ANG MILAGROSANG BIRHEN SA LINDOGON
A(IKA-4 SA LIMA KA BAHIN) Ang Gugmahanong Tahas Sa Mga Monghe NG kusog nga kisaw sa taga media labot sa mga “K” sa Lindogon, nakapaaghat sa Diocesan Commission sa paghimo og imbestigasyon aron pag-ugkat sa nag-umidong mga sukna: “Tinuod ba o dili ang mga milagro sa Birhen sa Lindogon?” Ug butang kini nga daan nang gipanagan-an ni Frater Martin. Ang iya lamang unta kadto nga dili makahatag og baligho nga pagsabot ngadto sa prensa. Kay samtang adunay nanagtuo, dili man usab kalikayan nga duna poy hugpong sa katilingban nga moalkontra, ug nga, mas kusog pa man gani hinuong mohuyad sa pagpakang sa tambol diha sa ilang pagbaraw; ug ang pagka wala nilay pagtuo sa nabaniog nga milagro labaw pang giblo-ap sa taga media agig paghidhid og makadaning bulok sa inadlaw-adlawng kasikas.
Sa tuig 2004, ang Komisyon mipadalag imbestigador, si Padre Boy Abarquez, nga sa pagka karon obispo na. Gisuling ni Fr. Abarquez ang imahen sa Mahal nga Birhen. Apan walay nakita ang tinamod nga pari sa mabisan unsa nga kadat-ogan sa katahap. Ang imahen nagpabiling malinis, hamis, ug walay lungag-lungag o mabisan unsa nga sarang kalutsan og kadudahang mga gadget. Apan pipila sa mga media practitioner nagpadayon sa pagsangyaw nga usa lamang kuno ka hoax ang mga milagro sa Birhen. Nga tungod niini, si Cardinal Vidal mismo miawhag na gayod ngadto sa mga monghe nga dili na nila pagatandogon ang estatuwa sa Birhen. Ug may tugon pang gibaod. Ang mga madre lamang maoy katugotan nga moilis og sinina niini. Natuman.
Usa ka pari nga nagpakitag pagdapig sa gibarogan ni Frater Martin miawhag sa naulahi:
“Barogi, panalipdi ang Mahal nga Birhen bisan pag unsay mga negatibong madungog nimo kanila ug bisan pag unsay ilang buhaton nganha kanimo.”
Ug sa tuig 2007, si Frater Martin mihimog petisyon ngadto sa Mahal nga Birhen nga niya pa: “Mama Mary, kon buot man nimo nga mopabatyag sa mabisag unsa, palihog, ayaw kanamong mga monghe, ug bisan ngadto sa mga tawo, kondili, mas labing maayo ngadto hinuon sa kaparian.”
Unya sa diha nga gisaulog ang usa ka concelebrated mass nga gitambongan sa singkuwenta mil ka deboto, si Msgr. Binghay maoy mipahiluna sa korona ngadto sa Mahal nga Birhen. Ug dihang ang kaparian minghinol na sa estatuwa, ang tanan nakamatikod sa lanahon nga singot sa Birhen. Walay nakapugong sa mga alagad sa simbahan. Nanghilak sila dungan sa pagpangurog sa ilang mga galamhan. Si Msgr. Binghay nakadawat og mensahe gikan sa tingog sa usa ka babaye. Apan sa diha nga gipakitubdan ang talamdong Monsenyor sa katinoan, igo lamang siyang mipahayag sa pag-ingon, “Adto ra nako isugilon ang tanan ngadto sa mga Marian Monk.”
Kanus-a ug diin magsugod ang Marian Monks of the Eucharistic Adoration? Atong subayon ang dalan balik sa iyang gigikanan. Ania:
Sa diha nga ang kaparian minghinol na sa estatuwa, ang tanan nakamatikod sa lanahon nga singot sa Birhen. Walay nakapugong sa mga alagad sa simbahan. Nanghilak sila dungan sa pagpangurog sa ilang mga galamhan.
Ang founder mao si Frater Martin, usa ka titulong ngalan gikan sa iyang binunyagan nga Abel Cañete Mangila nga kaliwat og taga San Isidro, San Fernando ug Langtad, Naga (karon siyudad na). Usa siya ka seaman diin sa sayo pa sa dekada 80, usa siya sa mga aplikante nga makasakay og barko alang sa gawas. Nagpaabot siya niadtong tungora sa go-signal sa ahensiya nga iyang giaplayan didto sa Angeles, Pampanga apan nahilos ang iyang pagtuo ug pagpaabot nga makalarga tungod kay wala man maaprobahi ang iyang mga papeles.
Sa Angeles, gigugol niya ang iyang mga adlaw (uban kang Frater Frances) alang sa laing gimbuhaton nga makawagtang sa ilang mga kalaay. Natukoy ang ilang pagtagad sa mga babaye nga nanagbaligya sa ilang mga dungog. Mingbati sila kanila tungod kay ang maong mga “mahuyang” wala nay laing kapaingnan sanglit wala na lagi ing ming-alinga kanila.
Busa nangigbisog sila (Frater Martin ug Frater Frances) nga ilang ikahinabi ang maong mugbog lupad nga mga babaye. Ila silang gidapit alang sa usa ka Bible sharing ug sa pagrosaryo. Wala sila mahigawad kay gidawat man sa mga mahuyang ang ilang imbitasyon. Ug una sila mamaingon sa ilang tagsa-tagsa ka mga trabaho, unahon na nila ang pagpaminaw sa mga pulong sa Diyos.
Aron dili mamatikdan ang tinuod nilang motibo inigpakigkita nila sa mga nahigala nilang mga tigbaratilyo og kalipay, nagpabelib silang mga mamaligyaay og budbod kun suman, kunohay street vendors aron sayon ra silang makasulod-gula sa mga balay kahilayan.
“Wa ko mosuway sa pagbadlong kanila,” ni Frater
Martin nga naghinubay sa mga lakra sa iyang kaagi. “Nga moundang na sila sa ilang makapatigmi sa ginhawa nga kahinguhaan? Ug mangita na sila og laing kabuhian. Kanang malinis ug dalaygon. Kay kinsa man god ko? Gawas pa, unsa man say alternatibong ikasugyot ko kanila?
“Apan sa pagkilab sa mga adlaw, sa pagpunay namog pahigayon og mga prayer meeting ug sa kanunay namong pagsabwag sa binhi sa mga pulong sa Ginoo, inanay nga mipatim-aw ang busilak sa kahayag sa ilang mga alimpatakan. Gikagdan ang katig-a ug nawiwi ang tubag sa ilang pagpakabuta-bungol. Nakahimungawong ra gyod sila sa tinuod nga dagway sa kinabuhi: sa katarong ug sa kalaksot. Sa kalinis ug sa kalang-og.”
Sa sunod gula, tuphon ikaw sa talagsaong mga panghitabo nga nanukad sa Angeles, Pampanga paingon ngadto sa kalugotan ug kabungtoran sa Lindogon.—