Mata Sa Hustisya
G(Gula 19)
IBAHIN ni Inspektor Homer Calderon ang iyang mga sakop sa duha ka grupo. Ang usa alang sa bodega sa mga armas nga negosyo ni Jeffrey Sandoval, ug ang grupo sa inspektor adto mopahigayon og operasyon sa drug laboratory ni Jeffrey. Sa grupo ni SPO1 Homer Calderon mokuyog si Detektib Monsour Morales.
Ang mga sakop ni Inspektor Calderon nga nagposte na sa maong mga dapit, gikasulti sa inspektor sa ila nang paghiabot. Nagpaniid lang ang detektib. Unya, nagdungan pag- raid ang duha ka grupo. Apan mingsukol ang mga sakop ni Jeffrey Sandoval. Nahitabo ang pinusilay. Si Monsour nga anad na sa maong kahimtang, nagkalingaw og punggit sa mga tawo nga daotan.
Ang maong dapit gisangag sa mga buto-buto sa tag-as nga kalibre sa armas. Dunay mitig-ab. Dunay miagulo. Apan sa habig sa kapolisan, way naigo kay maayong pagkaplano ni Inspektor
Homer Calderon ang gipahigayon nilang operasyon.
Unya kahilom. Mitan-aw si Monsour sa inspektor nga diha lang sa iyang duol.
“Men! Search the area!” Kusog ang tingog sa inspektor nga mimando sa iyang mga sakop. Hapit magkadungan sa pagtindog sila si Monsour ug Homer gikan sa ilang gihup-an.
Usa sa napalgang patay sa maong engkuwentro mao ang lawas ni Jeffrey Sandoval. Dunay pipila ka sakop ni Jeffrey Sandoval nga mingsurender. Dali silang gipangposasan ug gipasakay sa mga patrol car. “Milampos ta, Mon.” Malipayon si Inspektor Homer. Miyango-yango si Monsour nga nagtan-aw sa mga sakop sa inspektor nga nanghipos sa mga ebidensiya.
“Congratulations, Homer. Lain na sab ning kalamposan sa imong propesyon. Mosamot kailado ang imong ngalan sa natad sa pamolis.” “Salamat, Mon. Trabaho lang ning ako.” Miyango-yango na sab ang detektib. Gikan sa maong dapit, nangadto sila si Monsour Morales, Inspektor Homer Calderon ug pipila ka polis sa balay ni Jeffrey Sandoval. Ang mga patrol car nga gisakyan sa mga patay nga lawas mingdiretso sa ilang kampo.
Naabtan nila ang pipila ka sakop ni Jeffrey Sandoval nga wa mosukol, ug miampo lang dayon. Dunay usa ka kuwarto nga gikandadohan ang gawas nga pultahan. Didto sa sulod nadungog nila ni Monsour ug Homer ang singgit sa usa ka babaye nga nagpangayog tabang. Daling gimandoan sa inspektor ang usa niya ka sakop nga gub-on ang kandado. Gipusil kini sa maong sakop.
Sa pagsulod na nila ni Monsour ug Homer, maoy ilang nakita si Susette nga nagkurog sa kahadlok. Nanghubag ang nawong niini. Naghilak si Susette.
“Gibilanggo ko ni Jefrrey dinhi. Kanunay ko niyang pasakitan. Bun-ogon ko niya sa di pa siya mogamit nako.” Nagkatinan-away sila si Monsour ug Homer. Gidala ni Inspektor Homer Calderon si Susette sa ilang opisina. Gikuhaan og pipila ka impormasyon bahin kang Jeffrey.
“Gihadlok ko niya maong nakigpuyo ko niya.” Naghilak gihapon si Susette nga naghinugilon. “Iya kong patyon kon di ko makigpuyo niya. Nahibaw-an sab nako nga drug lord diay siya ug esmagler pa gyod sa mga armas. Di ko makagawas sa iyang balay kon di siya ang kauban.”
“Unsay imong nahibaw-an bahin sa pagkamatay ni Angelo Lopez?”
Miginhawag lawom si Inspektor Homer Calderon samtang naghuwat sa tubag ni Susette. Nagpaniid lang si Monsour Morales ug nagpaminaw sa tanang detalye nga isulti sa babaye.
“Wa koy nahibaw-an ana. Wa ko makadungog gikan kang Jeffrey nga duna siyay planong daotan kang Angelo Lopez.” Nagkatinan-away sila si Homer ug Monsour. “Sige, adto ta sa ospital kay patambalan ka namo, Susette. Pagkahuman ning nahitabo ron nimo, unsay imong plano?” “Mopauli na ko sa among probinsiya. Adto na lang ko didto.” “Husto nang imong desisyon, Susette. Way kaseguroan ang imong kaugmaon dinhi sa siyudad.”
