka botelya.” Milingkod si Monsour sa atbang sa higalang inspektor sa kapolisan. Misenyas si Homer sa usa ka silbidora nga batan-on. Nawala ang silbidora, pagtunghag balik, nagdala nag tray nga gisudlan og duha ka botelyang serbesa. Gipahimutang sa silbidora ang duha ka botelya nga nag-aso sa kabugnaw sa tungod ni Monsour. Gibutang sab ang usa ka baso nga dunay yelo.

Miipis si Monsour og beer sa baso. Mitungab og gamay. Pagkahuman, midagkot siyag usa ka stick sa Marlboro.

“Unya na ta maniudto, Mon. Mag-abli-gana una ta.” Mipahiyom si SPO1 Homer Calderon. Miyango ang detektib.

“Abi nimo, Mon, kadtong imong napatay nga duha ka tawo, kanunay kong makita uban kang Jeffrey Sandoval sa casino. Parehas sila si Angelo Lopez, paborito nga palabyanan sa oras ang casino uban sa ilang kuwarta.”

“Nagkaila diay sila si Angelo Lopez ug Jeffrey Sandoval sa casino, kon mao, Homer?”

“Lagmit. Ang babaye nga ilang gikaibgan dinhi nila gikaila. Parehas silang hilig mokaon ug moinom sa tago nga lugar, parehas dinhi. Silbidora ning kan-anan ug imnanan ang maong batan-ong babaye. Giilogan nila ni Angelo Lopez ug Jeffrey Sandoval ang babaye. Guwapa kini, ug nindot pa gyod og porma ang lawas. Kurba kaayog hawak. Pero sumala sa mga kaubang silbidora sa maong babaye dinhi, si Angelo ang nagustohan. Bisag edaran na si Angelo pero milutaw gihapon ang kaguwapo.” “Hain man ang giingon mong babaye, Homer?” “Wa na magtrabaho dinhi. Gipuyo na ni Jeffrey. Anak og pobre si Susette. Masakiton ang inahan nga biyuda. Upat silang magsoon ug si Susette ang kamaguwangan.”

“Nagkasulti na ba mo anang giingon mong Susette?” Naikag ang detektib sa gitug-an kaniya sa inspektor.

“Oo. Apan usa ray tubag sa matag adto ko niya sa gipuy-ang apartment. Wa kuno siya makahibawo sa gusto kong masayran gikan kaniya. Usa sa gipangutana ko niya, kon nakadungog ba siya nga gibaharan ni Jeffrey si Angelo. Modayon siyag lingo-lingo ug mangambot.”

“Sa laktod, di mokooperar si Susette nimo? Kana kon wa siya motug-an sa matuod.”

Mitando ang Inspektor. Naghunahunag lawom ang detektib. Misantop sa iyang kaisipan ang CCTV footage sa hotel diin nakaplagang patay si Angelo Lopez.

(PADAYONON)

Gipakigkitaan ni Monsour ang polis nga si SPO1 Homer Calderon kalabot sa lakaw sa imbestigasyon sa kamatayon ni Angelo Lopez…

“Unya na ta maniudto, Mon. Mag-abli-gana una ta.”

Newspapers in Cebuano

Newspapers from Philippines

© PressReader. All rights reserved.