Pagkustodiya kang Trillanes sa Senado
SA dayong paghikay ning balita wala isurender sa Senado si Sen. Antonio Trillanes IV ngadto sa mga operatiba sa Criminal Investigation and Detection Group (CIDG). Hinunoa, gipailawom ang senador sa kustodiya ni Senate President Tito Sotto. Miingon si Trillanes nga naneguro si Sotto nga samtang anaa siya (Trillanes) sa balwarte sa Senado walay makahimo pagdakop o pag-aresto kaniya.
Una niini, dul-an sa 50 ka membro sa CIDG ug militar ang nangadto sa compound sa Senado ug mingpahibalo nga ila untang dakpon ang senador.
Ang pagkustodiya kang Trillanes sa Senado nagpasabot nga gawasnon pa siyang motambong sa sesyon, hearing ug uban pang kalihokan sa Senado mga may kalabotan sa iyang trabaho apan dili lang siya tugotan nga makabiya o makagawas sa Senado.
Matod sab ni Trillanes, nanumpa siya sa atubangan ni kanhi Defense Secretary Voltaire Gazmin ug na- dismiss ang iyang mga kaso lakip na sa mga civilian court.
Midugang pa gyod ang senador nga bisan asang dapita sa kalibotan, walay mabakwi nga amnesty kon ikahatag o gikahatag na kini ngadto sa hingtungdan. Ug wala unta siya hatagi og amnesty kon wala pa siyay aplikasyon niini busa dayag nga usa ka kaso sa political persecution ang gihimo sa administrasyon ngadto kaniya.
Lain niyang katarongan nga ang amnesty usa ka “act of Congress” busa dili kini mahimong mabalewala tungod lang sa usa ka Executive Order. Ug wala siya mahadlok kang Presidente Rodrigo Duterte kinsa gitawag pa gani niyag ‘talawan’ tungod kay giluwatan niya (Duterte) ang proklamasyon samtang atua si Duterte sa gawas sa nasod.— TNB