Hapit na mohayag ang kabuntagon sa pagpauli ni Monsour Morales sa gipuy-ang apartment. Tungod sa kakapoy, dali ra siyang nakatulog. Udto na sa iyang pagmata. Nakamata siya kay namatngonan niya nga dunay naggakos-gakos ug naghawok-
Malamposon ang gihimong raid sa kapolisan sa laboratoryo sa droga ni Jeffrey Sandoval…
hawok niya.
“Nabalaka ko nimo. Di ka motubag sa akong pagtawag sa selpon. Maayo diay ang imong pagkahinanok. Maayo gani kay duna koy duplicate key sa pultahan sa sala maong nakasulod ko.”
Wa motubag ang detektib. Iyang gigabling si Malou Sayson. Giukoban ang mga ngabil. Nagkaligiray sila sa kama nga sa matag karon ug unya moigot og kusog. Daling mitindog si Malou. “Kaon una, uy. Andam na tong imong mga pagkaon. Nagluto ko kay seguradong gutomon ka inigmata nimo.”
Mibangon si Monsour. Giagbayan si Malou ug nanganaog sila sa silong. Nanglimugmog ang detektib ug pagkahuman, mikaon na siya. Midungan sa pagkaon ang babaye sa hinigugma.
“Nadungog nako sa balita sa TV ganinang buntag ang malamposon ninyong operasyon. Ug na- rescue sab ninyo ang kapuyo-puyo ni Jefrrey Sandoval. Sadista man diay si Jeffrey. Kaluoy intawon sa iyang kapuyo-puyo.” Miinom si Monsour sa tubig sa iyang baso. “Sa pagkamatay ni Jeffrey, ang matawag nga prime suspect sa pagpatay kang Angelo Lopez, mao na lang si Donna Lopez.” Seryoso si Monsour Morales.
“Sa imong sabot, Mon, wa gyod kahay kalabotan si Jeffrey Sandoval sa kamatayon ni Angelo Lopez?”
“Di pa ta makaseguro aning tanan. Way lig-ong ebidensiya batok kang Jeffrey Sandoval nga maglambigit kaniya nga maoy utok sa pagpatay kang Angelo Lopez.”
Unya nahinumdom ang detektib sa babaye nga nagpurong og malong nga binuwakan og puwa nga miduaw sa lubong ni Angelo Lopez. Natukma kini sa gisugid sa duha ka receptionist sa hotel diin napalgang patay si Angelo Lopez.” “Unsay imong gihunahuna, Mon?” Gitug-an ni Monsour Morales sa hinigugma ang bag-o niyang nahibaw-an.
“Morag duol ka na sa kalamposan, Mon. Ang maong duha ka babaye sa akong pagsabot, usa ra. Dako ang akong pagtuo nga nahilambigit siya sa pagpatay kang Angelo Lopez.”
“Mao sab nay dia sa akong hunahuna, Malou. Giplanohan gyod pag-ayo sa kriminal ang pagpatay kang Angelo Lopez. Sa akong pag-analisar, dunay dakong kasilag ang babaye kang Angelo Lopez. Kana kon matinuod ang atong pagtuo nga siya ang kriminal.”
“Wa nay lain, Mon, siya gyod ang nagpatay o nagpapatay kang Angelo Lopez.”
Nahunahuna sa detektib nga ang suspetsadong babaye niya sa pagpatay kang Angelo Lopez mao ra si Donna Lopez. Duna pa kahay laing babaye nga angay niyang dudahan? Si Divina Singson Lopez, ang maguwang ni Angelo Lopez.
“Wa koy pagduda kang Divina, Mon.” Mipagawas si Malou sa iyang hunahuna dihang gisultihan siya ni Monsour bahin kang Divina. Unya nahunahuna sa detektib si Cassandra Galvez, ang kapuyo-puyo ni Angelo Lopez.
“Sa tan-aw ko kang Cassandra Galvez, Mon, di makabuak og plato. Buotan kaayo siya sa akong pagtuo.” Mipagawas na sab sa iyang hunahuna si Malou Sayson human siya sultihi ni Monsour Morales bahin kang Cassandra Galvez. “Kon akoy imong pangutan-on, Mon, dako ang akong pagduda nga si Donna Lopez ang utok sa pagpatay sa iyang bana.”
Miyango-yango ang detektib, timaan nga uyon siya sa hunahuna sa iyang hinigugma.
(PADAYONON)