Mata Sa Hustisya
(Gula 18)
HUSTO si Inspektor Homer Calderon, kini ang diha sa hunahuna ni Detektib Monsour Morales. Di gusto ang babaye nga mailhan. Gitago niini ang tinuod niyang identity sa mga tawo nga makakita niini sa pagduaw sa lubong ni Angelo Lopez. “Mon, naa ka pa diha?” Naigking si Monsour. Nahikatawa siyag hinay tungod kay nakalimot siya nga gikaestorya diay niya ang higalang inspektor sa homicide section. “Oo, Homer.” “Tuod, maayo kay mitawag ka nako. Ako untay motawag nimo pero naunhan ko nimo.” “Kay ngano man diay unta, Homer.” “Pahibaw-on tika nga duna miy legitimate operation kang Jeffrey Sandoval unyang gabii. Kompirmado na nga duna siyay ilegal nga mga negosyo. Smuggling sa mga high powered firearms. Aside from that, duna say nadiskobrehan ang among info nga duna siyay laboratory sa gidiling droga dinhi sa Cebu.”
“Daan na kong nagduda ana niya, Homer. Sige, mokuyog ko. Usa siya sa akong mga suspek.”
Human ikatug-an ni Inspektor Homer Calderon ang oras sa ilang paglakaw ug ang dapit asa sila magkita, gihunong na nila ang ilang panagsulti sa selpon.
Gipahinayan ni Monsour ang pagpadagan sa kotse. Duna siyay
gihunahuna pag-ayo. Kon madakpan o kaha mapatay si Jeffrey Sandoval sa operasyon unyang gabii, nagpasabot ba kini nga nasulbad na sab ang misteryo sa kamatayon ni Angelo Lopez? Nagpanglingo ang detektib. Wa matingob ang dako niyang pagtuo nga si Jeffrey Sandoval ra gyod ang responsable sa pagpatay kang Angelo Lopez. Di kay kini ra ang suspetsado para niya. Ug kadtong babaye nga nagpurong og malong nga miduaw sa lubong ni Angelo Lopez, nakahatag kang Monsour karon og tanghaga.
Gitawgan ni Monsour si Malou nga di paadtoon sa iyang gipuyang apartment unyang gabii kay duna siyay importanteng lakton.
Wa modiretso sa pagpauli si Monsour Morales sa gipuy-ang apartment. May nahunahunaan siya. Wa pa niya masusi ang hotel diin napalgang patay si Angelo Lopez. Duna siyay gustong pakisayran didto. Kalit kining misantop sa iyang hunahuna karon.
Human ikaparada sa detektib ang Innova sa parking area sa hotel, nagdali siyag sulod og midiretso sa information counter. Duha ka matahom ug mapahiyomon nga babaye ang ming-abi-abi kaniya. “Maayong adlaw, Sir. Motsek-in ka?” “Maayong adlaw sab. No. Duna lang koy gamay nga ipangutana ninyo.” Unya nagpaila si Monsour Morales sa duha ka babaye nga diha sa information counter. Mingyango-yango ang duha ka babaye. “Unsa may imong ipangutana namo, Sir?” Hapit magkadungan ang duha ka babaye. “Nakahinumdom pa ba mo niadtong tawo nga mitsek-in dinhi nga napalgang patay sa iyang kuwarto?”
Nagkatinan-away ang duha ka babaye. Unya nagkadungan sila pagtando kang Monsour Morales.
“Motawag una ko sa among manedyer, Sir. Di man god mi basta-bastang mohatag og detalye sa mga impormasyon dinhi. Mao ni ang among rules and regulations.”
“Nakasabot ko. Palihog lang sa pagsulti sa inyong manedyer sa akong ngalan ug unsay akong trabaho. Ingna siya nga ako ang nagkupot sa kaso sa misteryosong pagkamatay ni Angelo Lopez.”
Mitando ang babaye nga gikasulti sa detektib. Naghuwat si Monsour samtang nakig-estorya ang maong babaye sa ilang manedyer sa telepono. Unya, human makigsulti ang babaye sa ilang manedyer, mapahiyomon kini nga miatubang sa detektib.
“Nakaila ang among manedyer nimo, Sir. Misugot siya nga motubag mi sa imong mga pangutana. Kaming duha ang duty dinhi, Sir, niadtong tungora. Kay ngano man unta, Sir?”
