Bilanggo sa tibuok kinabuhi, silot kang Palparan

MILUWAT na gyod og desisyon ang Malolos Regional Trial Court nga guilty si Retired General Jovito Palparan ug ang laing duha pa ka nahilambigit sa pagkawala sa duha ka estudyante sa University of the Philippines kaniadtong 2006.

Human sa 12 ka tuig, nasilotan na gyod og pagkabilanggo sa tibuok kinabuhi sila si Palparan, Lt. Col. Felipe Anotado ug Staff Sgt. Edgardo Osorio sa kasong kidnapping ug serious illegal detention gumikan sa pagkawala nilang Karen Empeño ug Sherlyn Cadapan nga hangtod sa pagsulat niini wala pa gayod igkita.

Silang tulo gipabayad sa korte og tagP100,000 nga civil indemnity ug P200,000 nga moral damages.

Kahinumdoman nga kaniadto pang Hulyo 2011 gisugdan ang hearing sa korte batok kang Palparan kinsa niadtong panahona nagtagotago pa ug nadakpan kaniadtong 2014 didto sa Sta. Mesa, Manila.

Hilabihan ang kalipay nga gibati sa mga kabanay ug mga supporter nilang Empeño ug Cadapan gumikan sa naangkon nilang hustisya.

Samtang gibasa ni Judge Tamayo ang sentensiya ni Palparan, iyang gisinggitan ang huwes… “Duwag ka, Judge! Napakaduwag mo!”

Gimando ni Judge Tamayo nga ibalhin na sa New Bilibid Prison (NBP) si Palparan ug ang duha pa ka akusado gikan sa custodial center sa Fort Bonifacio.

Ming-apelar ang mga abogado ni Palparan nga ipabilin lang una sila sa Fort Bonifacio tungod kay may kaso pa silang nag-ung-ong sa Malolos Regional Trial Court.—