ANG MGA SEMINAR SA AGRILINK 2018
ADUNAY daghang demo ug seminar nga ipahigayon sa umaabot nga Agrilink Expo sa World Trade Center sa Dakbayan sa Pasay sa Oktubre 4-6, 2018. Libre kining maong mga seminar ug mapuslanon kaayo.
Lainlaing tema ang itanyag sa mga ahensiya sa kagamhanan ug pribadong mga kompaniya sulod sa tulo ka adlaw.
OKTUBRE 4: Ang Bureau of Agricultural Research sa Departamento sa Agrikultura magpakita og mga teknolohiya sa pagproseso sa humok, medyo humok, ug gahi nga keso nga gama gikan sa gatas sa kabaw, kanding, ug baka. Lain pang ipakita sa BAR mao ang upat ka matang sa prinosesong karne sa kanding sama sa kalderita, adobo, kilawin, ug sisig.
OKTUBRE 4: Ang Bureau of Fisheries and Aquatic Resources (BFAR) magpahigayon og fisheries forum diin maghimo og business matching aron malambigit ang mga kompaniya sa pangisda sa mga mamalitayng lokal ug mga langyaw.
OKTUBRE 4: Ang UP Los Baños magpahigayon og seminar labot sa lainlaing suliran sa pagbaboyan. Maghisgot usab sila kalabot sa food safety o luwas nga pagdala sa preskong mga utanon ug mga prutas gikan sa umahan ngadto sa kamerkadohan.
OKTUBRE 5 UG 6: Ang Agribusiness Marketing Assistance Service (AMAS) maghisgot labot sa mga oportunidad sa mga mag-uuma sa merkado pinaagi sa halal, kosher, ug organikong
food certification. Ang ahensiya magpahigayon usab og hisgothisgot labot sa fair for life certification nga dumalahon sa Institute of Marketecology. Makatabang kini sa pagbaligya og sertipikadong mga produkto sa lainlaing merkado sa gawas sa nasod.
Ang AMAS magpahigayon usab og investment forum labot sa pagbaboyan, poultry, tanom nga high-value, vermincomposting, ug agritourism. Magpahigayon usab og forum labot sa insurance sa mga proyekto, ug programa labot sa tabang pinansiyal gikan sa Crop Insurance Corporation, Agricultural Credit Policy Council, ug Land Bank.
OKTUBRE 5: Ang hustong nutrisyon sa lainlaing edad sa mga baboy ang hisgotan ni Dr. Angelica Magno sa Premium Feeds Corporation.
Lain usab ang hisgotan sa Santeh Feeds niining adlawa. Kini mao ang pagpamuhi og pansat diha sa tradisyonal nga punong nga gamitan lang og natural nga pagkaon ug mineral.
OKTUBRE 6: Ang San Miguel Yamamura Packaging Corporation magpahigayon og seminar labot sa paggamit og buslotong sawog nga plastik alang sa pagpamuhi og mga broiler kun kanang pangkarne nga manok. Pinaagi sa paggamit niini, malikayan ang blister sa petso sa mga manok.
OKTUBRE 6: Ang hustong pagdala og proyekto sa pag-atiman og itik ipahigayon usab sa Univet Nutrition and Animal Healthcare Company (UNAHCO) Sarimanok. Hisgotan dinhi ang labot sa mga suliran nga kasagarang nasinati sa mga nanag-itikan sama sa suliran sa genetics kun kalidad sa breed sa itik, hustong tangkal, pagmentenar sa hustong timbang, paglikay sa sakit sama sa bird flu, pagatiman sa mga piso ug uban pang aspeto sa pag-itikan.
OKTUBRE 6: Ang FeedPro mohatag usab og seminar labot sa pagbaboyan diin gamitan og natural nga pagkaon, probiotics (paggamit sa maayong mga mikrobyo) ug fermented nga pagkaon.
Pamili na mo kon hain niini ang buot ninyong tambongan. Segurado nga daghan mog mapudyot nga maayong mga ideya labot sa agribusiness.—