“Unsang orasa mitsek-in si Angelo Lopez dinhi?’ Mahinamon si Monsour nga masayod.
Gisusi sa usa ka babaye ang computer. Wa madugay mitan-aw kini sa detektib. “Nine in the evening, Sir. Room 365.” Miyango-yango si Monsour Morales. “Sa katapad nga room, duna bay mitsek-in?” Gisusi na sab sa babaye ang computer. Unya miatubang siya sa detektib.
“Duna, Sir. Alas nuybe imedya sa gabii siya mitsek-in. Room 364. S.A.G. ang registered name nga nabutang dinhi, Sir.”
Miginhawag lawom si Monsour. Unya duna siyay gihinuktokan. Miatubang na sab siya sa duha ka babaye.
“Duna bay usa ninyo nga nakaklaro kon lalaki o babaye ba siya?”
Nagkatinan-away ang duha ka babaye. Unya naghunahuna sila. Pagkahuman ming-atubang na sab sila kang Monsour Morales.
“Wa mi makaklaro, Sir, kay nagpurong man siyag malong. Kanunay sab siyang nagduko.”
Naigpot si Monsour Morales sa iyang gitindogan. Interesado kaayo siya sa impormasyon nga iyang nasayran. “Unsay disenyo sa malong?” “Mora man tog binuwakan og puwa, Sir.” “Unsang orasa siya mi- out dinhi?” Gitan-aw na sab sa babaye ang computer. Pagkahuman miatubang na sab kini sa detektib.
Ug mikuyog si Monsour Morales sa police operation nga gihimo sa iyang higalang inspektor…
“Alas dos sa kadlawon, Sir.” Nagpasalamat si Monsour Morales sa duha ka babaye. Nakapanglitik siya sa iyang mga tudlo. Ang gipurong sa babaye nga miduaw sa lubong ni Angelo Lopez susama sa malong nga gipurong sa mitsek-in sa hotel nga katapad sa kuwarto ni Angelo Lopez. Dako ang pagtuo sa detektib nga duna kiniy dakong kalabotan sa pagpatay kang Angelo Lopez.
Nakahinumdom karon ang detektib dihang personal siyang nagpakisusi sa resulta sa autopsy sa lawas ni Angelo Lopez. Sumala sa maong resulta, namatay si Angelo Lopez gikan sa alas dose sa tungang gabii ngadto sa ala una sa kaadlawon. Ug napalgan ang patay nga lawas ni Angelo Lopez niana nang pagkaudto.
Nanihapon daan si Monsour Morales nianang sayong gabii. Unya mipauli na siya sa gipuy-ang apartment. Mipahuway siya og kadiyot, unya naligo. Pagkahuman, nag-ilis siya. Gisusi niya ang iyang caliber .45 pistol kon puno ba sa mga bala ang magasin. Dihang naseguro niya nga puno kini, nagkuha siyag laing tulo ka magasin nga puno sab sa mga bala. Gisuksok niya ang pistola ug ang ekstra nga mga magasin sa iyang hawak. Ang paborito niyang jacket nga kolor brown ang iyang gisul-ob. “Shall we go, Homer?” Diha na si Inspektor Homer Calderon ug mga sakop pag-abot ni Monsour Morales sa dapit nga ilang gikasabotan nga magkita. Full battle gear ang inspektor ug ang iyang mga sakop. Alas dose sa tungang gabii na niadtong tungora. “Tua ron si Jeffrey Sandoval sa iyang laboratory sa droga, Mon. Tapad sa laboratoryo, nahimutang ang bodega sa iyang negosyo sa mga armas. Modiretso ta didto. Duna na koy ubang mga sakop nga nagposte na daan ron didto.”
Wa mosakay si Monsour Morales sa Innova, sa service car ni Inspektor Homer Calderon siya misakay. Di na bag-o kaniya ang pagkuyog sa dagkong mga operasyon nga gihimo sa iyang higalang inspektor. Nakakuyog na siya sa makadaghang higayon.
“Usa ka gubat kining atong adtoon, Mon. Way kaseguroan ang atong kinabuhi.”
Igo lang mipakibo sa mga abaga ang detektib. Sa ingon niining operasyon, kaigmat ug pag-amping ang gikinahanglan. Ug aduna siya ug ang iyang higalang inspektor niini. Dako ang pagsalig ni Monsour nga magmalamposon sila sa ilang lakaw karon.
(PADAYONON)